11
Taabuʼu derbi achaan ana gaaʼid nitaabiʼ derib al-Masiih.
Khattiyiin raas al-mara
2 Wa ana farhaan minku achaan intu gaaʼidiin tifakkuru foogi wa titaabuʼu adiil al-aadaat al-allamtuhum leeku.
3 Wa laakin fi cheyy nidoor intu tafhamooh wa da hu.
Raʼiis hana raajil hu al-Masiih wa raʼiis al-mara hu al-raajil wa raʼiis al-Masiih hu Allah.
4 Wa ayyi raajil al-yisalli walla yikallim kalaam naazil min Allah wa yikhatti raasah,
yijiib eeb fi l-Masiih al-hu raʼiisah.
5 Wa ayyi mara al-tisalli walla tikallim kalaam naazil min Allah wa ma tikhatti raasha,
hi tijiib eeb fi raajilha al-hu raʼiisha.
Wa da eeb kabiir leeha misil zayyano suuf raasha.
6 Wa kan mara taaba ma tikhatti raasha,
khalli tuguss chaʼarha.
Wa kan gassiin al-chaʼar wa zayyiniin al-raas tichiifah eeb le l-mara,
khalaas khalli tikhatti raasha.
7 Wa ma waajib le l-raajil yikhatti raasah achaan Allah khalagah fi suurtah achaan yiwassif azamtah laakin al-mara tiwassif azamat al-raajil.
8 Achaan al-raajil ma min mara laakin al-mara min al-raajil
9 wa Allah ma khalag al-raajil min al-mara laakin khalag al-mara min al-raajil.
10 Wa achaan da bas,
waajib le l-mara tukhutt cheyy fi raasha al-yiwassif hi fi tihit al-sulta.
Wa battaan da muhimm le l-malaaʼika.
11 Wa da kulla ke sahiih laakin fi nizaam Rabbina,
bala al-raajil al-mara ma fiiha wa bala al-mara al-raajil ma fiih.
12 Achaan awwal al-mara jaat min al-raajil wa hassaʼ ayyi raajil ja min mara wa kulla cheyy ja min Allah.
13 Wa leeku intu,
nuguul fakkuru adiil wa mayyuzu al-kalaam da.
Kan mara tisalli le Allah wa raasha ma mukhatta,
da muwaafig walla ?
14 Wa naʼarfu min tabiiʼat al-haal chaʼar tuwaal eeb le l-raajil.
15 Wa laakin kan mara indaha chaʼar tuwaal,
da sameh wa da charafha.
Wa Allah antaaha chaʼar tuwaal achaan yabga leeha khattaay.
16 Wa kan ayyi naadum yidoor yinaakhich fi l-kalaam da,
khalli yaʼarif aniina ma nikhassudu be l-aade al-hu yidoorha wa battaan ummat al-Masiih al-Allah ikhtaaraahum ma yikhassudu beeha fi ayyi bakaan.
Acha al-Masiih
17 Wa laakin fi l-cheyy al-bukhuss al-kalaam al-hassaʼ nihajji foogah,
ana ma farhaan beeku marra waahid achaan wakit tulummu fi malammat al-muʼminiin,
al-fasaala katiire min al-kheer.
18 Wa gult al-kalaam da achaan al-khabar al-simiʼtah foogku.
Awwal cheyy,
buguulu wakit tulummu fi malammat al-muʼminiin,
intu mufarragiin wa ambeenaatku tilkhaalafo.
Wa fi fikri,
al-kalaam da ma kulla ke kidib.
19 Aywa,
laabudda intu mufarragiin achaan kan al-khilaaf ambeenaatku ma fiih,
kikkeef al-naas al-iimaanhum saabit yinʼarfu ?
20 Wa wakit tulummu sawa,
al-acha al-taakuluuh da ma acha Rabbina.
21 Achaan fi saaʼat al-acha,
waahidiin yaakulu ajala gubbaal al-aakhariin.
Wa be da,
naas waahidiin akalo wa sikiro kula wa naas aakhariin jiiʼaaniin.
22 Wa da kikkeef ?
Ma taakulu wa tacharbo fi buyuutku walla ?
Aw tahguru ummat al-Masiih al-Allah ikhtaarha wa tidooru tiʼayyubu al-naas al-ma induhum cheyy ?
Wa nuguul leeku chunu ?
Wa be da,
nachkurku walla ?
La,
abadan.
23 Asmaʼo,
da bas al-kalaam al-ligiitah min Rabbina wa allamtuku leyah.
Fi l-leele al-yukhuunu foogha Rabbina Isa,
hu chaal khubza waahide
24 wa chakar Allah wa kasarha wa gaal «
Da jismi al-hu fi chaanku.
Da bas sawwuuh achaan tizzakkarooni beyah ».
25 Wa baʼad al-acha,
hu sawwa nafs al-cheyy be l-kaas.
Hu chaalah wa gaal «
Al-kaas da yiwassif al-muʼaahada al-jadiide maʼa Allah al-nisawwiiha be dammi.
Da bas sawwuuh wa ayyi wakit al-tacharbo minnah,
tizakkuruuni ».
26 Wa khalaas,
ayyi wakit taakulu al-khubza di wa tacharbo min al-kaas da,
tiballukhu moot Rabbina Isa lahaddi yaji battaan.
27 Wa achaan da battaan,
ayyi naadum al-yaakul khubzat Rabbina wa yachrab min kaasah wa niiyitah ma mukhlisa,
hu yudurr jisim Rabbina wa dammah.
28 Khalli ayyi naadum yimtahin nafsah gubbaal ma yaakul al-khubza wa yachrab min al-kaas.
29 Achaan ayyi naadum al-yaakul wa yachrab acha al-Masiih bala fikir fi jisim al-Masiih,
hu yinaadi al-azaab yanzil fi nafsah.
30 Wa achaan da bas,
katiiriin minku ayyaaniin wa mardaaniin wa waahidiin maato kula.
31 Wa kan awwal naʼamalo fi nufuusna hisaab adiil,
khalaas al-azaab ma yanzil foogna.
32 Wa laakin kan Rabbina yihaasibna kula,
hu yiʼaddibna achaan al-azaab al-yanzil foog naas al-dunya ma yaji foogna.
33 Achaan da ya akhwaani,
wakit tulummu achaan taakulu acha al-Masiih,
khalli ayyi naadum yarja akhwaanah.
34 Kan naadum jiiʼaan wa ma yagdar yarja al-aakhariin,
akheer yaakul fi beetah.
Ma tikhallu malammitku tinaadi al-azaab yanzil foogku.
Wa khalaas,
fi l-cheyy al-bukhuss al-suʼaalaat al-aakhariin,
nantiiku wasaaya wakit najiiku.