Fi Iguuniya
14
Wa nafs al-cheyy bigi fi Iguuniya.
Buulus wa Barnaaba dakhalo fi beet al-sala hana l-Yahuud wa gammo yihajju be gudra lahaddi naas katiiriin aamano be Isa min al-Yahuud wa min al-Yuunaaniyiin*.
2 Wa laakin al-Yahuud al-abo ma yiʼaamunu harracho al-naas al-ma Yahuud wa khayyaro fikirhum achaan yazʼalo min al-muʼminiin.
3 Wa Buulus wa Barnaaba ma khaafo minhum wa tawwalo hinaak wa kallamo be l-Rabb Isa le naas al-hille be kalaam waadih.
Wa l-Rabb antaahum alaamaat wa ajaayib achaan yisabbit bichaarat rahmatah giddaam al-naas.
4 Wa naas al-hille alfaarago,
al-waahidiin bigo maʼa l-Yahuud wa l-waahidiin maʼa l-rusul.
5 Wa wakit al-Yahuud astafago maʼa l-naas al-ma Yahuud wa maʼa kubaaraathum,
kulluhum chaalo niiye achaan yahjumu al-rusul wa yarjumuuhum.
6 Wa wakit Buulus wa Barnaaba simʼo al-khabar da,
humman jaro fi l-hillaal al-itneen Listara wa Darba al-gaaʼidiin fi balad Likooniya wa macho fi l-kadaade al-jambuhum.
7 Wa fi l-daar diik,
gammo ballakho le naas be l-bichaara.
Fi Listara wa Darba
8 Wa fi hillit Listara fi naadum maʼduur.
Hu mukarsah min waaluudtah wa yoom waahid kula ma raakh.
9 Wa hu gaaʼid yasmaʼ kalaam Buulus adiil ke wa Buulus chaafah wa irif al-maʼduur indah iimaan achaan yalga al-aafe.
10 Wa Buulus naadaah be hiss chadiid wa gaal :
Gumm foog be rijileenak.
Wa l-raajil natta foog wa gamma yuruukh.
11 Wa l-naas al-laammiin chaafo al-cheyy al-Buulus sawwaah wa awwo be kalaam rutaana wa gaalo :
Al-ilaahaat chaalo suurat al-naas wa nazalo fi usutna !
12 Wa gaalo Barnaaba hu Ziyuus malik al-ilaahaat wa Buulus hu Harmiis khachum al-kalaam hana l-ilaahaat achaan hu bas al-gaaʼid yikallim.
13 Wa beet al-sanam hana Ziyuus gaaʼid jamb baab al-hille wa masʼuul hana beet al-sanam jaayi leehum wa maʼaayah naas katiiriin min al-hille.
Humman ladamo nuwaar achaan yukhuttuuhum fi ragabat Buulus wa Barnaaba wa yusuugu aleehum tiiraan achaan yadbahoohum wa yigaddumu leehum dahiiye.
14 Wa wakit al-rusul simʼo be l-kalaam da,
humman ziʼilo zaʼal chadiid wa charato khulgaanhum wa jaro fi ust al-naas.
15 Wa gaalo :
Ya l-naas,
maalku tisawwu cheyy misil da ?
Aniina insaan bas misilku wa jiina niballukhu leeku al-bichaara achaan tikhallu al-kalaam al-baatil da wa titaabuʼu kalaam Allah al-Hayy.
Hu bas khalag al-samaawaat wa l-ard wa l-bahar wa kulla cheyy al-fiihum.
16 Fi l-zaman al-faat,
Allah khalla kulla l-gabaayil yiʼiichu misil humman yidooru.
17 Wa laakin fi l-wakit da kula,
Allah antaaku chahaada achaan taʼarfu hu mawjuud.
Hu sawwa leeku al-kheer wa yarzukhku be l-almi min al-sama wa khalla fi l-khariif wa yichabbiʼku be l-akil wa yantiiku farah fi guluubku.
18 Wa be l-kalaam da kula,
gaasi leehum yadharo al-naas ma yisawwu leehum dahiiye.
19 Wa baʼad da,
Yahuud waahidiin jo min Antaakiya wa Iguuniya wa harracho al-naas.
Wa rajamo Buulus achaan yaktuluuh.
Wa khalaas,
karrooh wa zagalooh barra min al-hille.
Wa fi fikirhum,
hu maat khalaas.
20 Wa l-talaamiiz jo wa hawwagooh wa hu gamma foog wa gabbal maʼaahum fi l-hille.
Wa ambaakir,
Buulus macha maʼa Barnaaba le hillit Darba.
Gabbalo fi deribhum
21 Wa ballakho al-bichaara le naas al-hille wa katiiriin minhum bigo talaamiizhum.
Wa baʼad da,
gabbalo fi Listara wa min Listara macho fi Iguuniya wa gabbalo battaan fi Antaakiya Bisiidiya.
22 Wa fi kulla l-hillaal dool,
chajjaʼo al-talaamiiz wa wassoohum achaan yagoodu saabtiin fi l-iimaan.
Wa gaalo leehum :
Akiid,
taʼab katiir yaji foogna kullina fi l-derib al-yiwaddiina fi mamlakat Allah.
23 Wa fi ayyi bakaan,
ikhtaaro naas min jamaaʼat al-muʼminiin achaan yabgo leehum chuyuukh.
Wa saamo wa saʼalo Allah leehum wa ammanoohum le l-Rabb Isa al-kulluhum aamano beyah.
Wa khalaas macho.
24 Wa baʼad chaggo balad Bisiidiya,
jo fi balad Bamfiiliya.
25 Wa ballakho al-bichaara le naas hana hillit Barja wa macho giddaam le hillit Attaaliya.
26 Wa hinaak rikbo fi safiina wa chaggo al-bahar achaan yigabbulu fi hillit Antaakiya fi Suuriya.
Wa be misil da,
gabbalo le l-naas al-awwal saʼalo Allah leehum achaan hu yahfadhum be rahmatah wakit humman maachiin yisawwu al-khidme al-hassaʼ kammalooha.
27 Wa wakit wislo khalaas,
naado kulla l-muʼminiin yilimmu wa ooroohum be kulla cheyy al-Allah sawwaah beehum wa kikkeef Allah fatah derib al-iimaan le l-naas al-ma Yahuud.
28 Wa gaʼado wakit tawiil maʼa l-talaamiiz.