Hiruudus katal Yaakhuub wa karab Butrus
12
Wa fi l-wakit da,
al-malik Hiruudus* gamma yitaʼʼib naas waahidiin min ummat al-Masiih.
2 Wa be iznah,
katalo be l-seef Yaakhuub akhu Yuuhanna.
3 Wa wakit hu chaaf al-Yahuud firho min al-cheyy al-sawwaah da,
hu chaal niiye achaan yakrub Butrus kula.
Wa karabah fi usbuuʼ hana Iid al-Khubza bala Tawwaara.
4 Wa karab Butrus wa dassah fi l-sijin.
Wa kallaf beyah sittaachar askari.
Wa fi ayyi wakit arbaʼa asaakir gaaʼidiin maʼaayah le yaharsuuh.
Wa l-malik dawwar yamrug Butrus wa yigaddimah le l-chaʼab baʼad al-iid.
5 Butrus gaaʼid fi l-sijin wa laakin jamaaʼat al-muʼminiin gaaʼidiin yasʼalo Allah be chidde fi chaanah.
Al-Rabb marag Butrus min al-sijin
6 Wa fi l-leele al-gubbaal Hiruudus ma yamrug Butrus giddaam al-naas,
Butrus marbuut be janaaziir itneen wa naayim been asaakir itneen.
Wa asaakir aakhariin yaharsu baab al-sijin.
7 Wa ajala ke,
waahid min al-malaaʼikat Allah baan wa nuur chadiid sadda al-bakaan al-Butrus gaaʼid foogah.
Wa l-malak darabah le Butrus fi naaytah wa gawwamah min al-noom wa gaal :
Yalla,
gumm ajala.
Wa l-janaaziir wagaʼo min iideenah.
8 Wa l-malak kallam leyah wa gaal :
Arbut sulbak.
Albas naʼaalak.
Wa Butrus taabaʼ kalaamah.
Wa l-malak gaal leyah :
Albas khalagak wa taʼaal taabiʼni.
9 Wa Butrus marag yitaabiʼ al-malak.
Wa fi fikrah,
hu gaaʼid yahlam bas wa ma irif al-cheyy al-malak gaaʼid yisawwiih da sahiih.
10 Wa saaro be derib al-askar al-awwal wa saaro be derib al-askar al-taani wa jo fi l-baab al-hadiid fi khachum al-sijin al-yamrug fi l-hille.
Wa l-baab anfakka wiheedah wa marago min al-sijin.
Wa kammalo chaariʼ waahid wa baʼad da,
al-malak khallaah.
11 Wa Butrus wiʼi khalaas wa gaal :
Hassaʼ fihimt.
Sahiih,
Allah rassal malakah achaan yinajjiini min iideen Hiruudus wa min kulla cheyy al-Yahuud dawwaro yisawwu foogi.
12 Wakit fihim al-cheyy al-bigi,
hu macha fi beet Mariyam amm Yuuhanna al-binaaduuh Markhus.
Wa muʼminiin katiiriin laammiin fi beetha achaan yisallu.
13 Wa lihig al-beet wa dagga fi l-baab al-barraani.
Wa khaddaama usumha Rawda jaat tiʼakkid yaatu fi l-baab.
14 Wa wakit irifat hiss Butrus,
firhat bilheen.
Ma fakkat al-baab wa laakin jarat farhaane wa andassat fi l-beet achaan tuguul le l-naas al-laammiin kadar Butrus gaaʼid barra fi l-baab.
15 Wa raddo leeha wa gaalo :
Inti muchootine.
Wa laakin hi akkadat leehum kalaamha.
Wa gaalo leeha :
Akuun da malak hana Butrus bas.
16 Wa Butrus gaaʼid yudugg fi l-baab lahaddi fakkooh leyah.
Wa wakit chaafooh,
ajjabo bilheen.
17 Wa Butrus sawwa leehum ichaara be iidah achaan yaskutu.
Wa ooraahum be kikkeef Allah maragah min al-sijin.
Wa gaal :
Amchu khabburu Yaakhuub* wa l-akhwaan be l-cheyy al-bigi.
Wa khalaas,
Butrus marag min al-beet wa macha bakaan aakhar.
18 Wa fi l-fajur,
al-hurraas barjalo marra waahid.
Wa gammo yassaaʼalo ambeenaathum wa gaalo :
Chunu bigi le Butrus ?
19 Wa wakit Hiruudus rassal askarah achaan yijiibu Butrus,
ma ligooh.
Wa naada al-hurraas wa saʼalaahum suʼaal katiir wa amar askarah achaan yaktuluuhum.
Baʼad da,
gamma min daar al-Yahuudiiya wa macha fi hillit Geesariiya wa sakan hinaak.
Moot Hiruudus
20 Hiruudus zaʼlaan min naas al-hillaal Suur wa Seeda.
Wa naas al-hillaal dool lammo wa astafago ambeenaathum achaan yissaamaho maʼa l-malik.
Wa jaabo fi deribhum Balaastus wa hu masʼuul hana beet al-malik.
Wa dawwaro yissaamaho maʼa l-malik achaan akil baladhum jaayi min mamlakatah.
21 Wa l-malik gataʼ leehum yoom achaan marsuuliinhum yaju giddaamah.
Wa fi l-yoom da,
Hiruudus libis lubaas hana malik wa gaʼad fi l-kursi wa kallam le l-naas.
22 Wa kulla l-naas gammo awwo wa gaalo :
Da ma hiss naadum !
Da hiss Allah !
23 Wa tawwaali ke,
waahid min malaaʼikat Allah darab Hiruudus achaan hu ma aba chakkiriin al-naas wa ma majjad Allah.
Wa duud al-batun lihigah le Hiruudus wa hu maat.