Al-sabʼa musaaʼidiin
6
Wa fi l-wakit da,
adad al-talaamiiz gaaʼid yiziid.
Wa l-naas al-yihajju kalaam yuunaani achaan rabboohum barra,
gammo yihaaruju al-naas al-yihajju kalaam ibraani.
Harajoohum achaan kulla yoom yantu musaaʼada le l-awiin al-masaakiin al-rujaalhin maytiin wa laakin ma yantuuha le l-awiin al-min barra.
2 Wa l-rusul al-atnaachar naado jamaaʼat al-talaamiiz achaan yilimmu.
Wa gaalo leehum :
Aniina al-rusul niʼallumu kalaam Allah le l-naas wa ma waajib leena nikhallu khidmitna di achaan ninazzumu al-musaaʼada.
3 Achaan da ya akhwaanna,
ikhtaaru min ambeenaatku sabʼa rujaal,
naas maʼruufiin haalhum adiile,
naas malaaniin be l-Ruuh al-Khudduus al-induhum fikir adiil wa nikallufuuhum be l-khidme di.
4 Wa laakin aniina ninkarubu fi l-sala wa fi taʼliim kalaam Allah.
5 Wa l-kalaam da ajabaahum kulluhum.
Wa ikhtaaro Istifaan wa hu muʼmin gawi malaan be l-Ruuh al-Khudduus.
Wa ikhtaaro Filibbus wa Burkhuur wa Nikanuur wa Tiimuun wa Barmaan wa Niiguula min hillit Antaakiya.
Wa Niiguula ma mawluud min al-Yahuud wa laakin dakhal fi diin al-Yahuud gubbaal ma aaman be l-Masiih.
6 Wa gaddamo al-rujaal al-sabʼa dool le l-rusul wa l-rusul saʼalo Allah leehum wa khatto iideenhum fooghum achaan yantuuhum al-masʼuuliiye.
7 Wa naas ziyaada simʼo kalaam Allah wa adad al-talaamiiz zaad fi Madiinat al-Khudus.
Wa katiiriin min rujaal al-diin aamano be Isa al-Masiih.
Al-Yahuud tahamo Istifaan
8 Wa Istifaan indah baraka chadiide min Allah wa gaaʼid yisawwi alaamaat wa ajaayib kubaar marra waahid fi ust al-naas.
9 Wa naas waahidiin min beet al-sala al-usmah beet hana al-Maʼtuugiin gammo diddah.
Wa Yahuud waahidiin min al-Khayrawaan wa min al-Iskandriiya kula lammo maʼaahum wa aakhariin min balad Kilikiiya wa balad Aasiya.
Wa gammo yikhaalutu Istifaan.
10 Wa laakin ma himlo kalaamah achaan hu gaaʼid yikallim leehum be gudrat al-Ruuh al-Khudduus wa be ilim min Allah.
11 Wa achaan da,
anto gurus le kaddaabiin waahidiin achaan yuguulu «
Simiʼna kalaam Istifaan wa hu gaal kalaam fasil foog Sayyidna Muusa wa foog Allah ».
12 Wa be l-tuhma di,
harracho al-naas wa l-chuyuukh wa l-ulama didd Istifaan.
Wa karabooh wa waddooh giddaam al-majlis.
13 Wa jaabo kaddaabiin achaan yachhado foogah be kidib.
Wa gaalo :
Al-raajil da yikallim daayman kalaam fasil foog Beet Allah wa foog al-Tawraat.
14 Wa simiʼna hu gaal Isa al-min al-Naasira yidammir Beet Allah wa yikhayyir aadaatna al-Muusa antaahum leena.
15 Wa kulla naas al-majlis gaaʼidiin yihammuru Istifaan wa chaafo wijhah yichaabih wijih hana malaaʼika.