Al-maʼduur al-ligi al-aafe
3
Wa yoom waahid,
Butrus wa Yuuhanna maachiin fi Beet Allah achaan yisallu sala hana l-saaʼa talaata.
2 Wa naadum waahid gaaʼid jamb baab hana Beet Allah al-usmah al-Baab al-Jamiil.
Wa min wildooh hu maʼduur.
Wa kulla yoom akhwaanah yiwadduuh wa yukhuttuuh hinaak achaan yachhad min al-naas al-yindasso fi Beet Allah.
3 Wa wakit hu chaaf Butrus wa Yuuhanna jaayiin yadkhulu,
hu saʼal minhum sadakha.
4 Wa wigfo wa chaafooh adiil wa Butrus gaal leyah :
Chiifna adiil.
5 Wa hu chaafaahum wa fi fikrah humman yidooru yantuuh sadakha.
6 Wa Butrus gaal :
Ma indi fudda wa ma indi dahab laakin nantiik al-cheyy al-indi.
Be usum Isa al-Masiih al-min al-Naasira,
nuguul leek gumm wa ruukh.
7 Wa Butrus karabah min iidah al-zeene wa saaʼadah le yuguum.
Wa tawwaali ke,
hu ligi gudra wa rijileenah alfartago.
8 Wa nattat foog wa gamma yuruukh wa dakhal maʼaahum fi Beet Allah.
Wa hu gaaʼid yuruukh wa yinattit wa yachkur Allah.
9 Wa kulla l-naas hinaak chaafooh raayikh wa yachkur Allah.
10 Wa irifo da bas al-maʼduur al-yachhad kulla yoom fi l-Baab al-Jamiil.
Wa ajjabo marra waahid wa astakhrabo le l-cheyy al-bigi.
11 Wa Butrus wa Yuuhanna jo fi bakaan waahid fi hooch hana Beet Allah usmah Rakuubat Suleymaan wa l-raajil gaaʼid yamsukhum wa naas katiiriin lammo fooghum wa ajjabo bilheen.
Butrus hajja le l-naas fi Beet Allah
12 Butrus chaaf kulla l-naas al-laammiin wa kallam leehum.
Hu gaal :
Ya Bani Israaʼiil,
maalku ajjabtu fi l-cheyy da ?
Wa maalku tihammuruuna ?
Fi fikirku,
al-raajil da gamma raakh be gudra haggina walla achaan aniina saalihiin ziyaada walla ?
13 Allah Rabb juduudna Ibraahiim wa Ishaakh wa Yaakhuub rafaʼ abdah* Isa wa khattah fi majdah.
Wa da bas al-naadum al-intu sallamtuuh le l-moot.
Giddaam Bilaatus nakartuuh wakit hu dawwar yatligah.
14 Intu abeetu ma dawwartu al-naadum al-saalih wa khudduus wa talabtu min al-waali hu yatlig leeku kattaal al-dimam fi badalah.
15 Wa be da,
kataltu al-naadum al-yantiiku al-haya.
Wa laakin Allah baʼasah min ust al-maytiin wa aniina chuhuud le buʼaasah.
16 Wa be sabab iimaanna be usum Isa,
al-raajil al-tichiifuuh wa l-taʼarfuuh da ligi gudra.
Wa fi chaan iimaan be Isa bas,
hu ligi al-aafe marra waahid wa kulluku chiftuuh be uyuunku.
17 Ya akhwaani,
naʼarif intu wa kubaaraatku abeetu al-Masiih achaan awwal ma iriftuuh.
18 Min zamaan,
Allah kallam leeku be waasitat kulla l-anbiya wa gaal al-Masiih yatʼab wa khalaas da bas al-cheyy al-bigi.
19 Wa hassaʼ tuubu wa gabbulu le Allah achaan hu yamha zunuubku.
20 Wa Allah yantiiku salaam fi guluubku wa yirassil leeku marra taaniye al-naadum al-ikhtaarah leeku achaan yabga al-Masiih wa hu Isa.
21 Laabudda Isa yagood fi l-sama lahaddi yoom al-Allah yisawwi kulla cheyy jadiid misil hu gaalah min zamaan be waasitat al-anbiya al-saalihiin al-rassalaahum.
22 Wa l-nabi Muusa gaal <Rabbuku Allah yabʼas leeku naadum min akhwaanku nabi misli.
Asmaʼo kalaamah wa sawwu kulla cheyy al-buguulah leeku.
23 Wa ayyi naadum al-ma yasmaʼ kalaamah,
yaturduuh min chaʼab Allah wa yahlak>.
24 Be misil da,
kulla l-anbiya hajjo be wakitna da,
min al-nabi Samuwiil wa kulla l-anbiya al-jo waraayah.
25 Wa intu iyaal al-anbiya dool wa warastu kalaamhum.
Wa intu ahal al-muʼaahada al-Rabbuku Allah sawwaaha maʼa juduudku wakit hu gaal le Ibraahiim <Be zurriiytak bas nibaarik kulla l-umam fi kulla l-ard>.
26 Wa Allah baʼas abdah Isa fi chaanku wa rassalah leeku intu awwal,
gubbaal al-umam al-aakhariin achaan yibaarikku wa yigabbil ayyi waahid min al-derib al-fasil.