Al-maʼduur fi birkit Beet Hisda
5
Wa baʼad da,
iid aakhar hana l-Yahuud garrab wa Isa macha fi Madiinat al-Khudus.
2 Wa fi birke waahide gaaʼide fi Madiinat al-Khudus gariib le Baab al-Khanam wa usumha be kalaam ibraani Beet Hisda.
Wa fiyah khamsa rawaakiib jamb al-birke.
3-4 Wa maʼduuriin katiiriin raagdiin foog al-rawaakiib,
minhum al-amyaaniin wa l-uruj wa l-mukarsahiin*.
5 Wa naadum waahid gaaʼid fi l-bakaan da wa min tamaane wa talaatiin sana hu maʼduur.
6 Wa Isa chaafah raagid fi l-bakaan da wa irif kadar hu tawwal taʼbaan.
Wa Isa saʼalah wa gaal :
Tidoor talga al-aafe walla ?
7 Al-maʼduur radda leyah wa gaal :
Al-sayyid,
ma indi naadum maʼaayi achaan yidissini fi l-almi wakit al-almi gaaʼid yiharrik.
Wakit nidoor nindass fi l-almi naadum aakhar yindass giddaami.
8 Wa Isa gaal leyah :
Gumm.
Chiil birchak wa amchi.
9 Wa tawwaali ke,
al-naadum ligi al-aafe.
Wa galla birchah wa gamma raakh.
Wa l-yoom da yoom al-sabit.
10 Wa kubaaraat al-Yahuud hajjo le l-naadum al-ligi al-aafe wa gaalo :
Al-yoom da yoom al-raaha.
Wa inta chaayil birchak wa da mamnuuʼ.
11 Wa hu radda leehum wa gaal :
Al-naadum al-daawaani gaal leyi chiil birchak wa amchi.
12 Wa saʼalooh wa gaalo :
Yaatu al-naadum al-gaal leek chiil birchak wa amchi ?
13 Wa laakin al-naadum ma irif yaatu al-daawaah achaan Isa gamma minnah ajala ke wa macha fi ust al-naas al-katiiriin gaaʼidiin fi l-bakaan.
14 Wa baʼadeen,
Isa ligiih fi hooch hana Beet Allah.
Wa hajja leyah wa gaal :
Khalaas,
inta ligiit al-aafe.
Khalli minnak zunuubak achaan cheyy gaasi min da ma yaji foogak.
15 Wa l-naadum macha le kubaaraat al-Yahuud wa ooraahum al-naadum al-daawaah hu Isa.
16 Wa min al yoom da,
al-Yahuud gammo khaalafo Isa achaan hu gaaʼid yisawwi amal misil da fi yoom al-sabit.
Ibn Allah indah al-haya
17 Wa Isa hajja le l-Yahuud wa gaal :
Lahaddi l-yoom,
Abuui Allah gaaʼid yakhdim wa ana kula gaaʼid nakhdim.
18 Wa l-Yahuud ziʼilo minnah wa dawwaro yaktuluuh achaan hu yikhaalif churuut hana yoom al-sabit wa bigo zaʼlaaniin minnah ziyaada achaan hu gaal Allah abuuh wa be da,
hu sawwa nafsah misil Allah.
19 Wa Isa hajja leehum wa gaal :
Asmaʼo,
nuguul leeku al-hagg,
Ibn Allah ma yagdar yisawwi cheyy be nafsah.
Hu ma yisawwi cheyy illa l-cheyy al-yichiif Abuuh gaaʼid yisawwiih.
Wa be misil da,
ayyi cheyy al-Allah gaaʼid yisawwiih,
Ibnah kula yisawwiih.
20 Wa Allah yihibbah le Ibnah wa gaaʼid yiwassif leyah kulla cheyy al-hu gaaʼid yisawwiih.
Wa yanti leyah ajaayib kubaar min al-ajaayib dool achaan intu tiʼajjubu bilheen.
21 Wa Abuui Allah yabʼas al-maytiin wa yantiihum al-haya wa Ibnah kula yanti al-haya le ayyi naadum al-yidoor yantiiha leyah.
22 Wa Abuui Allah ma yihaasib ayyi naadum laakin hu kallaf Ibnah be l-hisaab kulla ke
23 achaan kulla l-naas yikarrumu Ibn Allah misil yikarrumu Allah.
Wa l-naadum al-ma yikarrim Ibn Allah ma yikarrim Allah al-rassalah.
24 Asmaʼo,
nuguul leeku al-hagg,
ayyi naadum al-yasmaʼ kalaami wa yiʼaamin be Allah al-rassalaani,
al-naadum da ligi al-haya al-abadiiye.
Hu ma yadkhul fi l-ikhaab laakin hu marag min al-moot wa dakhal fi l-haya khalaas.
25 Asmaʼo,
nuguul leeku al-hagg,
wakit waahid baji wa khalaas ja.
Wa fi l-wakit da,
al-maytiin yasmaʼo hiss hana Ibn Allah wa kan simʼooh yahyo.
26 Allah indah al-haya wa anta izin le Ibnah achaan Ibnah kula indah al-haya mislah.
27 Wa Allah antaah izin le yihaasib al-naas achaan hu Ibn al-Insaan.
28 Ma tiʼajjubu fi l-kalaam da.
Yoom waahid baji wa fi l-yoom da,
kulla l-naas al-gaaʼidiin fi khubuurhum yasmaʼo hiss hana Ibn Allah
29 wa yamurgu.
Wa l-naas al-sawwo al-kheer yabʼaso le yadkhulu fi l-haya wa laakin al-naas al-sawwo al-charr yabʼaso le yadkhulu fi l-ikhaab.
30 Ana wiheedi ma nagdar nisawwi cheyy.
Ana nasmaʼ kalaam Abuui wa ale hasab kalaamah bas,
nihaasib al-naas.
Wa nihaasibhum be adaala achaan ma nisawwi cheyy hasab fikri ana bas.
Laakin nidoor nisawwi daayman al-cheyy al-yidoorah Allah al-rassalaani.
Chahaadat Allah le l-Masiih
31 Wa Isa gaal :
Kan ana wiheedi bas chaahid le nafsi,
chahaadti di ma tanfaʼ.
32 Fi chaahid aakhar wa hu yachhad leyi wa ana irift chahaadtah leyi sahiihe.
33 Intu rassaltu naas achaan yasʼalo Yahya wa hu radda leeku be chahaada sahiihe.
34 Ana ma nidoor chahaada insaaniiye laakin hajjeet be chahaadat Yahya achaan nidoor kadar intu tanjo.
35 Yahya hu bigi leeku misil faanuus muwalliʼ be nuur chadiid wa haami.
Wa mudda gisayre bas,
intu firihtu be nuurah.
36 Laakin fi chaahid aakhar yachhad leyi wa chahadtah akbar min chahaadat Yahya.
Al-aʼmaal al-Abuui Allah antaahum leyi wa ana gaaʼid nisawwiihum lahaddi nikammilhum,
dool bas yachhado leyi achaan taʼarfu be l-sahiih Allah rassalaani.
37 Wa Abuui Allah al-rassalaani hu zaatah chahad leyi.
Hissah intu abadan ma simiʼtuuh wa suurtah abadan ma chiftuuha
38 wa kalaamah ma gaaʼid fi guluubku achaan ma aamantu be l-naadum al-Allah rassalah.
39 Fi fikirku,
talgo al-haya al-abadiiye fi l-Kitaab wa achaan da,
intu tagruuh ziyaada.
Laakin al-Kitaab yachhad leyi ana
40 wa intu taabo ma taju leyi achaan talgo minni al-haya.
41 Ma nidoor chukur min al-naas.
42 Laakin intu,
ana naʼarif kadar fi guluubku ma tihibbu Allah.
43 Ana jiit leeku be usum Allah Abuui wa laakin ma khibiltuuni.
Kan naadum aakhar baji be usmah halaalah,
hu bas takhbalooh.
44 Kikkeef tabgo muʼminiin be l-sahiih kan intu tidooru chukur min akhwaanku wa ma tijaahudu achaan talgo chukur min Allah al-Waahid ?
45 Ma tukhuttu fi uguulku kadar ana al-naadum al-yathamku giddaam Allah.
Al-nabi Muusa bas al-yathamku wa hu al-naadum al-intu tukhuttu achamku foogah.
46 Wa kan be l-sahiih intu muʼminiin be Muusa,
tiʼaamunu beyi ana kula achaan Muusa katab fi sababi fi l-Kitaab.
47 Laakin kan awwal ma saddakhtu be l-kalaam al-Muusa katabah,
kikkeef tisaddukhu be kalaami ?