Al-mara al-Saamiriye
4
Al-Fariisiyiin simʼo kadar naas gaaʼidiin yabgo talaamiiz hana Isa wa Isa gaaʼid yikhattis naas ziyaada min Yahya.
Wa Isa irif humman simʼo al-khabar da.
2 Wa laakin be sahiih,
Isa zaatah ma yikhattis al-naas,
illa talaamiizah yikhattusu be iznah.
3 Wa achaan da,
hu gamma min daar al-Yahuudiiya wa chaal derib hana daar al-Jaliil.
4 Wa laazim yuchugg daar al-Saamira.
5 Wa ja le hille Saamiriye usumha Suukhaar wa hi gariib le l-zereʼ al-Yaakhuub antaah le wileedah Yuusuf.
6 Wa da bakaan hana biir Yaakhuub.
Wa Isa iyi min al-safar wa gaʼad tihit jamb al-biir yinjamma.
Wa l-harraay gaayle khalaas.
7 Wa mara Saamiriye jaat achaan tichiil almi min al-biir.
Wa Isa hajja leeha wa gaal :
Antiini almi nachrab.
8 Wa talaamiizah ma fiihum.
Humman faato fi l-hille achaan yachru leehum akil.
9 Wa l-Saamiriye raddat leyah wa gaalat :
Haay ?
Inta Yahuudi wa ana Saamiriye.
Kikkeef tasʼal minni almi tachrab ?
Wa gaalat al-kalaam da achaan al-Yahuud abadan ma yisallumu al-Saamiriyiin wa ma yaakulu maʼaahum.
10 Wa Isa radda leeha wa gaal :
Kan awwal irifti barakat Allah wa yaatu al-naadum al-gaaʼid yasʼalki almi,
inti tasʼaliih wa hu yantiiki almi al-haya.
11 Wa hi gaalat :
Ya l-sayyid,
ma indak dalu wa l-biir tawiile.
Almi al-haya tamurgah min ween ?
12 Jiddina Yaakhuub antaana al-biir di wa hu zaatah chirib minha almi maʼa awlaadah wa maalhum.
Fi fikrak,
inta akbar min Sayyidna Yaakhuub walla ?
13 Wa Isa radda leeha wa gaal :
Ayyi naadum al-yachrab min almi hana l-biir di battaan al-atach yisawwiih.
14 Laakin ayyi naadum al-yachrab min al-almi al-ana nantiih abadan ke al-atach ma yakurbah.
Al-almi al-ana nantiih yabga fi galbah een hana almi jaari wa yantiih al-haya al-abadiiye.
15 Wa l-mara gaalat leyah :
Ya l-sayyid,
antiini min almiik da achaan al-atach ma yakrubni wa khalaas ma naji hini battaan nichiil almi.
16 Wa Isa gaal leeha :
Amchi naadi abu iyaalki wa taʼaali hini maʼaayah.
17 Wa l-mara gaalat :
Ma indi raajil.
Wa Isa radda leeha gaal :
Kalaamki sahiih,
ma indiki raajil.
18 Akhadti khamsa rujaal wa hassaʼ al-raajil al-inti gaaʼide maʼaayah ma raajilki.
Gulti leyi kalaam sahiih.
19 Wa l-mara gaalat :
Ya l-sayyid,
hassaʼ bas ana irift inta nabi.
20 Juduudna abado Allah fi l-jabal da.
Wa laakin intu al-Yahuud tuguulu Madiinat al-Khudus wiheedha al-bakaan al-foogah al-naas waajib yaʼabudu Allah.
21 Wa Isa gaal leeha :
Mara zeene,
saddikhi kalaami.
Fi l-wakit al-baji gariib,
intu taʼabudu Allah ma fi l-hajar da wa la fi Madiinat al-Khudus.
22 Intu gaaʼidiin taʼabudu Allah wa laakin ma taʼarfuuh.
Aniina naʼabudu Allah wa naʼarfuuh achaan al-naja jaaye be waasitat al-Yahuud.
23 Wa laakin wakit jadiid baji wa l-wakit da khalaas bada.
Wa fi l-wakit da,
al-naas al-yaʼabudu Allah ibaada sahiihe,
humman al-naas al-Ruuh Allah yuguudhum fi l-hagg.
Achaan di bas al-ibaada al-Allah Abuuhum yidoorha.
24 Allah siid al-haya wa l-ruuh.
Wa ibaadat al-naas ma sahiihe illa kan Ruuh Allah yuguudhum fi l-hagg.
25 Wa l-mara gaalat leyah :
Ana naʼarif kadar naadum waahid baji al-binaaduuh al-Masiih.
Wa wakit hu baji hu yifassir leena kulla cheyy.
26 Wa Isa gaal leeha :
Ana al-nihajji leeki,
ana bas hu.
Al-Saamiriyiin aamano
27 Wa fi l-wakit da bas,
talaamiizah gabbalo.
Wa chaafo Isa gaaʼid yihajji maʼa mara wa ajjabo bilheen.
Wa gaalo fi fikirhum :
Hu bidoor chunu ?
Wa maala bihajji maʼaaha ?
Wa laakin ma fi naadum saʼalah min cheyy.
28 Wa l-mara gammat wa khallat jarraha fi khachum al-biir wa machat fi l-hille daakhal.
Wa hajjat le l-naas wa gaalat :
29 Taʼaalu,
chiifu al-naadum al-ooraani be ayyi cheyy al-ana sawweetah.
Da bas al-Masiih walla ?
30 Wa naas al-hille gammo achaan yamurgu yilaaguuh.
31 Wa wakit al-mara gaaʼide tihajji le l-naas fi l-hille,
talaamiiz hana Isa gaaʼidiin yihannusuuh wa yuguulu :
Sayyidna,
aakul.
32 Wa laakin Isa radda leehum wa gaal :
Ana akalt akil intu ma taʼarfuuh.
33 Wa l-talaamiiz assaaʼalo ambeenaathum wa gaalo :
Naadum aakhar antaah akil walla ?
34 Wa Isa gaal :
Al-rassalaani kallafaani be khidme wa waajib nikammilha.
Wa kan nisawwi al-cheyy al-yidoorah,
da yabga leyi misil akalt akil khalaas.
35 Ma taʼarfu al-masal al-buguul «
Arbaʼa chuhuur wa baʼad da bas al-gatiʼ »
?
Ana nuguul leeku,
fukku uyuunku wa chiifu al-ziraaʼa.
Al-khalla nijdat khalaas wa wakit al-gatiʼ ja.
36 Hassaʼ hassaʼ al-khaddaam al-yagtaʼ al-khalla yalga ujurtah wa yilimm al-khalla wa yakhzinha le l-aakhira.
Wa be misil da,
al-naadum al-yiteerib wa l-naadum al-yagtaʼ yafraho sawa.
37 Fiyah masal waahid buguul «
naadum waahid yiteerib wa naadum aakhar yagtaʼ ».
Wa fi bakaanna,
al-kalaam da sahiih.
38 Ana rassaltuku fi ust al-naas misil al-khaddaamiin al-yagtaʼo zereʼ wa tagtaʼo fi bakaan intu ma harattu foogah.
Naas aakhariin harato wa intu talgo faayde min khidmithum.
39 Wa fi l-hille di,
Saamiriyiin katiiriin aamano be Isa achaan simʼo kalaam al-mara wakit hi chahadat leyah wa gaalat «
Hu ooraani be ayyi cheyy al-ana sawweetah ».
40 Achaan da,
al-Saamiriyiin jo talabo minnah hu yagood fi l-hillithum.
Wa hu gaʼad maʼaahum yoomeen.
41 Wa naas ziyaada aamano beyah achaan simʼo kalaamah.
42 Wa hajjo le l-mara wa gaalo :
Aniina ma muʼminiin achaan simiʼna kalaamki bas.
Aniina zaatna simiʼna kalaamah wa naʼarfu hu bas al-naadum al-yinajji kulla naas.
Wileed al-wakiil
43 Wa baʼad al-yoomeen dool,
Isa gamma macha fi daar al-Jaliil.
44 Wa Isa awwal oora talaamiizah wa gaal :
Kulla l-naas yikarrumu al-nabi illa naas daarah ma yikarrumuuh.
45 Wa ja fi daar al-Jaliil wa naas al-Jaliil firho be jaytah achaan chaafo kulla cheyy al-sawwaah fi Madiinat al-Khudus fi ayyaam al-iid.
Naas al-Jaliil kula macho ayyado fi Madiinat al-Khudus.
46 Wa Isa macha battaan fi hillit Kaana.
Da al-bakaan al-sawwa foogah khamar min almi.
Wa naadum waahid gaaʼid fi hillit Kafar Naahuum wa hu waahid min wukaalat al-malik wa wileedah mardaan.
47 Wa wakit simiʼ kadar Isa gabbal fi daar al-Jaliil min daar al-Yahuudiiya,
hu gamma macha leyah wa chahadah achaan yamchi maʼaayah wa yidaawi leyah wileedah al-yidoor gariib yumuut.
48 Wa Isa gaal leyah :
Intu ma tiʼaamunu illa kan tichiifu ajaayib wa alaamaat min Allah.
49 Wa wakiil al-malik radda leyah wa gaal :
Ya sayyidna,
taʼaal.
Kan ma taji ajala,
wileedi yumuut.
50 Wa Isa radda leyah wa gaal :
Amchi beetak.
Wileedak bahya.
Wa l-naadum aaman be kalaam Isa wa chaal derbah wa gabbal fi beetah.
51 Wa wakit hu lissaaʼ maachi fi l-derib,
khaddaamiinah gammo laagooh wa gaalo leyah :
Wileedak hayy.
52 Wa saʼalaahum wa gaal :
Min al-saaʼa kam bigi leyah akheer ?
Wa gaalo :
Min amis al-saaʼa waahid,
al-wirde khallatah.