Injiil al-Masiih
Al-juzu al-Luukha katabah
1
Akiid naas katiiriin dawwaro yisajjulu taariikh hana l-achya al-bigo fi usutna
2 wa gammo yaktubu al-kalaam al-ligiinaah min al-naas al-min al-awwal humman chuhuud le kalaam Allah wa khaddaamiinah.
3 Wa min al-bidaaya ana kula gaaʼid nukhutt baali fi kulla l-kalaam da achaan naʼarfah akheer.
Wa khalaas,
ya al-sayyid Saawufiilus* al-muhtaram,
ana chilt niiye achaan nisajjil taariikh hana l-achya al-bigo wa naktibah leek be nizaam adiil.
4 Wa naktibah leek achaan taʼarif kadar kulla cheyy al-oorook beyah akiid sahiih.
Al-malak Jibriil baan le Zakariiya
5 Fi wakit al-malik Hiruudus gaaʼid yahkim fi Daar al-Yahuudiiya,
fi naadum waahid usmah Zakariiya wa hu min rujaal al-diin wa min firgithum al-usumha Abiiya.
Wa martah kula min zurriiyit Haaruun wa usumha Alisaabaat.
6 Wa humman saalihiin giddaam Allah wa gaaʼidiin yitabbugu kulla wasaaya wa churuut Allah wa ma induhum khata.
7 Wa laakin ma induhum iyaal achaan Alisaabaat aagre wa battaan ajjazat wa raajilha kula chayyab.
8 Wa yoom waahid,
ja door hana naas firgit Abiiya achaan yichiilu masʼuuliiye fi l-ibaada wa Zakariiya gaaʼid yakhdim le Allah maʼaahum.
9 Wa fi aadit rujaal al-diin,
yisawwu amʼiyeedaat achaan yikhtaaro yaatu minhum al-yadkhul daakhal fi Beet Allah achaan yigaddim leyah al-bakhuur.
Wa khalaas wagaʼat fi Zakariiya achaan hu bas yadkhul.
10 Wa naas katiiriin laammiin barra wa kulluhum gaaʼidiin yisallu fi wakit hana gaddimiin al-bakhuur.
11 Wa waahid min malaaʼikat Allah baan le Zakariiya.
Wa hu chaaf al-malak waagif jamb al-bakaan al-yigaddumu foogah al-bakhuur fi nussah al-zeenaay.
12 Wa Zakariiya barjal bilheen wakit chaafah wa khoof sawwaah marra waahid.
13 Wa l-malak gaal leyah :
Ya Zakariiya,
ma takhaaf.
Allah simiʼ duʼaak.
Wa martak Alisaabaat talda leek wileed wa tisammiih Yahya.
14 Wa fi chaan al-wileed da,
tabga farhaan wa mabsuut bilheen wa naas katiiriin yafraho be waaluudtah.
15 Wa hu yabga naadum aziim giddaam Allah wa abadan ma yachrab mariise wa la ayyi charaab al-yisakkir al-naas.
Wa hu yabga malaan be l-Ruuh al-Khudduus min hu lissaaʼ gaaʼid fi batun ammah.
16 Wa naas katiiriin min Bani Israaʼiil yasmaʼo kalaamah wa yigabbulu fi derib Rabbuhum Allah.
17 Wa yigaddim giddaam Allah be gudrat al-Ruuh al-Khudduus sawa sawa misil al-nabi Iliyaas.
Wa hu yisawwi suluh ambeen al-abbahaat wa iyaalhum wa leechaan al-aasiyiin yutuubu wa yitaabuʼu fikir al-saalihiin.
Wa yijahhiz al-chaʼab le Allah.
18 Wa Zakariiya hajja le l-malak wa gaal :
Kikkeef naʼarif da yabga ?
Ana chaayib wa marti kula ajuuz.
19 Wa l-malak radda leyah wa gaal :
Ana Jibriil al-waagif giddaam Allah achaan nisawwi muraadaatah.
Wa hu rassalaani achaan nikallim leek wa niballikh leek al-bichaara di.
20 Wa khalaas inta tabga abkam wa ma tihajji lahaddi kulla cheyy al-gultah leek yitimm achaan inta ma saddakht be kalaami al-akiid yabga fi waktah.
21 Wa l-naas gaaʼidiin yarjo Zakariiya yamrug min Beet Allah wa ajjabo bilheen achaan hu akhkhar.
22 Wa wakit hu marag khalaas,
ma gidir yihajji leehum.
Wa fihmo kadar hu chaaf ruʼya fi Beet Allah.
Wa gaaʼid yihajji leehum be wasif achaan hu bigi abkam.
23 Wa baʼadeen door hana khidimtah kammal khalaas wa hu gabbal fi beetah.
24 Wa baʼad da,
martah Alisaabaat bigat khalbaane.
Wa fi muddit khamsa chuhuur,
hi ma maragat min al-beet.
Wa gaalat :
25 Al-cheyy da,
Allah bas sawwaah leyi.
Fi l-ayyaam dool hu antaani niʼma wa l-eeb al-gaaʼid foogi giddaam al-naas hu rafaʼah minni.
Al-malak Jibriil baan le Mariyam
26 Wa wakit Alisaabaat indaha khalaba hana sitte chuhuur,
Allah rassal al-malak Jibriil le hille waahide fi Daar al-Jaliil usumha al-Naasira.
27 Wa rassalah le bineeye waahide usumha Mariyam.
Wa raajil waahid min khachum beet Dawuud karab raasha wa hu usmah Yuusuf.
Wa hi bineeye al-ma chaafat raajil.
28 Wa l-malak Jibriil macha leeha wa gaal :
Al-salaam aleeki,
inti al-barakat Allah nazalat foogki.
Al-Rabb gaaʼid maʼaaki.
29 Wa kalaamah barjalaaha bilheen wa saʼalat nafisha chunu maʼana al-kalaam da.
30 Wa l-malak Jibriil gaal leeha :
Ya Mariyam,
ma takhaafi.
Allah ridi minki.
31 Wa khalaas inti tabge khalbaane wa talde wileed wa tisammiih Isa.
32 Wa hu yabga aziim wa yinaaduuh Ibn Allah al-Aali.
Wa Rabbina Allah yukhuttah fi kursi al-malik Dawuud al-hu min juduudah.
33 Wa yahkim fi beet Yaakhuub* ila l-abad wa mamlakatah abadan ma tikammil.
34 Wa Mariyam gaalat le l-malak Jibriil :
Kikkeef da yabga ?
Ana ma chift raajil.
35 Wa l-malak Jibriil gaal leeha :
Al-Ruuh al-Khudduus yaji leeki wa gudrat Allah al-Aali tanzil foogki wa achaan da,
al-wileed al-taldeeh yukuun khaass le Allah wa yinaaduuh Ibn Allah.
36 Wa fakkiri fi akhutki Alisaabaat al-ajuuz.
Indaha khalaba hana sitte chuhuur wa talda wileed wa di hi al-awwal gaalo foogha hi aagre.
37 Akiid ma fi cheyy gaasi le Allah.
38 Wa Mariyam gaalat :
Khalaas,
ana khaadimat Allah.
Khalli yabga leyi misil inta gultah.
Wa l-malak Jibriil khallaaha wa faat.
Mariyam machat zaarat Alisaabaat
39 Wa baʼad da,
Mariyam gammat wa machat ajala fi hille waahide al-gaaʼide fi hujaar hana Daar al-Yahuudiiya
40 wa dakhalat fi beet Zakariiya wa sallamat Alisaabaat.
41 Wa wakit Alisaabaat simʼat salaam hana Mariyam,
al-sakhiir al-fi batunha alharrak wa Alisaabaat anmalat be l-Ruuh al-Khudduus.
42 Wa naadat be hiss aali wa gaalat :
Min kulla l-awiin inti bas barakat Allah nazalat foogki ziyaada wa l-sakhiir al-gaaʼid fi batunki kula mubaarak.
43 Wa kikkeef Allah antaani niʼma kabiire misil di lahaddi amm Rabbi taji tisallimni ?
44 Akiid,
al-sakhiir al-fi batni alharrak min al-farah wakit ana simiʼt salaamki.
45 Mabruuk leeki achaan kalaam Allah ja leeki wa inti saddakhti kadar akiid yitimm.
Mariyam majjadat Allah
46 Wa Mariyam gaalat :
Nimajjid Allah be kulla galbi
47 wa nafrah bilheen be Allah al-yinajjiini.
48 Wa nafrah achaan hu fakkar foogi ana khaddaamtah al-miskiine.
Wa akiid kulla l-naas yinaaduuni al-mabruuka min al-yoom wa giddaam.
49 Wa Allah al-Gaadir sawwa leyi cheyy aziim.
Wa Allah bas al-Khudduus.
50 Rahmatah daayman kabiire le kulla l-naas al-khaayfiin minnah min zurriiye le zurriiye.
51 Hu bayyan gudurtah wa chattat al-mustakbiriin maʼa kulla afkaarhum.
52 Wa dalla muluuk gawiiyiin min karaasiihum wa rafaʼ al-masaakiin.
53 Wa l-jiiʼaaniin mala batunhum be akil sameh wa l-khaniyiin taradaahum iideenhum yaabsiin.
54 Hu saaʼad abiidah Bani Israaʼiil wa ma nisi al-rahma al-gaal yisawwiiha leehum.
55 Wa di al-rahma al-hajja beeha le juduudna al-tabga le Ibraahiim wa iyaalah ila l-abad.
56 Wa Mariyam gaʼadat maʼa Alisaabaat gariib talaata chuhuur wa baʼad da gabbalat fi beetha.
Waaluudat al-nabi Yahya
57 Wa wakit Alisaabaat chuhuurha hana l-waaluuda tammo,
hi wildat wileed.
58 Wa jiiraanha wa akhwaanha simʼo kadar Allah rahamaaha be rahma kabiire wa firho maʼaaha.
59 Wa fi yoom al-taamin lammo achaan yitahhuru al-wileed.
Wa dawwaro yisammuuh Zakariiya misil abuuh.
60 Wa ammah gaalat :
La,
la.
Ma ke.
Usmah yabga Yahya.
61 Wa gaalo leeha :
Da ke ma usum hana ayyi naadum min akhwaanki.
62 Wa hajjo le abuuh be wasif achaan yasʼalooh al-usum al-yidoorah le l-wileed.
63 Wa hu talab minhum looh wa katab foogah :
Usmah Yahya.
Wa kulluhum alʼajjabo.
64 Wa ajala ke khachmah anfakka wa lisaanah anhalla wa bada yihajji wa yachkur Allah.
65 Wa l-khoof dakhal fi kulla jiiraanhum.
Wa kulla l-naas fi hujaar hana daar al-Yahuudiiya gammo yihajju ambeenaathum be l-cheyy al-bigi da.
66 Wa kulla l-naas al-simʼo be l-kalaam da fakkaro foogah wa saʼalo fi guluubhum wa gaalo :
Al-wileed da baʼadeen yabga chunu ?
Wa Allah maʼaayah wa gaaʼid yisaaʼidah.
Chukur Zakariiya le Allah
67 Wa Zakariiya abu Yahya anmala be l-Ruuh al-Khudduus wa kallam kalaam jaayi min Allah.
Wa gaal :
68 Al-hamdulillah Rabb hana Bani Israaʼiil achaan hu anta niʼma le chaʼabah wa fadaahum.
69 Hu rassal leena naadum gaadir min zurriiyit abdah al-Malik Dawuud achaan yinajjiina.
70 Wa da bas al-cheyy al-kallam beyah min zamaan be khachum al-anbiya al-saalihiin al-rassalaahum.
71 Hu yinajjiina min udwaanah wa min gudrat kulla l-naas al-yakrahoona.
72 Wa misil da,
hu raham juduudna wa sawwa al-cheyy al-gaalah fi muʼaahadtah al-mukhaddasa al-sawwaaha leehum.
73 Wa da al-cheyy al-Allah akhsam beyah le abuuna Ibraahiim.
74 Hu gaal hu yinajjiina min gudrat udwaanah achaan naʼabuduuh bala khoof
75 wa nitaabuʼu derbah be haal taybe wa saalhe fi kulla ayyaam hayaatna.
76 Wa inta,
ya wileedi,
tabga nabi hana Allah al-Aali achaan tigaddim giddaam Allah wa tijahhiz leyah al-derib.
77 Wa inta tiʼallim chaʼabah kikkeef Allah yinajjiihum be khufraan zunuubhum.
78 Wa Rabbina Allah hanuun wa yirayyisna be rahmatah.
Wa achaan da,
nuur Allah yugumm yidaawi foogna min al-sama
79 achaan yinawwir le l-naas al-gaaʼidiin fi l-dalaam wa l-khaayfiin min al-moot wa khalaas yuguudna fi derib al-salaam.
80 Wa l-wileed kibir wa galbah bigi saabit.
Wa hu aayich fi l-khala lahaddi bada yisawwi khidimtah giddaam Bani Israaʼiil.