Beet Allah yikharrubuuh
13
Wa wakit Isa maarig min Beet Allah,
naadum waahid min talaamiizah hajja leyah wa gaal :
Sayyidna,
Beet Allah ajiib !
Chiif al-hujaar dool.
Chiif buyuutah dool.
2 Wa Isa gaal :
Chift kulla l-buyuut al-kubaar dool ?
Ma yikhallu hajar yagood foog hajar.
Yarmuuhum kulla ke.
3 Wakit Isa gaaʼid wiheedah fi Jabal al-Zaytuun mugaabil Beet Allah,
Butrus wa Yaakhuub wa Yuuhanna wa Andareeyas macho leyah.
Wa saʼalooh
4 wa gaalo :
Ooriina da yabga mata ?
Wa chunu al-alaama al-tiwassif kadar kulla l-kalaam da yitimm ?
5 Wa Isa gamma yihajji leehum wa gaal :
Awʼu baalku.
Ma tikhallu naadum yukhuchchuku.
6 Naas katiiriin baju be usmi wa buguulu fi nufuushum «
Ana bas al-Masiih ».
Wa yukhuchchu naas katiiriin.
7 Wa wakit tasmaʼo khabar hana duwaas gariib wa duwaas baʼiid,
ma tibarjulu achaan da kulla ke laabudda yabga wa laakin da lissaaʼ ma kumaalit al-dunya.
8 Naas hana balad waahide yahjumu naas hana balad aakhara wa mamlaka tahjim mamlaka.
Wa fi diyaar katiiriin yukuun zilzaal.
Juuʼ katiir yanzil fi l-ard.
Wa laakin al-taʼab da al-bidaaya bas.
Hu misil al-talaga al-awwalaaniiye le l-mara al-khalbaane.
9 Wa intu,
awʼu baalku.
Akiid yakurbuuku wa yiwadduuku le l-chariiʼa wa yafurchuuku fi buyuut al-sala.
Wa fi chaani ana,
tahdaro giddaam al-hukkaam wa l-salaatiin wa fi l-bakaan da,
tachhado leyi.
10 Wa awwal cheyy,
laabudda al-bichaara yiballukhuuha le kulla l-umam.
11 Wa wakit yakurbuuku wa yiwadduuku le l-chariiʼa,
ma tihimmu le l-kalaam al-tuguuluuh.
Fi l-bakaan da,
guulu al-kalaam al-yaji leeku achaan al-kalaam al-tuguulu yaji min al-Ruuh al-Khudduus wa ma min nufuusku.
12 Wa fi l-wakit al-jaayi da,
naadum yisallim akhuuh le l-moot wa abu iyaal yisallim wileedah wa l-iyaal yabgo aasiyiin le waaldeenhum wa yaktuluuhum kula.
13 Wa fi chaani ana,
kulla l-naas yakrahooku.
Wa laakin al-naadum al-gaaʼid saabit lahaddi l-kumaale,
yanja.
14 Wa wakit tichiifu al-cheyy al-haraam al-bijiib al-kharaab waagif fi l-bakaan al-abadan ma waajib leyah (khalli al-naadum al-yagri al-kalaam da yafhamah),
fi l-wakit daak khalli al-naas al-gaaʼidiin fi daar al-Yahuudiiya yajru fi l-hujaar.
15 Wa ayyi naadum al-gaaʼid yinjamma fi raas beetah,
khalli yidalli wa yajri wa ma yadkhul fi beetah yichiil khumaamah.
16 Wa ayyi naadum al-gaaʼid fi l-zereʼ,
khalli yajri wa ma yigabbil yichiil khalagah.
17 Yabga gaasi marra waahid le l-awiin al-khalbaanaat wa l-awiin al-yiraddiʼan.
18 Asʼalo Allah achaan da ma yabga fi l-chite.
19 Achaan fi l-wakit daak,
al-taʼab yabga chadiid bilheen.
Wa ma fi taʼab mislah min Allah khalag al-ard lahaddi l-yoom.
Wa taʼab chadiid misil da abadan ma yabga battaan.
20 Wa kan Allah ma nagas adad ayyaam al-taʼab da,
naadum waahid ma yanja.
Wa laakin Allah fakkar fi naasah al-ikhtaaraahum wa fi chaanhum hu nagas adad ayyaam al-taʼab da.
Jayyit al-Masiih al-taaniye
21 Wa fi l-wakit daak,
kan naadum buguul leeku «
Chiifu !
Al-Masiih hini »
walla «
Chiifu !
Al-Masiih hinaak »,
ma tisaddugu kalaamah.
22 Achaan naas katiiriin baju wa buguulu humman al-Masiih walla buguulu be kidib humman anbiya.
Wa yisawwu alaamaat wa ajaayib achaan yukhuchchuuhum,
kan da mumkin,
le l-naas al-Allah ikhtaaraahum.
23 Aywa,
awʼu baalku.
Ana ooreetku be kulla l-kalaam da gubbaal ma bigi.
24 Wa fi l-wakit al-yaji baʼad al-taʼab al-chadiid daak,
al-harraay tabga zarga wa l-gamar ma yidaawi
25 wa l-nujuum yagaʼo min al-sama wa khuwwaat al-samaawaat yinhazzo.
26 Wa fi l-wakit daak,
yichiifu Ibn al-Insaan raakib fi l-sahaab jaayi be gudra aziime wa majiide.
27 Wa yirassil malaaʼikatah fi ayyi jiihe achaan yilimmu al-naas al-ikhtaaraahum min ayyi bakaan fi l-ard al-gaaʼid tihit al-sama.
Alaamit chadarat al-tiin
28 Wa fakkuru fi chadarat al-tiin* wa chiilu al-masal.
Kan furuuʼha yidooru yikhadduru wa l-warchaal al-awwal yamrug,
taʼarfu al-wakit al-talda foogah garrab.
29 Wa sawa sawa misil da,
wakit tichiifu kulla cheyy al-ooreetku beyah gaaʼid yabga,
taʼarfu hu yidoor yaji gariib.
30 Wa nuguul leeku al-hagg,
naas hana l-wakit da ma yikammulu lahaddi kulla ke yitimm.
31 Al-sama wa l-ard yabgo ma fiihum wa laakin kalaami yagood daayman.
Al-yoom al-ma maʼruuf
32 Wa l-cheyy al-yabga baʼadeen da,
naadum waahid ma yaʼarif yoomah wa la saaʼatah.
Al-malaaʼika fi l-samaawaat kula ma baʼarfuuh wa Ibn Allah ma baʼarfah,
illa abuuh wiheedah bas baʼarfah.
33 Awʼu baalku.
Agoodu waaʼiyiin achaan intu ma taʼarfu mata waktah yitimm.
34 Aywa,
da yabga misil naadum waahid al-yidoor yisaafir.
Wa gubbaal ma gamma min beetah hu yikallif abiidah be maalah wa ayyi waahid minhum indah masʼuuliiye.
Wa siid al-beet yaamurah le l-gardi achaan yagood waaʼi fi l-baab.
35 Wa achaan da,
intu kula agoodu waaʼiyiin achaan ma taʼarfu al-wakit al-siid al-beet yaji foogah.
Akuun yaji makharib walla fi ust al-leel walla waradde walla fajur.
36 Akuun yaji fajʼa wa yalgaaku naaymiin.
37 Wa l-kalaam al-nuguulah leeku da,
nuguulah le kulla l-naas.
Nuguul agoodu waaʼiyiin.