Masal al-harraatiin al-fasliin
12
Wa fi l-bakaan da,
Isa gamma yihajji leehum be amsaal wa gaal :
Naadum waahid maggan inab fi jineene.
Wa zarabaaha wa nakat nugra achaan yiʼassir foogah al-inab wa bana beet hana haraasa.
Wa hu ajjar harraatiin achaan yakhdumu foogha wa khalaas khatar wa macha fi balad aakhar.
2 Wa fi wakit hana lammiin al-inab,
hu rassal abid waahid le l-harraatiin achaan yichiil minhum al-inab al-waajib leyah.
3 Wa l-harraatiin karabooh wa daggooh wa gabbalooh le siidah iideenah yaabis.
4 Wa rassal leehum abid taani.
Wa l-abid da,
hu kula daggooh fi raasah wa ayyarooh.
5 Wa rassal leehum battaan abid aakhar wa l-abid da,
katalooh.
Wa rassal leehum abiid katiiriin wa l-harraatiin sawwo leehum nafs al-cheyy.
Waahidiin daggoohum wa waahidiin kataloohum.
6 Wa faddal leyah naadum waahid yirassilah wa da wileedah al-yiriidah bilheen.
Wa fi l-akhiir,
siid al-jineene gaal «
Akiid wileedi da yikarrumuuh ».
Wa khalaas rassal leehum wileedah.
7 Laakin al-harraatiin achchaawaro ambeenaathum wa gaalo :
Daahu al-yawris al-jineene.
Khalli naktuluuh achaan al-warasa tabga hintina.
8 Wa khalaas karabooh wa katalooh wa zagalo janaaztah barra min al-jineene.
9 Wa Isa gaal :
Wa hassaʼ da,
nasʼalku.
Siid al-jineene yisawwi fooghum chunu ?
Akiid hu yaji fi l-jineene wa yikattilhum le l-harraatiin dool wa khalaas yanti al-jineene le naas aakhariin.
10 Akiid gareetu al-kalaam al-maktuub fi l-Kitaab al-buguul <Al-hajar al-bannaayiin al-beet awwal ma dawwarooh bigi al-hajar al-muhimm fi buna al-beet.
11 Wa l-cheyy da Allah bas sawwaah wa bigi leena ajiib>.
12 Wa fi l-bakaan da,
al-kubaaraat dawwaro yakurbu Isa fi l-sijin achaan fihmo kadar be l-masal da Isa hajja fooghum laakin humman khaayfiin min al-naas.
Wa achaan da,
gammo khallooh wa faato.
Al-suʼaal fi l-miiri
13 Wa l-kubaaraat rassalo le Isa naas waahidiin min al-Fariisiyiin wa naas waahidiin min hizib Hiruudus achaan yarmuuh fi kalaamah.
14 Wa l-jawaasiis dool jo leyah wa gaalo :
Sayyidna,
naʼarfu kalaamak hagg.
Inta ma khaayif min ayyi naadum.
Ma takhaaf min wijih al-naas wa tiʼallim le l-naas derib Allah al-sahiih.
Khalaas,
guul leena,
hasab al-Tawraat waajib leena nikaffu al-miiri le sultaan al-Roomaaniyiin walla ?
15 Al-takfi waajib leena walla ma waajib ?
Wa Isa irif humman munaafikhiin.
Wa radda leehum wa gaal :
Maala tidooru tijarrubuuni ?
Antuuni diinaar waahid wa khalli nichiifah.
16 Wa antooh diinaar waahid.
Wa hu saʼalaahum wa gaal :
Al-suura wa l-usum al-gaaʼidiin foogah da hana yaatu ?
Wa raddo leyah wa gaalo :
Hana sultaan al-Roomaaniyiin.
17 Wa Isa gaal leehum :
Khalaas.
Hana l-sultaan,
antuuh le l-sultaan wa hana Allah,
antuuh le Allah.
Wa ajjabo minnah marra waahid.
Al-suʼaal fi l-giyaama
18 Wa naas waahidiin min al-Sadduukhiyiin jo le Isa be suʼaal.
Wa l-Sadduukhiyiin ma muʼminiin be l-giyaama.
Wa saʼalooh wa gaalo :
19 Ya l-sayyid,
nidooru nihajju leek be l-kalaam al-Muusa katabah leena fi l-Tawraat.
Hu buguul kan raajil maat wa indah mara wa ma indah iyaal,
akhu al-raajil da waajib yaakhud al-mara.
Wa be da,
hu yalda minha zurriiye le akhuuh al-marhuum.
20 Wa awwal fi sabʼa akhwaan.
Wa l-kabiir minhum akhad mara wa wakit hu maat ma indah zurriiye.
21 Wa l-taani akhadha wa baʼadeen hu kula maat wa ma indah zurriiye wa l-taalit sawwa nafs al-cheyy.
22 Wa nafs al-cheyy bigi le l-aakhariin kula.
Wa l-akhwaan al-sabʼa kulluhum akhado al-mara di wa baʼadeen maato bala zurriiye.
Wa fi l-akhiir,
al-mara zaatha maatat.
23 Wa khalaas wakit al-maytiin yabʼaso da,
hi tabga mara hana yaatu minhum ?
Achaan sabʼa rujaal akhadooha.
24 Wa Isa radda leehum wa gaal :
Intu ma taʼarfu Kitaab Allah wa la gudrat Allah wa achaan da bas intu muwaddiriin.
25 Achaan wakit al-maytiin yabʼaso,
al-rujaal ma yaakhudu awiin wa l-awiin ma yaakhudan rujaal.
Yabgo misil al-malaaʼika fi l-samaawaat al-ambeenaathum akhiide ma fi.
26 Wa fi l-cheyy al-bukhuss buʼaas al-maytiin,
hal nisiitu al-kalaam al-gareetuuh fi Kitaab Muusa walla ?
Fakkuru fi l-kalaam al-bukhuss al-chadara al-hargaane*.
Fi l-bakaan da,
Allah hajja leyah wa gaal <Ana Allah Rabb hana Ibraahiim wa Rabb Ishaakh wa Rabb Yaakhuub>.
27 Wa hu Rabb al-naas al-gaaʼidiin wa ma Rabb al-naas al-ma fiihum.
Wa khalaas intu muwaddiriin marra waahid.
Al-wasiiye al-akbar
28 Wa naadum waahid min al-ulama gaaʼid hinaak wa hu simiʼ al-munaakhacha di.
Wa hu chaaf kadar Isa radda le l-Sadduukhiyiin be radd adiil.
Wa achaan da,
hu saʼalah wa gaal :
Ya sayyidna,
min kulla wasaaya Allah,
weeni al-wasiiye al-akbar ?
29 Wa Isa radda leyah wa gaal :
Al-wasiiye al-akbar hi <Ya Bani Israaʼiil,
asmaʼo kalaami.
Rabbina Allah hu wiheedah Allah.
30 Wa hibb Rabbak Allah be kulla galbak wa kulla nafsak wa kulla fikrak wa kulla gudurtak>.
31 Wa l-wasiiye al-taaniye hi <Hibb akhuuk misil tihibb nafsak>.
Wa deel bas al-wasaaya al-kubaar wa ma fi wasiiye akbar minhum.
32 Wa l-aalim gaal :
Kalaamak sameh,
sayyidna.
Kalaamak hagg,
achaan Allah waahid wa la ilaah illa hu.
33 Wa kan naadum yihibbah be kulla galbah wa kulla fikrah wa kulla gudurtah wa yihibb akhuuh misil yihibb nafsah,
da akheer min kulla dahiiye wa hadiiye al-yagdar yigaddimhum le Allah.
34 Wa Isa khassad be kalaam al-aalim achaan hu radda be fikir adiil.
Wa Isa gaal leyah :
Inta ma baʼiid min mamlakat Allah.
Wa baʼad da,
naadum waahid kula ma dawwar yasʼal ayyi suʼaal.
Suʼaal al-Masiih fi Ibn Dawuud
35 Wa wakit Isa gaaʼid yiʼallim al-naas fi hooch hana Beet Allah,
hu gaal :
Kikkeef al-ulama yuguulu kadar al-Masiih yabga Ibn Dawuud.
36 Dawuud zaatah kallam be gudrat al-Ruuh al-Khudduus wa gaal <Allah kallam le siidi al-malik wa gaal :
Agood fi nussi al-zeenaay lahaddi nukhutt udwaanak tihit rijileenak>.
37 Wa fi l-kalaam da,
Dawuud gaal al-Masiih hu siidah.
Wa be misil da,
kikkeef al-Masiih yabga wileedah ?
Wa naas katiiriin bilheen gaaʼidiin yasmaʼo kalaamah be farah.
Kalaam al-Masiih foog al-ulama
38 Wa wakit Isa gaaʼid yiʼallimhum hu gaal :
Awʼu baalku min al-ulama.
Humman yiriidu yuruukhu fi ust al-naas laabsiin jalaaliib tuwaal wa yiriidu salaam al-naas fi l-suug
39 wa saff al-awwal fi beet al-sala wa bakaan al-kubaaraat fi kulli aazuuma.
40 Wa laakin humman yaakulu buyuut al-awiin al-rujaalhin maytiin wa yugummu yisallu sala tawiile achaan al-naas yichiifuuhum.
Wa achaan da,
al-azaab al-yarjaahum yabga chadiid bilheen.
Riyaaleen hana l-mara al-miskiine
41 Wa Isa gaʼad gariib le sanduug hana Beet Allah wa chaaf al-naas al-gaaʼidiin yusubbu foogah gurushum.
Wa siyaad al-maal katiiriin gaaʼidiin yusubbu gurus katiir.
42 Wa fi l-bakaan da,
ajuuz waahide jaat raajilha mayyit wa hi miskiine.
Wa khattat fi l-sanduug riyaaleen khiimithum chiyya.
43 Wa Isa naada talaamiizah wa gaal :
Nuguul leeku al-hagg,
al-ajuuz al-miskiine di antat ziyaada min kulla l-naas al-aakhariin al-gaaʼidiin yusubbu gurushum fi sanduug Beet Allah.
44 Achaan kulluhum anto le Allah min fadlit maalhum,
laakin hi miskiine wa antat kulla cheyy al-indaha al-tiʼiich beyah.