Al-zawaaj wa l-talaag
10
Wa Isa gamma min al-bakaan da wa macha fi daar al-Yahuudiiya wa gataʼ bahar al-Urdun.
Wa battaan naas katiiriin lammo foogah wa hu allamaahum misil fi aadtah.
2 Wa naas waahidiin min al-Fariisiyiin macho leyah wa dawwaro yakurbuuh fi kalaamah.
Wa achaan da,
saʼalooh wa gaalo :
Kan al-raajil yitallig martah,
da halaal walla ?
3 Wa Isa radda leehum wa gaal :
Wa Muusa amaraaku be chunu ?
4 Wa gaalo :
Muusa anta izin le l-raajil achaan yaktib chahaada hana l-talaag wa yitallig martah.
5 Wa Isa radda leehum wa gaal :
Muusa katab leeku al-wasiiye di achaan ruuseenku gawiiyiin.
6 Wa laakin fi l-awwal,
wakit Allah khalag al-ard <Hu khalagaahum raajil wa mara>
7 wa <Fi l-sabab da ayyi raajil yikhalli ammah wa abuuh wa yilimm maʼa martah
8 wa l-naaseen yabgo jisim waahid>.
Wa be misil da,
humman ma naaseen battaan achaan bigo waahid.
9 Allah bas rabataahum wa ma waajib al-insaan yihilluhum.
10 Wa baʼadeen Isa gaaʼid fi l-beet wa talaamiizah saʼalooh fi l-kalaam da.
11 Wa Isa gaal :
Ayyi naadum al-yitallig martah wa yaakhud mara aakhara yisawwi leeha khata wa gaaʼid yazna.
12 Wa battaan ayyi mara al-tallagat raajilha wa akhadat raajil aakhar chokholha zina bas.
Al-Masiih baarak al-iyaal
13 Wa l-naas gaaʼidiin yiwaddu iyaalhum le Isa achaan hu yalmashum wa yibaarikhum.
Wa talaamiizah harajoohum.
14 Wa Isa simiʼ kalaamhum wa ziʼil.
Wa hajja leehum wa gaal :
Khallu al-iyaal yaju leyi wa ma tadharoohum achaan Mamlakat Allah hana l-naas al-misilhum.
15 Wa nuguul leeku al-hagg,
naadum abadan ma yadkhul fi Mamlakat Allah kan ma yakhbalha misil wileed sakhayyar yakhbalha.
16 Wa hu hadanaahum le l-iyaal wa khatta iideenah fooghum wa baarakaahum.
Al-naadum al-khani
17 Wa Isa gamma achaan yichiil derbah.
Wa naadum waahid jara leyah wa sajad giddaamah wa saʼalah wa gaal :
Ya al-muʼallim al-adiil !
Waajib nisawwi chunu achaan nalga al-haya al-abadiiye ?
18 Wa Isa radda leyah wa gaal :
Maala tuguul ana adiil ?
Waahid bas adiil wa hu Allah.
19 Akiid taʼarif al-wasaaya :
Ma taktul wa ma tazna wa ma tasrig wa ma tachhad be kidib wa ma taakul khumaam al-naas wa karrim ammak wa abuuk.
20 Wa l-naadum gaal :
Ya sayyidna,
min wakit ana sakhayyar nitaabiʼ kulla l-wasaaya dool.
21 Wa Isa chaafah adiil wa hannah be mahabba wa gaal :
Chokhol waahid gassar leek.
Biiʼ kulla cheyy al-indak wa anti tamanah le l-masaakiin wa misil da,
talgaah giddaamak.
Wa taʼaal taabiʼni.
22 Wa wakit al-khani simiʼ al-kalaam da,
hu karab wijhah.
Wa gamma min hinaak wa macha haznaan achaan hu indah maal katiir bilheen.
23 Wa Isa anlafat wa hajja le talaamiizah wa gaal :
Al-dakhuul fi Mamlakat Allah yabga gaasi le l-naas al-induhum maal katiir.
24 Wa talaamiizah ajjabo bilheen min kalaamah da.
Wa Isa hajja leehum battaan wa gaal :
Ya iyaali,
akiid dakhuul fi Mamlakat Allah yabga gaasi.
25 Dakhuul al-jamal fi gadd hana ibre hayyin min dakhuul siid al-maal fi Mamlakat Allah.
26 Wa astakhrabo marra waahid min kalaamah.
Wa assaaʼalo ambeenaathum wa gaalo :
Kan misil da,
yaatu ke al-yagdar yanja ?
27 Wa Isa chaafaahum adiil wa gaal :
Da gaasi marra waahid le l-naas laakin ma gaasi le Allah achaan ma fi cheyy gaasi le Allah.
28 Wa Butrus gamma yihajji wa gaal :
Wa aniina khalleena kulla cheyy al-indina achaan nitaabuʼuuk.
29 Wa Isa gaal :
Nuguul leeku al-hagg,
ayyi naadum al-gamma fi chaani wa fi chaan al-bichaara wa khalla beetah walla akhwaanah walla akhwaatah walla ammah walla abuuh walla iyaalah walla ziraaʼtah
30 hu yalga fi l-wakit al-haali miya marra buyuut wa akhwaan wa akhwaat wa ammahaat wa iyaal wa ziraaʼa wa maʼaahum diige chadiide.
Wa fi l-aakhira yalga al-haya al-abadiiye.
31 Wa laakin naas katiiriin al-gaaʼidiin wara yabgo giddaam wa naas katiiriin al-gaaʼidiin giddaam kamaan yabgo wara.
Taalit marra al-Masiih hajja be mootah
32 Wa Isa wa talaamiizah maachiin fi derib hana Madiinat al-Khudus.
Wa Isa raayikh giddaam minhum chiyya wa talaamiizah gaaʼidiin yiʼajjubu minnah.
Wa l-naas al-maachiin waraahum khaayfiin.
Wa Isa tarraf al-talaamiiz al-atnaachar wa hajja leehum wiheedhum.
Wa bada yihajji leehum be l-taʼab al-yaji foogah gariib.
33 Wa Isa gaal :
Asmaʼo.
Aniina maachiin le Madiinat al-Khudus.
Wa hinaak yisallumu Ibn al-Insaan le kubaaraat rujaal al-diin wa le l-ulama.
Wa humman yahkumu leyah be l-moot wa yisallumuuh le l-kuffaar.
34 Wa yichammutu leyah wa yibazzugu foogah wa yajluduuh wa yaktuluuh.
Wa laakin fi talaata yoom hu yabʼas.
Talab hana Yaakhuub wa Yuuhanna
35 Wa Yaakhuub wa Yuuhanna awlaad Zabadi macho le Isa wa gaalo :
Sayyidna,
nidooru inta tisawwi leena al-cheyy al-natlubuuh minnak.
36 Wa Isa gaal leehum :
Tidooru nisawwi leeku chunu ?
37 Wa raddo leyah wa gaalo :
Antiina izin achaan nahkumu maʼaak wakit rikibt fi l-kursi fi mamlakatak al-majiide,
waahid minnina be iidak al-zeene wa waahid minnina be iidak al-isra.
38 Wa Isa radda leehum wa gaal :
Intu ma fihimtu al-cheyy al-intu tidooruuh.
Tagdaro tacharbo min kaas al-taʼab al-ana nachrab minnah walla ?
Tahmalo khattisiin misil al-yikhattusuuni beyah walla ?
39 Wa raddo leyah wa gaalo :
Aywa,
nagdaro.
Wa Isa gaal leehum :
Khalaas intu tacharbo min al-kaas al-ana laabudda nachrab minnah.
Wa yikhattusuuku be l-khattisiin al-yikhattusuuni beyah.
40 Laakin ana ma nagdar nikhtaar al-naas al-yagoodu fi iidi al-zeene wa fi iidi al-isra.
Allah jahhaz al-bakaanaat dool le l-naas al-ikhtaaraahum.
41 Wa l-talaamiiz al-achara simʼo al-kalaam da wa ziʼilo min Yaakhuub wa Yuuhanna.
42 Wa Isa naada kulla talaamiizah achaan yaju leyah wa gaal :
Taʼarfu kadar ambeen al-naas al-ma muʼminiin,
ayyi naadum al-jaʼalooh haakimhum yahkim naasah misil hu siid chaʼabah.
Wa kubaaraathum induhum gudra foog al-naas.
43 Wa laakin intu ma waajib tabgo misilhum.
Ayyi naadum minku al-yidoor yabga al-kabiir khalli yabga khaddaamku.
44 Wa ayyi naadum al-yidoor yabga raʼiisku khalli yabga abidku.
45 Achaan ana Ibn al-Insaan zaati ma jiit achaan al-naas yakhdumu leyi laakin achaan ana nakhdim le l-naas.
Wa jiit achaan nafda naas katiiriin be ruuhi.
Al-Masiih daawa naadum amyaan
46 Wa Isa wa talaamiizah wislo fi hillit Ariiha.
Wakit Isa wa talaamiizah maargiin min Ariiha,
naas katiiriin bilheen maachiin waraayah.
Wa amyaan waahid gaaʼid tihit jamb al-chaariʼ achaan yasʼal al-sadakha min al-naas.
Wa usmah Baartimaawi maʼanaatah wileed Timaawi.
47 Wa hu simiʼ kadar Isa maachi be l-chaariʼ da.
Wa hu aat wa gaal :
Ya Isa !
Ya Ibn Dawuud !
Arhamni.
48 Wa naas katiiriin harajooh wa gaalo leyah «
Askut ».
Laakin al-amyaan gamma yiʼiit be ziyaada wa yuguul :
Ya Ibn Dawuud,
arhamni.
49 Wa Isa wigif wa gaal :
Naaduuh.
Khalli yaji leyi.
Wa naado al-amyaan wa gaalo leyah :
Chidd heelak wa gumm foog.
Hu gaaʼid binaadiik.
50 Wa l-amyaan rama battaaniiytah wa natta foog wa macha le Isa.
51 Wa Isa saʼalah wa gaal :
Tidoor nisawwi leek chunu ?
Wa l-amyaan gaal :
Sayyidna,
nidoor nichiif.
52 Wa Isa gaal :
Yalla chiif.
Ligiit al-aafe be sabab iimaanak.
Wa ajala ke uyuunah anfataho wa gamma yitaabiʼ Isa fi derbah.