9
Wa Isa gaal leehum :
Nuguul leeku al-hagg,
fi naas waahidiin al-gaaʼidiin hini al-ma yumuutu gubbaal ma yichiifu mamlakat Allah taji be gudra.
Al-Masiih fi nuur al-majd
2 Wa baʼad sitte yoom,
Isa chaal maʼaayah Butrus wa Yaakhuub wa Yuuhanna wiheedhum wa waddaahum fi raas hajar tawiil.
Wa Isa alkhayyar giddaamhum.
3 Wa khalagah bada yiraari wa bigi abyad karr marra waahid.
Wa abadan ma fi naadum fi l-dunya al-yagdar yisawwi khalag abyad misil al-khalag da.
4 Wa l-nabi Muusa wa l-nabi Iliyaas baano giddaamhum wa humman gaaʼidiin yihajju maʼa Isa.
5 Wa Butrus hajja le Isa wa gaal :
Sayyidna,
bigi leena sameh kadar aniina gaaʼidiin hini.
Khalli nabnu lagaadiib talaata.
Nabnu waahide leek wa waahide le Muusa wa waahide le Iliyaas.
6 Wa Butrus hajja misil da achaan hu astakhrab wa ma yaʼarif chunu al-waajib yuguulah.
Wa kulluhum khaayfiin marra waahid.
7 Wa sahaabaay waahide jaat wa khattathum be dullaha wa hiss min lubb al-sahaabaay ansamaʼ wa gaal :
Da bas Ibni wa nihibbah bilheen.
Asmaʼo kalaamah.
8 Wa ajala ke allaffato battaan wa ma chaafo ayyi naadum,
illa Isa wiheedah bas gaaʼid maʼaahum.
9 Wa wakit gaaʼidiin yanzulu min raas al-hajar,
Isa amaraahum achaan ma yiʼooru ayyi naadum be l-cheyy al-chaafooh lahaddi Ibn al-Insaan yabʼas min ust al-maytiin.
10 Wa achaan da,
ma ooro beyah naadum aakhar.
Wa assaaʼalo ambeenaathum chunu maʼana al-kalaam al-gaalah fi buʼaas al-maytiin.
11 Wa saʼalo Isa wa gaalo :
Maala al-ulama buguulu Iliyaas laabudda baji gubbaalak ?
12 Wa hu radda leehum wa gaal :
Sahiih,
Iliyaas yaji gubbaali achaan yiʼaddil kulla cheyy.
Laakin ma misil fi fikirku,
achaan maktuub fi l-Kitaab kadar Ibn al-Insaan yatʼab taʼab chadiid wa l-naas yahguruuh.
13 Wa laakin niʼooriiku Iliyaas* ja khalaas wa katalooh.
Wa da bas al-cheyy al-zamaan dawwarooh misil maktuub fi l-Kitaab.
Al-wileed al-indah amfitfit
14 Wa lihgo al-talaamiiz al-aakhariin wa chaafo naas katiiriin bilheen maʼaahum wa l-ulama gaaʼidiin yinaakhuchuuhum.
15 Wa wakit al-naas chaafo Isa jaayi,
humman ajjabo bilheen wa jaro leyah wa sallamooh.
16 Wa Isa saʼal talaamiizah wa gaal :
Tinaakhuchu maʼaahum fi chunu ?
17 Wa naadum waahid min ust al-naas radda leyah wa gaal :
Al-sayyid,
ana jibt leek wileedi achaan indah cheetaan al-yisawwiih ambuuku.
18 Wa ayyi wakit al-cheetaan yakurbah,
yarmiih fi l-turaab wa l-wileed yaybis karr min al-fitfit lahaddi rikhwe tamrug min khachmah.
Wa ana talabt min talaamiizak achaan yaturdu minnah al-cheetaan wa laakin humman ma gidro.
19 Wa Isa radda wa gaal :
Ya l-naas al-ma muʼminiin.
Kam yoom waajib nagood maʼaaku ?
Kam yoom nahmalku ?
Jiibu leyi al-wileed.
20 Wa jaabo leyah al-wileed.
Wa l-cheetaan chaaf Isa wa ajala ke al-wileed fatfat wa wagaʼ fi turaab wa chaglab wa rikhwe maragat min khachmah.
21 Wa Isa saʼal abu al-wileed wa gaal :
Min kam yoom hu taʼbaan misil da ?
Wa radda leyah wa gaal :
Min hu sakhiir.
22 Al-cheetaan yidoor yaktulah wa iddat marraat ramaah fi naar wa fi almi.
Arhamna.
Aawinna,
kan ma gaasi leek.
23 Wa Isa gaal :
Inta gult kan ma gaasi leyi.
Wa ana nuguul kan naadum indah iimaan,
ma fi cheyy gaasi leyah.
24 Wa ajala ke abu al-wileed radda leyah be hiss foog wa gaal :
Indi iimaan.
Najjiini min chukuuki.
25 Wa Isa chaaf kadar al-naas al-laammiin foogah gaaʼidiin yiziidu wa naas ziyaada jaariyiin aleyah wa khalaas kachcha le l-cheetaan wa gaal :
Ya cheetaan al-ambuuku.
Asmaʼ amri.
Amrug minnah wa abadan ma tigabbil foogah.
26 Wa l-cheetaan aat wa l-wileed fatfat fatfitiin chadiid wa l-cheetaan marag minnah khalaas.
Wa l-wileed raagid saakit misil naadum mayyit.
Wa achaan da naas katiiriin gaalo :
Khalaas,
al-wileed maat.
27 Wa laakin Isa karab iidah wa aawanah wa l-wileed gamma foog.
28 Wa baʼadeen Isa dakhal fi l-beet wa talaamiizah jo leyah wiheedhum.
Wa saʼalooh wa gaalo :
Maala ma gidirna taradna al-cheetaan da ?
29 Wa radda leehum wa gaal :
Al-cheetaan al-nafar da ma bintarid illa be l-sala.
Al-Masiih hajja battaan be mootah
30 Wa gammo min al-bakaan da wa chaggo daar al-Jaliil.
Wa Isa dawwar al-naas ma yaʼarfu al-bakaan al-hu gaaʼid foogah
31 achaan hu gaaʼid yiʼallim talaamiizah wiheedhum bas.
Wa gaaʼid yuguul leehum :
Baʼad chiyya Allah yisallim Ibn al-Insaan le l-naas wa yaktuluuh.
Wa talaata yoom baʼad katalooh,
hu yabʼas.
32 Wa humman ma fihmo kalaamah wa ma saʼalooh fi l-kalaam da achaan humman khaayfiin.
Al-kubaar wa l-sukhaar
33 Wa jo fi hillit Kafar Naahuum wa dakhalo fi l-beet.
Wa fi l-bakaan da,
Isa saʼalaahum wa gaal :
Awwal,
wakit aniina fi l-derib,
intu gaaʼidiin tinaakhuchu fi chunu ?
34 Wa khijlo wa sakato achaan fi l-derib gaaʼidiin yinaakhuchu ambeenaathum yaatu minhum al-kabiir.
35 Wa hu gaʼad tihit wa naada al-talaamiiz al-atnaachar.
Wa gaal leehum :
Kan naadum yidoor yabga al-awwal,
hu waajib yisawwi nafsah al-akhiir wa yabga khaddaam hana kulla l-naas.
36 Wa jaab leehum wileed sakhayyar wa waggafah fi usuthum wa hadanah.
37 Wa gaal :
Ayyi naadum al-yakhbal wileed sakhayyar misil da be usmi,
yakhbalni ana.
Wa l-naadum al-khiblaani ma khiblaani ana wiheedi.
Hu khibil Allah al-rassalaani.
38 Wa Yuuhanna hajja le Isa wa gaal :
Sayyidna,
chifna naadum waahid al-gaaʼid yatrud al-chawaatiin be usmak.
Wa dawwarna nadharooh minnah achaan hu ma gaaʼid yitaabiʼak maʼaana.
39 Wa Isa gaal :
Ma tadharooh achaan ma fi naadum al-yisawwi ajaayib be usmi wa ajala ke yuguul foogi kalaam fasil.
40 Wa l-naadum al-ma yidaawisna hu gaaʼid yisaaʼidna.
41 Wa nuguul leeku al-hagg,
ayyi naadum al-yantiiku kaas hana almi achaan intu naas al-Masiih,
ajrah ma yiwaddir abadan.
42 Wa ayyi naadum al-yitallif iimaan hana waahid min al-muʼminiin al-dugaag dool,
al-azaab al-yarjaah yabga chadiid lahaddi akheer leyah kan rabato fi ragabtah murhaaka kabiire wa zagalooh fi l-bahar.
43 Wa kan iidak tidoor tamurgak min al-derib al-adiil,
agtaʼha.
Akheer leek tadkhul fi l-haya al-abadiiye wa faddal leek iid waahide bas min tadkhul fi Jahannam wa indak iideen itneen.
Wa abadan ma fi cheyy yaktul naar Jahannam.
44 Fi l-bakaan da,
al-duud al-yaakulhum abadan ma yumuut wa ma fi cheyy yaktul al-naar.
45 Wa kan rijilak tidoor tamurgak min al-derib al-adiil,
agtaʼha.
Akheer leek tadkhul fi l-haya al-abadiiye wa faddal leek rijil waahide bas min yazguluuk fi Jahannam wa indak rijileen itneen.
46 Fi l-bakaan da,
al-duud al-yaakulhum abadan ma yumuut wa ma fi cheyy yaktul al-naar.
47 Wa kan eenak tidoor tamurgak min al-derib al-adiil,
sillaha.
Akheer leek tadkhul fi mamlakat Allah wa faddal leek een waahide bas min yazguluuk fi Jahannam wa indak uyuun itneen.
48 Fi l-bakaan da,
al-duud al-yaakulhum abadan ma yumuut wa ma fi cheyy yaktul al-naar.
49 Wa l-taʼab al-chadiid misil al-naar yaji foog ayyi waahid minku wa yijarrib iimaanah achaan yitahhir galbah.
50 Al-mileh adiil.
Laakin kan taʼaamah bigi ma fiih,
chunu yigabbilah ?
Al-mileh ma yatlaf wa khalli al-salaam al-ma yatlaf yagood ambeenaatku.