Al-zawaaj wa l-talaag
19
Wa wakit Isa kammal kalaamah da,
hu gamma min daar al-Jaliil.
Wa macha fi daar al-Yahuudiiya wa gataʼ bahar al-Urdun.
2 Wa naas katiiriin marra waahid taabaʼooh.
Wa fi l-bakaan da,
hu daawa l-mardaaniin al-maʼaahum.
3 Wa Fariisiyiin waahidiin jo le Isa achaan yijarrubuuh.
Wa saʼalooh wa gaalo :
Halaal le raajil yitallig martah be ayyi sabab walla ?
4 Wa radda leehum wa gaal :
Ma gareetu al-Kitaab ?
Fi l-awwal Allah khalag al-naas wa khalagaahum raajil wa mara
5 wa gaal <Fi l-sabab da,
ayyi raajil waajib yikhalli ammah wa abuuh wa yilimm maʼa martah wa l-naaseen yabgo jisim waahid>.
Al-kalaam da nisiituuh walla ?
6 Wa be misil da,
humman ma naaseen battaan achaan bigo jisim waahid.
Allah bas rabataahum wa waajib al-insaan ma yihilluhum.
7 Wa saʼalooh wa gaalo :
Kan misil ke,
kikkeef Muusa amaraana wa gaal raajil waajib yanti chahaada hana l-talaag le martah wa yitalligha ?
8 Wa Isa radda leehum wa gaal :
Muusa antaaku izin titallugu awiinku achaan raasku gawi.
Wa laakin ma misil da fi l-awwal.
9 Wa nuguul leeku ayyi naadum al-yitallig martah ma be sabab hana l-zina wa yaakhud mara aakhara,
yazna.
10 Wa talaamiizah gaalo leyah :
Kan haalat al-raajil maʼa martah misil da,
akheer le raajil ma yaakhud.
11 Wa Isa radda leehum wa gaal :
Ma kulla l-naas yagdaro yakhbalo kalaamku da,
illa l-naas al-Allah antaahum.
12 Naas waahidiin ma yaakhudu achaan min wildoohum humman misil khussiya.
Wa naas waahidiin ma yaakhudu achaan al-naas khassoohum.
Wa naas aakhariin yabgo misil khussiya achaan chaalo niiye yakhdumu le mamlakat Allah.
Khalaas,
ayyi naadum al-yagdar yakhbal al-kalaam da,
khalli yakhbalah.
Al-Masiih salla le l-iyaal
13 Wa baʼadeen naas waahidiin gaddamo iyaalhum al-dugaag le Isa achaan yukhutt iideenah fooghum wa yisalli leehum.
Wa talaamiizah harajoohum.
14 Wa laakin Isa gaal :
Khallu al-iyaal yaju leyi wa ma tadharoohum achaan mamlakat Allah hana l-naas al-misilhum.
15 Wa baʼad khatta iideenah fooghum,
hu faat min al-bakaan da.
Al-sabi siid al-maal
16 Wa naadum waahid ja leyah wa saʼalah gaal :
Ya sayyidna,
chunu al-amal al-adiil al-laazim nisawwiih achaan nalga al-haya al-abadiiye ?
17 Wa Isa radda leyah wa gaal :
Maala tasʼalni be l-amal al-adiil ?
Waahid bas adiil wa hu Allah.
Wa laakin kan tidoor tadkhul fi l-haya al-abadiiye,
tabbig al-wasaaya.
18 Wa l-sabi saʼalah wa gaal :
Al-weenuuhum ?
Wa Isa radda leyah wa gaal :
Ma taktul wa ma tazna wa ma tasrig wa ma tachhad be kidib.
19 Wa karrim ammak wa abuuk wa hibb akhuuk misil tihibb nafsak.
20 Wa l-sabi gaal :
Min wakit ana sakhayyar nitaabiʼ kulla l-wasaaya dool.
Wa chunu gassar leyi ?
21 Wa Isa radda leyah wa gaal :
Kan tidoor tabga naadum bala eeb,
amchi biiʼ kulla cheyy al-indak wa anti tamanah le l-masaakiin wa misil da talga giddaamak.
Wa khalaas taʼaal,
taabiʼni.
22 Wa wakit al-sabi simiʼ al-kalaam da,
hu bigi haznaan wa faat achaan indah maal katiir.
23 Wa Isa gaal le talaamiizah :
Nuguul leeku al-hagg,
al-dakhuul fi mamlakat Allah gaasi le l-naadum al-indah maal katiir.
24 Wa battaan nuguul leeku,
dakhuul al-jamal fi gadd hana ibre hayyin min dakhuul siid al-maal fi mamlakat Allah.
25 Wa l-talaamiiz ajjabo bilheen min al-kalaam da wa saʼalooh wa gaalo :
Kan misil ke,
yaatu yagdar yanja ?
26 Wa Isa chaafaahum adiil ke wa gaal leehum :
Da gaasi marra waahid le l-naas wa laakin ma fi cheyy gaasi le Allah.
27 Wa Butrus gaal :
Wa aniina ke,
khalleena kulla cheyy al-indina achaan nitaabuʼuuk.
Wa Allah yantiina chunu ?
28 Isa radda leehum wa gaal :
Nuguul leeku al-hagg,
wakit ana,
Ibn al-Insaan,
nagood fi l-kursi al-aziim fi l-zaman al-fiyah Allah yisawwi kulla cheyy jadiid,
intu al-taabaʼtuuni tagoodu fi karaasi atnaachar wa tahkumu gabaayil Bani Israaʼiil al-atnaachar.
29 Wa ayyi naadum al-gamma fi chaan usmi wa khalla buyuutah walla akhwaanah walla akhwaatah walla abuuh walla ammah walla iyaalah walla ziraaʼtah,
Allah yantiih miya marra ziyaada wa yantiih al-haya al-abadiiye.
30 Laakin naas katiiriin al-gaaʼidiin wara yabgo giddaam.
Wa naas katiiriin al-gaaʼidiin giddaam kamaan yabgo wara.