Al-Masiih fi nuur al-majd
17
Wa baʼad sitte yoom,
Isa chaal maʼaayah Butrus wa Yaakhuub wa Yuuhanna akhuuh wiheedhum wa waddaahum fi raas hajar tawiil.
2 Wa Isa alkhayyar giddaamhum.
Wijhah nawwar misil nuur al-harraay wa khalagah bigi abyad karr misil al-nuur.
3 Wa ajala ke,
al-nabi Muusa wa l-nabi Iliyaas baano giddaamhum wa gaaʼidiin yihajju maʼa Isa.
4 Wa Butrus gamma yihajji le Isa wa gaal :
Sayyidna,
bigi leena sameh kadar aniina gaaʼidiin hini.
Wa kan tidoorah,
nisawwi lagaadiib talaata,
waahide leek wa waahide le Muusa wa waahide le Iliyaas.
5 Wa wakit hu gaaʼid yihajji,
sahaabaay al-indaha nuur jaat fooghum wa khattathum be dullaha wa hiss min lubb al-sahaabaay ansamaʼ wa gaal :
Da bas Ibni.
Ana nihibbah wa ana farhaan beyah bilheen.
Asmaʼo kalaamah.
6 Wa l-talaamiiz simʼo al-hiss wa khaafo marra waahid wa wagaʼo be wujuuhhum fi l-ard.
7 Wa Isa ja leehum wa limisaahum wa gaal :
Gummu wa ma takhaafo.
8 Wa rafaʼo ruuseenhum wa ma chaafo naadum illa Isa wiheedah.
9 Wa wakit gaaʼidiin yanzulu min raas al-hajar,
Isa amaraahum wa gaal :
Ma tihajju le naadum waahid kula be l-cheyy al-chiftuuh lahaddi Ibn al-Insaan yabʼas min ust al-maytiin.
10 Wa talaamiizah saʼalooh wa gaalo :
Maala al-ulama buguulu Iliyaas laabudda baji gubbaalak ?
11 Wa Isa radda leehum wa gaal :
Sahiih Iliyaas yaji gubbaali achaan yiʼaddil kulla cheyy.
12 Wa niʼooriiku Iliyaas ja khalaas wa ma irifooh wa sawwo foogah misil dawwaro.
Wa baʼad chiyya yitaʼʼubuuni ana Ibn al-Insaan kula.
13 Wa khalaas al-talaamiiz fihmo hu yihajji leehum be Yahya al-Mukhattis.
Al-wileed al-indah amfitfit
14 Wa gabbalo fi l-bakaan al-naas lammo foogah wa raajil waahid ja le Isa wa sajad giddaamah.
15 Wa l-raajil gaal :
Ya sayyidna,
arham wileedi.
Indah amfitfit wa hu taʼbaan bilheen.
Yagaʼ tihit katiir.
Yoom waahid yagaʼ fi l-naar wa yoom aakhar yagaʼ fi l-almi.
16 Wa waddeetah le talaamiizak wa ma gidro yidaawuuh.
17 Wa Isa radda wa gaal :
Ya l-naas al-uuj wa ma muʼminiin !
Kam yoom waajib nagood maʼaaku ?
Lahaddi mata nahmalku ?
Jiibu leyi al-wileed.
18 Wa Isa kachcha le l-cheetaan wa l-cheetaan marag min al-wileed wa ajala ke al-wileed ligi al-aafe.
19 Wa baʼadeen al-talaamiiz jo wa hajjo le Isa wiheedhum.
Wa saʼalooh wa gaalo :
Maala ma gidirna taradna al-cheetaan ?
20 Wa radda leehum wa gaal :
Achaan iimaanku daʼiif.
Wa nuguul leeku al-hagg,
kan iimaanku kabiir misil kireeb bas,
tuguulu le l-hajar da «
azhaf min hini wa amchi hinaak »
wa l-hajar yazhaf.
Wa ayyi cheyy yabga leeku mumkin.
21 Wa laakin al-cheetaan al-nafar da ma bintarid illa be l-duʼa wa l-siyaam.
Al-Masiih hajja battaan be mootah
22 Wa wakit Isa wa talaamiizah gaaʼidiin yilimmu fi l-Jaliil,
Isa gaal leehum :
Baʼad chiyya Allah yisallim Ibn al-Insaan le l-naas.
23 Wa yaktuluuh wa fi talaata yoom Allah yabʼasah min ust al-maytiin.
Wa bigo haznaaniin bilheen.
Miiri hana Beet Allah
24 Wa baʼad wislo fi hillit Kafar Naahuum,
al-naas jo al-bichiilu al-miiri al-kulla l-Yahuud bikaffuuh le Beet Allah.
Wa jo le Butrus wa gaalo :
Sayyidku bikaffi al-miiri walla ?
Wa radda leehum wa gaal :
Aywa,
bikaffiih.
25 Wa Butrus andassa fi l-beet wa ajala Isa hajja leyah wa saʼalah wa gaal :
Simʼaan,
fikrak chunu ?
Al-muluuk al-fi l-dunya bichiilu miiri wa jamaarik min yaatu ?
Yichiilu min iyaalhum walla min al-naas al-aakhariin ?
26 Wa Butrus radda leyah wa gaal :
Bichiiluuh min al-naas al-aakhariin.
Wa Isa gaal leyah :
Khalaas,
ma waajib le iyaal al-malik bikaffuuh.
27 Wa laakin ma nidooru nibachtunu al-naas al-saʼalook al-miiri dool.
Wa achaan da,
amchi fi khachum al-bahar wa azgul jambaatak fi l-almi.
Wa l-huutaay al-awwal takrubha,
fukk khachumha wa talga daakhal riyaal waahid khiimtah tikaffi miiri hana naaseen.
Wa chiilah wa kaffi beyah miiri hanaayi wa miiri hanaak.