Kitaab al‑Ruʼya
Mugaddima
Al‑Ruʼya hi al‑juzu al‑akhiir fi Injiil al‑Masiih. Wa kitaab al‑Ruʼya da, Allah antaah achaan yijahhiz al‑muʼminiin le l‑taʼab wa l‑moot wa kumaalit al‑dunya.
Wa l‑kitaab da ma yichaabih ayyi juzu aakhar fi l‑Injiil. Al‑Masiih gaaʼid maʼa Allah fi l‑samaawaat wa baan le l‑rasuul Yuuhanna wa wassafah ruʼya. Wa Yuuhanna katabha achaan yirassilha le l‑muʼminiin. Wa l‑Ruʼya awwal rassalooha le l‑Masiihiyiin al‑saakniin fi sabʼa hillaal fi balad Aasiya wa di balad waahide al‑haaliiyan gaaʼide fi Turkiya.
Wa kalaam al‑kitaab da ma bichaabih maktuub hana wasaaya wa la taʼliim wa la taariikh. Sayyidna Yuuhanna chaaf cheyy ajiib wa simiʼ kalaam ajiib wa katabah kulla ke wa kulla l‑kalaam da bidoor tafsiir. Wa maʼana hana ayyi cheyy al‑fi l‑juzu da chiyya mulabbad. Masalan, sayyidna Yuuhanna chaaf hamal waagif misil awwal dabahooh. Wa l‑Hamal al‑dabahooh yimassil al‑Masiih achaan hu maat le yafda al‑naas be ruuhah wa hu baʼas min al‑moot wa anrafaʼ wa gaaʼid giddaam arch Allah.
Wa misil da, al‑Ruʼya tigaddim leena al‑hagg al‑maʼruuf be suura maktuuba. Wa kan nidooru nafhamooh, waajib nifakkuru fi l‑kalaam da achaan naʼarfu al‑cheyy al‑Yuuhanna chaafah wa nifassuruuh be tariiga sahiihe. Al‑Kitaab al‑Mukhaddas indah ajza aakhariin al‑kalaamhum kalaam mulabbad, masalan kutub al‑anbiya Danyaal wa Hizgiyaal wa Zakariiya.
Wa kalaam al‑Ruʼya bukhuss al‑wakit hana l‑naas al‑awwal simʼo al‑kitaab da wa battaan bukhuss wakitna kula. Wa yiwassif kadar taʼab chadiid yaji fi l‑muʼminiin wa kubaaraat al‑naas yikhaalufu kalaam Allah laakin al‑muʼminiin waajib yagoodu saabtiin lahaddi l‑moot. Wa fi l‑akhiir, Allah yihaasib kulla l‑naas wa l‑naas al‑hassaʼ induhum gudra wa gaaʼidiin yitaʼʼubu al‑muʼminiin, Allah yidammirhum marra waahid.
Wa le ayyi naadum al‑yagri al‑kitaab da, khalli Allah yantiih baraka kaamile. Aamiin.