Jawaabaat al‑rasuul Yuuhanna
Mugaddima
Al‑hamdulillah, Allah bayyan mahabbitah al‑kabiire le l‑naas fi Ibnah Isa al‑Masiih. Hu bayyanaaha be amalah wa be kalaamah wa khaassatan be mootah fi l‑saliib. Wa Allah sawwa al‑Masiih masal le l‑muʼminiin le yiwassifhum kikkeef yirraayado ambeenaathum.
Wa l‑rasuul Yuuhanna wileed Zabadi raakh maʼa l‑Masiih wa hu mawjuud fi bakaan al‑saliib wa chaaf al‑Masiih wakit hu baʼas min ust al‑maytiin. Wa hu katab al‑jawaabaat al‑talaata dool be gudrat al‑Ruuh al‑Khudduus wa be izin Allah. Wa hu katabaahum achaan muchkila waahide gammat fi ust al‑Masiihiyiin fi l‑balad al‑hu gaaʼid foogha. Fi naas waahidiin al‑yuguulu humman muʼminiin wa bado yaabo chahaadat al‑rusul wa yuguulu kalaam chig fi l‑Masiih wa mootah. Wa ma yitaabuʼu al‑haal al‑saalhe al‑waajbe le l‑muʼminiin.
Wa Yuuhanna katab al‑jawaab al‑awwal le kulla l‑muʼminiin. Wa l‑taani, katabah le jamaaʼat al‑muʼminiin al‑hu yidoor yamchi leehum achaan yichajjiʼhum fi l‑muchkila di.
Yuuhanna indah rafiig usmah Khaayus wa hu muʼmin saadikh wa saabit. Wakit waahid, Yuuhanna katab jawaab aamm. Wa wakit al‑jawaab al‑aamm da wisil fi l‑hille al‑saakin foogha Khaayus, al‑naadum al‑sawwa nafsah kabiir fi l‑muʼminiin aba ma yakhbalah. Wa be da, al‑muʼminiin fi l‑hille di ma gidro yasmaʼo kalaam al‑rasuul Yuuhanna. Wa achaan da, Yuuhanna katab al‑jawaab al‑taalit wa rassalah le rafiigah Khaayus.
Wa l‑hamdulillah, al‑muchkila al‑Yuuhanna dawwar yihillaha kammalat min zamaan. Laakin fi machaakil aakhariin fi ust al‑naas wa taʼliimah indah faayde fi ayyi wakit wa fi ayyi bakaan. Khalli Allah yiʼaawin ayyi naadum al‑yagriih achaan yitabbigah wa yagood saabit fi l‑hagg. Aamiin.