Jawaab le Tiitus
min jawaabaat al‑rasuul Buulus
Mugaddima
Buulus hu rasuul hana Isa al‑Masiih wa beyah Allah antaana taʼliim katiir. Al‑jawaab da gisayyir laakin indah faayde katiire. Al‑rasuul katabah be izin Allah wa be gudrat al‑Ruuh al‑Khudduus.
Al‑jawaab da ankatab fi nafs al‑wakit al‑ankatab foogah al‑jawaab al‑awwal le Timuutaawus. Al‑rasuul gaʼad santeen fi l‑sijin fi Rooma wa l‑kalaam da talgooh fi kitaab Aʼmaal al‑Rusul fasul 28. Wa baʼad da, talago le Buulus min al‑sijin wa hu gamma yisaafir battaan le yiballikh bichaarat al‑Masiih. Wa gubbaal ma yakurbuuh taani marra fi l‑sijin, Buulus katab al‑jawaab le Tiitus da.
Wa Tiitus hu waahid min al‑naas al‑khadamo maʼa l‑rasuul Buulus fi ballikhiin bichaarat al‑Masiih. Al‑rasuul Buulus macha maʼa Tiitus le jaziirat Kiriit al‑gaaʼide fi l‑bahar al‑Abyad al‑Mutawassit wa ballakho kalaam Allah le naas al‑jaziira di. Wakit al‑rasuul Buulus macha giddaam, hu khalla Tiitus fi Kiriit achaan yitammim al‑khidme al‑badooha sawa. Wakit Buulus lissaaʼ gaaʼid maʼaayah, hu anta Tiitus wasaaya fi l‑cheyy al‑bukhuss nizaam al‑Masiihiyiin. Wa fi l‑jawaab da, hu karrar al‑kalaam da wa wassafah al‑taʼliim al‑muhimm al‑waajib yiʼallimah le kulla l‑naas.
Khalli Allah yibaarik ayyi naadum al‑yagriih. Aamiin.