كتاب مَلاخِـي
من كتب الأنبياء
مقدمة
الأُسُم مَلاخِـي بكلام عِبْرَانِي دا معناته رسولي. مَلاخِـي هو نبي الكلّم لناس بني إسرائيل بعد همن قبّلوا من الغُرْبة و سِمْعوا كلام الأنبياء حَقَّاي و زَكَرِيَّا و بنوا بتان بيت اللّه في مدينة القدس. و مَلاخِـي حجّى وكت نَحَمْيا قاعد في مدينة القدس.
في الوكت دا، الناس قاعدين يرْجوا بعشم كدر اللّه يجيب ليهم الراحة و السلام. و لاكن الوكت القاعدين يرْجوه دا ما جاء ليهم عجلة. و دا أشان رجال الدين ما أحْترموا اللّه و ما طبّقوا قوانينه و دايْماً يغُشّوا اللّه بضحايا نِجْسين. اللّه هو ملك كبير في الأُمم و لاكن بني إسرائيل قاعدين يحْقُروه.
و الشعب كل قاعدين يسوّوا خطا. ياخُدوا عوين اليعبُدن أصْنام و يطلُّقوا عوينهم الهِنّ من بني إسرائيل. و بتان أبوا ما يجيبوا الزكاة و العُشُر لبيت اللّه. و في شان دا، مَلاخِـي كلّم للشعب و قال واجِب يغيُّروا حالهم أشان يوم اللّه جايِ الفَوْقه هو يحاكِمهم و يوصِّف ليهم عدالْته. و لاكن قبُل اليوم دا، اللّه يرسِّل رسوله ليِعدِّل ليه الدرِب لجَيْته. و مَلاخِـي هو آخِر نبي في كتاب العهد القديم.