صلاة حَبَقُوق
٣
١ دِي صَلَاةْ النَّبِي حَبَقُوقْ وَ هِي غِنَيْ شَكْوَةْ.
٢ يَا اللّٰهْ،
أَنَا سِمِعْت بَيْك
وَ خُفْت.
يَا اللّٰهْ،
سَوِّي فِعِلَكْ فِي طُولْ السِّنِينْ
وَ عَرِّفْنَا بَيَّهْ فِي طُولْ الْأَيَّامْ.
وَ فِي وَكِتْ غَضَبَكْ كُلَ،
أَرْحَمْنَا.
٣ وَ الرَّبّ جَاءْ مِنْ بَلَدْ تَيْمَانْ.
أَيْوَى،
الْقُدُّوسْ جَاءْ مِنْ جَبَلْ فَارَانْ.
وَقْفَةْ.
مَجْدَهْ مَلَا السَّمَاوَاتْ
وَ شُكْرَهْ غَطَّى الْأَرْض.
٤ وَ ضَيَّهْ هُو نُورْ شَدِيدْ
وَ بَرَّاقَةْ تَبْرُقْ مَرَّتَيْن مِنْ إِيدَهْ
وَ دَا بَسْ بَكَانْ مُلَّبِّدْ عِزَّهْ.
٥ الْوَبَاءْ مَاشِي قِدَّامَهْ
وَ الْمَرَضْ مُلَقِّطْ دَرْبَهْ.
٦ هُو وَقَفْ وَ الْأَرْض أَنْهَزَّتْ
وَ هُو شَافْ وَ الْأُمَمْ رَجَّفَوْا.
الْجِبَالْ الْقَدِيمِينْ أَلْفَتْفَتَوْا
وَ الْحُجَارْ الدَّايْمِينْ أَلْكَسَّرَوْا
وَ الدُّرُوبْ الدَّايْمِينْ هِنَيْه هُو.
٧ وَ أَنَا شِفْت فُرْقَانْ شَعَبْ كُشَانْ
بِقَوْا مَا فِيهُمْ.
وَ سَتَايِرْ خِيَمْ بَلَدْ مِدْيَانْ
أَنْهَزَّوْا قِدَّامَهْ.
٨ يَا اللّٰهْ،
وَكِتْ رِكِبْت خَيْلَكْ
وَ عَرَبَاتَكْ هَنَا النَّصُرْ،
غِضِبْت غَضَبْ شَدِيدْ
ضِدّ الرُّجُولْ وَلَّا؟
زَعَلَكْ ضِدّ الرُّجُولْ
وَ غَضَبَكْ ضِدّ الْبَحَرْ وَلَّا؟
٩ إِنْتَ سَلَّيْت نُبَّالَكْ وَ نَشَاشِيبَكْ
وَ دَا الْكَلَامْ الْإِنْتَ حَلَفْت بَيَّهْ.
وَقْفَةْ.
وَ شَقَّقْت الْأَرْض
وَ الرُّجُولْ مَرَقَوْا.
١٠ وَ الْجِبَالْ شَافَوْك
وَ رَجَفَوْا.
وَ الْمَطَرْ صَبَّ أَلْمِي كَتِيرْ
لَحَدِّي حِسّ الْبَحَرْ الْغَرِيقْ أَنْسَمَعْ
وَ هُو هَاجْ وَ طَلَعْ لَحَدِّي فَوْق.
١١ وَ مِنْ نُورْ نَشَاشِيبَكْ
وَ بَرَقَانْ حَرِبْتَكْ،
الْحَرَّايْ وَ الْقَمَرْ
وَقَفَوْا بَكَانْ وَاحِدْ.
١٢ وَ بِغَضَبْ،
إِنْتَ رَايِغْ فِي الْأَرْض
وَ بِزَعَلْ،
إِنْتَ فَجَّقْت الْأُمَمْ.
١٣ وَ إِنْتَ مَرَقْت لِتِنَجِّي شَعَبَكْ
وَ تِنَجِّي النَّادُمْ الْإِنْتَ مَسَحْتَهْ
وَ دَرَّجْتَهْ مَلِكْ.
وَ دَمَّرْت بَيْت الشَّرِيرْ.
أَيْوَى،
هُو أَنْهَدَمْ مِنْ رَاسَهْ لَحَدِّي أَسَاسَهْ.
وَقْفَةْ.
١٤ وَ إِنْتَ طَعَّنْت كُبَارَاتْ الْعَدُو
بِنَشَاشِيبْهُمْ حَلَالْهُمْ فِي رُوسَيْهُمْ
وَكِتْ هُمَّنْ جَايِينْ بِسُرْعَةْ مِثِلْ الرِّيحْ
لِيِشَتُّتُونَا بِكُرَوْرَاكْ هَنَا فَرَحْ.
وَ دَا مِثِلْ يَاكُلُونَا بِعَشِيرْ،
أَنِحْنَ الْمَسَاكِينْ.
١٥ وَ إِنْتَ فَكَّيْت دَرِبْ لِخَيْلَكْ فِي لُبّ الْبَحَرْ
وَ فِي أُسْط الْمَوْج الشَّدِيدْ.
١٦ مِنْ أَنَا سِمِعْت بِجَيْتَكْ،
قَلْبِي رَجَفْ
وَ مِنْ سِمِعْت حِسَّكْ،
شَلَالِيفِي رَجَفَوْا
وَ عُضَامِي مَاعَوْا.
وَ أَنَا وَقَفْت بَكَانْ وَاحِدْ
وَ قَاعِدْ نَرْجِفْ.
وَ هَسَّعْ،
نَرْجَى يَوْم الضِّيقَةْ
الْيَجِي فَوْق عَدُونَا.
١٧ حَتَّى كَانْ التِّينْ مَا يِنَوِّرْ
وَ شَدَرْ الْعِنَبْ مَا يَلْدَ
وَ الزَّيْتُونْ مَا يُقُمّ
وَ الزَّرَعْ مَا يِقَوِّمْ مَعَاشْ
وَ الْغَنَمْ يَبْقَوْا مَا فِيهُمْ فِي الزَّرِيبَةْ
وَ الْبَقَرْ يَبْقَوْا مَا فِيهُمْ فِي الدَّوْر،
١٨ بَيْدَا كُلَ،
أَنَا نِنْبَسِطْ بِاللّٰهْ
وَ نَفْرَحْ بِإِلٰـهِي الْيِنَجِّينِي.
١٩ اللّٰهْ هُو رَبِّي وَ قُدُرْتِي
وَ هُو سَوَّى رِجِلَيْنِي خُفَافْ
مِثِلْ رِجْلَيْ الْغَزَالَةْ.
وَ هُو قَاعِدْ يُقُودْنِي
وَ فِي الْبَكَانْ الْعَالِي،
يِوَدِّينِي.
وَصِيَّةْ لِكَبِيرْ الْغَنَّايِينْ:
لِيِغَنُّوهْ بِجِقِنْدِيَّةْ.