يُونُس 4

اللّه حنّ في سُكّان نِينَوَى

١ وَ وَكِتْ يُونُسْ عِرِفْ كَدَرْ اللّٰهْ خَلَّى غَضَبَهْ دَا، زِعِلْ زَعَلْ شَدِيدْ. ٢ وَ صَلَّى لِلّٰهْ وَ قَالْ: «عَجَبْ، يَا اللّٰهْ. دَا مَا الشَّيّءْ الْأَنَا قُلْتَهْ وَكِتْ أَنَا لِسَّاعْنِي فِي بَلَدِي وَلَّا؟ أَشَانْ دَا بَسْ أَنَا عَرَّدْت لِنَمْشِي تَرْشِيشْ. يَا اللّٰهْ، نَعَرِفْ كَدَرْ إِنْتَ الرَّحْمـٰنْ الرَّحِيمْ وَ الصَّبُورْ وَ الْمُحِبّ زِيَادَةْ وَ تِخَلِّي الْغَضَبْ الْأَوَّلْ قَرَّرْت تِنَزِّلَهْ فِي النَّاسْ. ٣ يَا اللّٰهْ، هَسَّعْ دَا خَلَاصْ. شِيلْ رُوحِي. الْمَوْت أَخَيْر لَيِّ مِنْ الْحَيَاةْ.» ٤ وَ اللّٰهْ قَالْ لَيَّهْ: «إِنْتَ دَا! عِنْدَكْ حَقّ تَزْعَلْ وَلَّا؟»

٥ وَ يُونُسْ مَرَقْ مِنْ نِينَوَى وَ مَشَى قَعَدْ صَبَاحْ مِنْ الْمَدِينَةْ. وَ سَوَّى لَيَّهْ لِقْدَابَةْ وَ قَعَدْ فَوْقهَا فِي الضُّلّ أَشَانْ يِشِيفْ الشَّيّءْ الْيَبْقَى فِي الْمَدِينَةْ دِي. ٦ وَ اللّٰهْ الرَّبّ قَوَّمْ شِدَيْرَةْ أَشَانْ تِسَوِّي ضُلّ لِيُونُسْ وَ تِفَرِّحَهْ مِنْ زَعَلَهْ. وَ خَلَاصْ، يُونُسْ فِرِحْ فَرْحَةْ شَدِيدَةْ بِالشِّدَيْرَةْ دِي. ٧ وَ لَاكِنْ أَمْبَاكِرْ بِفَجُرْ بَدْرِي، الرَّبّ رَسَّلْ دُودَايْ أَكَلَتْ الشِّدَيْرَةْ دِي وَ هِي يِبْسَتْ. ٨ وَ وَكِتْ الْحَرَّايْ طَلَعَتْ، الرَّبّ رَسَّلْ رِيحْ حَامِيَةْ مِنْ الصَّبَاحْ. وَ الْحَرَّايْ طَقَّتْ يُونُسْ فِي رَاسَهْ لَحَدِّي يِدَوْر يَغْمَرْ. وَ دَوَّرْ يُمُوتْ وَ قَالْ: «الْمَوْت أَخَيْر لَيِّ مِنْ الْحَيَاةْ.»

٩ وَ الرَّبّ قَالْ لِيُونُسْ: «إِنْتَ عِنْدَكْ حَقّ تَزْعَلْ فِي شَانْ الشِّدَيْرَةْ دِي وَلَّا؟» وَ يُونُسْ رَدَّ لَيَّهْ وَ قَالْ: «أَيْوَى، عِنْدِي حَقّ نَزْعَلْ لَحَدِّي نِدَوْر الْمَوْت.» ١٠ وَ لَاكِنْ اللّٰهْ قَالْ لَيَّهْ: «أَسْمَعْ. إِنْتَ حَنَّيْت فِي الشِّدَيْرَةْ الْمَا مَقَّنْتَهَا وَ لَا تِعِبْت فَوْقهَا. هِي قَمَّتْ فِي يَوْم وَاحِدْ وَ مَاتَتْ فِي الْيَوْم التَّانِي. ١١ شِيفْ نَاسْ هَنَا نِينَوَى، الْمَدِينَةْ الْكَبِيرَةْ، الْعِنْدَهَا زِيَادَةْ مِنْ 120 000 نَاسْ الْمَا يَعَرْفُوا زَيْن وَ لَا فَسِلْ. وَ عِنْدَهَا بَهَايِمْ كَتِيرِينْ كُلَ. كِكَّيْف أَنَا مَا نِحِنّ فَوْقهُمْ؟»