الرُؤية الأوّل هنت الجراد
٧
١ دَاهُو الشَّيّءْ الْاللّٰهْ الرَّبّ وَصَّفَهْ لَيِّ أَنَا عَمُوسْ.
اللّٰهْ قَاعِدْ يِجَهِّزْ جَرَادْ وَكِتْ الْكِشَّيْب بَدَا يَمْرُقْ وَ دَا بَعَدْ الْقَنَادِيلْ الْأَوَّلْ قَطَعَوْهُمْ لِلْمَلِكْ.
٢ وَ وَكِتْ الْجَرَادْ جَاءْ أَكَلْ كُلَّ الْخَضَارْ هَنَا الْبَلَدْ،
أَنَا قُلْت:
«يَا اللّٰهْ الرَّبّ،
مِنْ فَضْلَكْ أَغْفِرْ!
ذُرِّيَّةْ يَعْقُوبْ مَا يَقْدَرَوْا يَحْمَلَوْه
أَشَانْ هُمَّنْ ضَعِيفِينْ.»
٣ وَ خَلَاصْ،
اللّٰهْ عَفَاهُمْ وَ قَالْ:
«الشَّيّءْ دَا مَا يُكُونْ.»
الرُؤية التانية هنت النار
٤ وَ دَاهُو الشَّيّءْ الْوَصَّفَهْ لَيِّ اللّٰهْ الرَّبّ.
هُو أَمَرْ النَّارْ تَنْزِلْ لِيِعَاقِبْ بَيْهَا النَّاسْ.
وَ تِيَبِّسْ الْأَلْمِي الْفِي تِحِتْ الْأَرْض وَ تَاكُلْ كُلَّ أَرْض إِسْرَائِيلْ.
٥ وَ فِي الْبَكَانْ دَا،
أَنَا قُلْت:
«يَا اللّٰهْ الرَّبّ،
مِنْ فَضْلَكْ الشَّيّءْ دَا وَقِّفَهْ!
ذُرِّيَّةْ يَعْقُوبْ مَا يَقْدَرَوْا يَحْمَلَوْه
أَشَانْ هُمَّنْ ضَعِيفِينْ.»
٦ وَ خَلَاصْ،
اللّٰهْ الرَّبّ عَفَاهُمْ وَ قَالْ:
«الشَّيّءْ دَا مَا يُكُونْ.»
رُؤية الحبِل اليقاوُسوا بيه
٧ وَ دَاهُو أَنَا شِفْت بَتَّانْ فِي الرُّؤْيَةْ الرَّبّ وَاقِفْ جَنْب دُرْدُرْ وَ فِي إِيدَهْ عِنْدَهْ حَبِلْ الْيِقَاوُسُوا بَيَّهْ الْبُنَى.
٨ وَ اللّٰهْ قَالْ لَيِّ:
«شِفْت شُنُو،
يَا عَمُوسْ؟»
وَ أَنَا قُلْت:
«حَبِلْ الْيِقَاوُسُوا بَيَّهْ.»
وَ الرَّبّ قَالْ لَيِّ:
«دَاهُو شَعَبِي بَنِي إِسْرَائِيلْ هُمَّنْ مِثِلْ الدُّرْدُرْ الْأَعْوَجْ بِفِعِلْهُمْ الشَّيْن.
وَ أَشَانْ دَا،
بَتَّانْ مَا نَغْفِرْ لَيْهُمْ.
٩ أَنَا نِهَدِّمْ الْبَكَانَاتْ الْعَالِيِينْ هَنَا عِبَادَةْ ذُرِّيَّةْ إِسْحَاقْ وَ نِكَسِّرْ مَدَابِحْ بَنِي إِسْرَائِيلْ وَ نِقَوِّمْ حَرِبْ ضِدّ عَايِلَةْ الْمَلِكْ يَرُبَعَامْ.»
عَمُوس طردوه من بيت إيل
١٠ وَ فِيَّهْ رَاجِلْ دِينْ وَاحِدْ مِنْ حِلَّةْ بَيْت إِيلْ أُسْمَهْ أَمَصْيَا.
وَ الرَّاجِلْ دَا رَسَّلْ لِيَرُبَعَامْ مَلِكْ مَمْلَكَةْ إِسْرَائِيلْ وَ قَالْ لَيَّهْ:
«عَمُوسْ قَاعِدْ يِحَرِّشْ الشَّعَبْ أَشَانْ مَا يِتَابُعُوكْ.
وَ بَنِي إِسْرَائِيلْ مَا يَقْدَرَوْا يَحْمَلَوْا كُلَّ الْكَلَامْ الْهُو قَاعِدْ يُقُولَهْ.
١١ أَشَانْ عَمُوسْ قَالْ:
‹الْمَلِكْ يَرُبَعَامْ،
عُدْوَانَهْ يَكْتُلُوهْ!
وَ بَنِي إِسْرَائِيلْ كُلَ،
يَكُرْبُوهُمْ وَ يِوَدُّوهُمْ فِي الْغُرْبَةْ بَعِيدْ مِنْ بَلَدْهُمْ.›»
١٢ وَ خَلَاصْ،
أَمَصْيَا قَالْ لِعَمُوسْ:
«قُمّ،
يَا شَوَّافِي!
قَبِّلْ أَمْشِي لِبَلَدْ يَهُوذَا وَ هِنَاكْ أَبْقَى نَبِي وَ تَلْقَى رِزْقَكْ.
١٣ وَ لَاكِنْ مَا تِتْنَبَّأْ بَتَّانْ فِي بَيْت إِيلْ أَشَانْ دَا بَكَانْ الْعِبَادَةْ هَنَا الْمَلِكْ.»
١٤ وَ عَمُوسْ رَدَّ لِأَمَصْيَا وَ قَالْ:
«أَنَا وَ لَا نَبِي وَ لَا وِلَيْد نَبِي.
أَنَا رَاعِي وَ حَرَّاتِي هَنَا تِينْ.
١٥ لَاكِنْ اللّٰهْ بَسْ نَادَانِي وَكِتْ أَنَا قَاعِدْ نَسْرَحْ بِغَنَمِي وَ قَالْ لَيِّ:
‹أَمْشِي أَتْنَبَّأْ لِشَعَبِي بَنِي إِسْرَائِيلْ.›
١٦ وَ هَسَّعْ دَا،
يَا أَمَصْيَا،
أَسْمَعْ كَلَامْ اللّٰهْ.
إِنْتَ قُلْت لَيِّ أَنَا مَا نِتْنَبَّأْ فِي بَنِي إِسْرَائِيلْ وَ لَا نِحَجِّي لِذُرِّيَّةْ إِسْحَاقْ.
١٧ وَ فِي شَانْ دَا،
دَاهُو اللّٰهْ قَالْ:
‹مَرْتَكْ تَبْقَى شَرْمُوطَةْ فِي لُبّ الْحِلَّةْ
وَ أَوْلَادَكْ وَ بَنَاتَكْ يَكْتُلُوهُمْ بِالْسَّيْف.
وَ يِشِيلُوا أَرْضَكْ
وَ يِقَسُّمُوا زِرَاعْتَكْ لِعُدْوَانَكْ.
وَ إِنْتَ كَمَانْ تُمُوتْ
فِي بَلَدْ الْكُفَّارْ
وَ بَنِي إِسْرَائِيلْ يَكُرْبُوهُمْ
وَ يِوَدُّوهُمْ فِي الْغُرْبَةْ.›»