قَرَار اللّه ضِدّ عوين السَامِرَة
٤
١ أَسْمَعَنْ،
يَا الْعَوِينْ
الْقَاعِدَاتْ فِي جِبَالْ مَدِينَةْ السَّامِرَةْ!
إِنْتَنْ مِثِلْ بَقَرْ
الْيَسْرَحَوْا فِي مَرْعَى بَاشَانْ.
إِنْتَنْ تَظُلْمَنْ الْمَسَاكِينْ
وَ تِتَعِّبَنْ الْفَقْرَانِينْ.
وَ تَامُرَنْ سِيَادْ بُيُوتْكَنْ
وَ تُقُولَنْ:
«جِيبْ لَيِّ نَشْرَبْ!»
٢ وَ خَلَاصْ،
اللّٰهْ الرَّبّ حَلَفْ
بِأُسْمَهْ الْقُدُّوسْ وَ قَالْ:
«يَجِي لَيْكَنْ يَوْم وَاحِدْ الْفَوْقَهْ
يَكُرْبُوكَنْ مِثِلْ حُوتْ بِجَنْبَاتْ
وَ عِيَالْكَنْ يَطْعَنَوْهُمْ بِكَوْكَابْ.
٣ وَ أَيِّ وَاحِدَةْ تَمْرُقْ بِخُرْمَةْ الدُّرْدُرْ
وَ يِوَدُّوهَا عَلَيْ جَبَلْ حَرْمُونْ.»
وَ دَا كَلَامْ اللّٰهْ.
الشعب فاشروا بهداياهم
٤ «وَ كَنْ أَبَيْتُوا كَلَامِي أَنَا اللّٰهْ،
خَلَاصْ أَمْشُوا بَيْت إِيلْ* وَ أَعَصَوْا
وَ أَمْشُوا قِلْقَالْ وَ زِيدُوا عِصْيَانْكُو.
وَ كُلِّ صَبَاحْ،
قَدُّمُوا ضَحَايَاكُو
وَ أَيِّ تَلَاتَةْ يَوْم،
أَنْطُوا عُشُورْكُو.
٥ وَ حَرُّقُوا خُبْزَةْ بَلَا تَوَّارَةْ هَدِيَّةْ شُكُرْ
وَ فَاشُرُوا بِالْهَدَايَا
التِّقَدُّمُوهُمْ لِلّٰهْ بِنِيِّتْكُو.
وَ دَا بَسْ الشَّيّءْ الْيَعَجِبْكُو إِنْتُو،
يَا بَنِي إِسْرَائِيلْ.»
وَ دَا كَلَامْ اللّٰهْ الرَّبّ.
بني إسرائيل أخّروا التَوْبة
٦ «أَنَا جِبْت لَيْكُو الْجُوعْ
فِي كُلَّ مُدُنْكُو وَ بُيُوتْكُو.
مَا فِي شَيّءْ التِّدِسُّوهْ فِي خُشُومْكُو
وَ بَيْدَا كُلَ،
مَا تُبْتُوا.»
وَ دَا كَلَامْ اللّٰهْ.
٧ «وَ فِي وَكْت الْعِينَةْ بَسْ،
أَنَا مَنَعْت مِنْكُو الْمَطَرْ.
وَ نَزَّلْت الْمَطَرَةْ فِي حِلَّةْ وَاحِدَةْ
وَ فِي حِلَّةْ آخَرَةْ كَمَانْ،
أَنَا مَا نَزَّلْتَهَا.
وَ نَزَّلْت الْمَطَرَةْ فِي زَرَعْ وَاحِدْ
وَ زَرَعْ آخَرْ يِبِسْ.
٨ وَ نَاسْ مُدُنْ إِتْنَيْن أَوْ تَلَاتَةْ
مَشَوْا لِمَدِينَةْ وَاحِدَةْ
لِيَشَرْبَوْا أَلْمِي.
لَاكِنْ مَا لِقَوْا أَلْمِي الْيَرْوِيهُمْ
وَ بَيْدَا كُلَ،
مَا تُبْتُوا.»
وَ دَا كَلَامْ اللّٰهْ.
٩ «وَ أَنَا نَزَّلْت وَبَاءْ الْيَبَاسْ
وَ بَتَّانْ عَفَّنْت نَبَاتَاتْكُو.
وَ الْجَرَادْ أَكَلْ جِنَيْنَاتْكُو
وَ عِنَبْكُو وَ تِينْكُو وَ زَيْتُونْكُو
وَ بَيْدَا كُلَ،
مَا تُبْتُوا.»
وَ دَا كَلَامْ اللّٰهْ.
١٠ «وَ نَزَّلْت فَوْقكُو الْوَبَاءْ
مِثِلْ أَنَا نَزَّلْتَهْ فِي بَلَدْ مَصِرْ.
وَ صُبْيَانْكُو مَاتَوْا فِي الْحَرِبْ
وَ خَيْلكُو كُلَ أَنْشَالَوْا.
وَ شَمَّيْتُوا عَفَنَةْ الْجَنَازَاتْ
فِي مُعَسْكَرَاتْكُو
وَ بَيْدَا كُلَ،
مَا تُبْتُوا.»
وَ دَا كَلَامْ اللّٰهْ.
١١ «وَ دَمَّرْتُكُو
مِثِلْ دَمَّرْت حِلَّالْ سَدُومْ وَ عَمُورَةْ
وَ دَمَارْهُمْ دَا جَاءْ مِنِّي أَنَا إِلٰـهُّمْ.
وَ بِقِيتُوا مِثِلْ الْمُشْهَابْ
الْمَرَقَوْه مِنْ النَّارْ
وَ بَيْدَا كُلَ،
مَا تُبْتُوا.»
وَ دَا كَلَامْ اللّٰهْ.
١٢ «وَ دَا كُلَّ نِسَوِّيهْ فَوْقكُو،
يَا بَنِي إِسْرَائِيلْ،
وَ مِثِلْ دَا بَسْ،
نِسَوِّيهْ فَوْقكُو.
جَهُّزُوا نُفُوسْكُو لِمُقَابَلَتِي أَنَا إِلٰـهْكُو،
يَا بَنِي إِسْرَائِيلْ!»
١٣ شِيفُوا اللّٰهْ بَسْ
الْخَلَقْ الْجِبَالْ وَ الرِّيحْ.
هُو بَسْ الْبَيَّنْ لِلْإِنْسَانْ
الشَّيّءْ الْهُو يِدَوْر يِسَوِّيهْ.
وَ هُو بَسْ السَّوَّى النُّورْ ضَلَامْ
وَ هُو بَسْ الْيَحْكِمْ فِي كُلَّ الْأَرْض.
وَ هُو بَسْ أُسْمَهْ اللّٰهْ الْإِلٰـهْ الْقَادِرْ.