حُرّيّة مدينة القدس
٥٢
١ قُمِّي!
قُمِّي فَوْق!
وَ أَبْقَيْ قَوِيَّةْ،
يَا مَدِينَةْ صَهْيُون!
أَلْبَسَيْ خُلْقَانْكِ هَنَا الشَّرَفْ،
يَا مَدِينَةْ الْقُدُسْ،
الْمَدِينَةْ الْمُقَدَّسَةْ!
أَشَانْ بَتَّانْ مَا يَدْخُلْ فَوْقكِ
الْمَا مُطَهَّرْ وَ الْمَا طَاهِرْ.
٢ حِتِّي الْعَجَاجْ مِنْكِ
وَ قُمِّي وَ أَقْعُدِي بِحَيْلكِ،
يَا مَدِينَةْ الْقُدُسْ الْمَسْجُونَةْ!
وَ حِلِّي الْجِنْزِيرْ مِنْ رَقَبَتْكِ،
يَا الْمَكْرُوبَةْ،
يَا صَهْيُون الْمِثِلْ بِنَيَّةْ!
٣ أَشَانْ دَاهُو اللّٰهْ قَالْ:
«بَاعَوْكُو بَلَا تَمَنْ
لَاكِنْ يَفْدَوْكُو بَلَا قُرُسْ.»
٤ وَ دَاهُو اللّٰهْ الرَّبّ قَالْ:
«أَوَّلْ فِي مَصِرْ،
شَعَبِي نَزَلَوْا وَ قَعَدَوْا
وَ فِي الأَخِيرْ،
بَلَدْ أَشُورْ ظَلَمَتْهُمْ.
٥ هَسَّعْ دَا،
نِسَوِّي شُنُو؟
أَشَانْ شَعَبِي وَدَّوْهُمْ بَلَا تَمَنْ.
وَ دَا كَلَامْ اللّٰهْ.
وَ الْيَحْكُمُوا فَوْقهُمْ يِرَقْرُقُوا مِنْ الْفَرَحْ
وَ دَايْماً يَحْقُرُوا أُسْمِي.
وَ دَا كَلَامْ اللّٰهْ.
٦ فِي شَانْ دَا،
شَعَبِي يَعَرْفُوا أُسْمِي
فِي شَانْ دَا،
فِي الْيَوْم دَا يَعَرْفُوا
كَدَرْ أَنَا بَسْ قَاعِدْ نِحَجِّي لَيْهُمْ
وَ نُقُولْ:
‹دَاهُونِي أَنَا.›»
٧ مَرْحَباً بِجَيَّةْ الْمُرْسَالْ فِي الْجِبَالْ
الْيِبَلِّغْ الْبِشَارَةْ
وَ يِخَبِّرْ بِالسَّلَامْ وَ الْخَيْر وَ النَّجَاةْ.
وَ يُقُولْ لِصَهْيُون:
«إِلٰـهْكِ يَحْكِمْ!»
٨ أَسْمَعَيْ!
حُرَّاسْكِ يَرْفَعَوْا حِسُّهُمْ
وَ يِرَقْرُقُوا سَوَا مِنْ الْفَرَحْ!
أَشَانْ بِعُيُونْهُمْ شَافَوْا اللّٰهْ
مُقَبِّلْ لِمَدِينَةْ صَهْيُون!
٩ أَفْرَحَوْا سَوَا وَ رَقْرُقُوا،
يَا مَسَاكِينْ مَدِينَةْ الْقُدُسْ الْخَرْبَانَةْ!
أَشَانْ اللّٰهْ صَبَّرْ شَعَبَهْ
وَ فَدَى مَدِينَةْ الْقُدُسْ.
١٠ وَ اللّٰهْ بَيَّنْ إِيدَهْ الْمُقَدَّسَةْ
لِكُلَّ الْأُمَمْ.
وَ كُلَّ سُكَّانْ الْأَرْض
يِشِيفُوا النَّجَاةْ الْيَنْطِيهَا إِلٰـهْنَا!
١١ سِيرُوا!
سِيرُوا!
أَمُرْقُوا مِنْ هِنَاكْ،
يَا إِنْتُو الشَّايْلِينْ مُعِدَّاتْ اللّٰهْ.
أَمُرْقُوا مِنْ لُبّ بَابِلْ
وَ طَهُّرُوا نُفُوسْكُو
وَ مَا تَلْمَسَوْا شَيّءْ نِجِسْ!
١٢ فِي الْمَرَّةْ دِي،
مَا تَمُرْقُوا بِسُرْعَةْ
وَ مَا تَمُرْقُوا مِثِلْ الْمُعَرِّدِينْ.
أَشَانْ اللّٰهْ بَسْ مَاشِي قِدَّامْكُو
أَيْوَى،
إِلٰـهْ بَنِي إِسْرَائِيلْ بَسْ مَاشِي وَرَاكُو.
عبْد اللّه
١٣ «دَاهُو عَبْدِي يَنْجَحْ
وَ يِنْرَفِعْ وَ يَبْقَى عَالِي
وَ يَلْقَى شَرَفْ مَرَّةْ وَاحِدْ.
١٤ أَوَّلْ،
نَاسْ كَتِيرِينْ أَنْبَهَتَوْا مِنَّهْ
أَشَانْ شَبَهَهْ غَيَّرْ بِقِي شَيْن
لَحَدِّي مَا يِشَابِهْ إِنْسَانْ
وَ شَكْلَهْ مَا يِشَابِهْ شَكِلْ إِبْن آدَمْ.
١٥ وَ لَاكِنْ هَسَّعْ،
أُمَمْ كَتِيرِينْ يِلْعَجَّبَوْا مِنَّهْ
وَ مُلُوكْ يَسْكُتُوا.
أَشَانْ يِشِيفُوا الْمَا حَجَّوْهُمْ بَيَّهْ
وَ يَنْظُرُوا الْمَا سِمْعَوْا بَيَّهْ.»