إشَعْيا يبْقى علامة لمَصِر
٢٠
١ وَ دَاهُو الشَّيّءْ الْكَانْ فِي السَّنَةْ الْفَوْقهَا سَرْقُونْ مَلِكْ أَشُورْ رَسَّلْ قَايِدْ دَيْشَهْ لِيِحَارِبْ مَدِينَةْ أَشْدُودْ وَ يِشِيلْهَا.
٢ وَ قَبُلْ أَشْدُودْ مَا تَقَعْ،
اللّٰهْ حَجَّى بِوَاسِطَةْ النَّبِي إِشَعْيَا وِلَيْد أَمُّوصْ.
وَ هُو قَالْ لِإِشَعْيَا:
«يَلَّا أَمْرُقْ خُلْقَانَكْ هَنَا الْحِزِنْ وَ سِلّ نِعْلَيْك مِنْ رِجِلَيْنَكْ.»
وَ إِشَعْيَا سَوَّى مِثِلْ دَا وَ مَشَى عَرْيَانْ وَ حَفْيَانْ.
٣ وَ اللّٰهْ قَالْ:
«مِثِلْ عَبْدِي إِشَعْيَا مَشَى عَرْيَانْ وَ حَفْيَانْ مُدَّةْ تَلَاتَةْ سَنَةْ،
دَا يَبْقَى عَلَامَةْ وَ شَيّءْ عَجِيبْ لِمَصِرْ وَ الْحَبَشَةْ.
٤ وَ مِثِلْ دَا،
مَلِكْ أَشُورْ يِشِيلْ صُبْيَانْ وَ شِيَّابْ مِنْ مَصِرْ وَ الْحَبَشَةْ وَ يِوَدِّيهُمْ مَسَاجِينْ فِي الْغُرْبَةْ.
وَ النَّاسْ دَوْل يِوَدِّيهُمْ عَرْيَانِينْ وَ حَفْيَانِينْ وَ جَعَبَاتْهُمْ بَرَّا.
وَ دَا عَيْب لِمَصِرْ.
٥ وَ مِثِلْ دَا،
النَّاسْ الْخَطَّوْا عَشَمْهُمْ فِي الْحَبَشَةْ وَ فَاشَرَوْا بِمُسَاعَدَةْ مَصِرْ يِنْبَهْتُوا وَ يِعِيبُوا.
٦ وَ فِي الْيَوْم دَا،
سُكَّانْ خَشُمْ الْبَحَرْ يُقُولُوا:
‹شِيفُوا!
خَطَّيْنَا عَشَمْنَا فَوْقهُمْ لِيَفْزَعَوْنَا وَ يِنَجُّونَا مِنْ مَلِكْ أَشُورْ.
وَ هَسَّعْ دَا،
كِكَّيْف أَنِحْنَ نِنَجُّوا نُفُوسْنَا؟›»