العِقاب ضِدّ كُبارات يَهُوذَا
١٠
١ الْعَذَابْ لِلْيِقَرُّرُوا شُرُوطْ هَنَا فَسَالَةْ
وَ يَكْتُبُوا قَوَانِينْ هَنَا تَعَبْ!
٢ هُمَّنْ يَدْحَرَوْا
الْمِسْكِينْ مِنْ الشَّرِيعَةْ
وَ يَقْلَعَوْا الْحَقّ
مِنْ فَقْرَانْ شَعَبِي.
وَ يَكْسَبَوْا الْأَرَامِلْ
وَ يَنْهَبَوْا الْأَتَامَا.
٣ إِنْتُو تِسَوُّوا شُنُو فِي يَوْم الْعِقَابْ،
وَكِتْ الْهَلَاكْ يَجِي لَيْكُو مِنْ بَعِيدْ؟
لِيَاتُو تَجْرُوا
وَ مِنْ يَاتُو تَلْقَوْا الْفَزَعْ؟
وَ وَيْن تُضُمُّوا غُنَاكُو؟
٤ مَا فَضَّلْ إِلَّا تِدَنْقُرُوا مَعَ الْمَسَاجِينْ
وَ تَقَعَوْا مَعَ الْمَيْتِينْ.
وَ بَيْدَا كُلَ،
زَعَلْ اللّٰهْ مَا يَقِيفْ
وَ إِيدَهْ قَاعِدَةْ مَرْفُوعَةْ لِلْعِقَابْ.
العذاب لبلد أَشُور
٥ الْعَذَابْ لِمَلِكْ بَلَدْ أَشُورْ!
هُو عَصَاةْ زَعَلِي
وَ نِنَزِّلْ غَضَبِي بِالْعَصَاةْ الْفِي إِيدَهْ.
٦ أَنَا نِرَسِّلْ مَلِكْ بَلَدْ أَشُورْ
ضِدّ الْأُمَّةْ الْكَافْرَةْ
وَ نُقُودَهْ ضِدّ الشَّعَبْ
الْيِقَوُّمُوا غَضَبِي
أَشَانْ مَلِكْ أَشُورْ يَنْهَبْهُمْ
وَ يَكْسَبْهُمْ
وَ يِفَجِّقْهُمْ تِحِتْ رِجِلَيْنَهْ
مِثِلْ الطِّينَةْ فِي الشَّوَارِعْ.
٧ وَ لَاكِنْ هُو مَا يَفْهَمْ مِثِلْ دَا
وَ قَلْبَهْ كُلَ مَا يِفَكِّرْ مِثِلْ دَا.
أَشَانْ فِي قَلْبَهْ إِلَّا الدَّمَارْ
وَ كَتِلْ الْأُمَمْ بِكَتَرَةْ.
٨ أَشَانْ هُو قَالْ:
«قُيَّادِي مَا زِيَادَةْ
مِنْ الْمُلُوكْ دَوْل وَلَّا؟
٩ وَ دَمَّرْنَا حِلَّةْ كَلْنَةْ
مِثِلْ حِلَّةْ كَرْكَمِيشْ
وَ حِلَّةْ حَمَاتْ
مِثِلْ حِلَّةْ أَرْفَدْ
وَ مَدِينَةْ السَّامِرَةْ
مِثِلْ مَدِينَةْ دِمَشْق!
١٠ إِيدِي كُلَ دَمَّرَتْ مَمَالِكْ الْإِلٰـهَاتْ
الْأَصْنَامْهُمْ كَتِيرِينْ
مِنْ أَصْنَامْ مَدِينَةْ الْقُدُسْ وَ السَّامِرَةْ.
١١ هَلْ أَنَا مَا نِدَمِّرْ
مَدِينَةْ الْقُدُسْ وَ أَصْنَامْهَا
مِثِلْ دَمَّرْت السَّامِرَةْ وَ إِلٰـهَاتْهَا وَلَّا؟»
١٢ وَ وَكِتْ الرَّبّ يِكَمِّلْ كُلَّ خِدِمْتَهْ فِي جَبَلْ صَهْيُون وَ فِي مَدِينَةْ الْقُدُسْ،
هُو يُقُولْ:
«نُقُمّ ضِدّ أَفْكَارْ الْإِسْتِكْبَارْ هَنَا مَلِكْ بَلَدْ أَشُورْ وَ شَوْفَهْ هَنَا الْبُغُضْ.
١٣ أَشَانْ الْمَلِكْ دَا قَالْ:
‹بِقُدْرَةْ إِيدِي،
أَنَا سَوَّيْت كُلَّ الشَّيّءْ دَا
وَ بِحِكْمَتِي،
أَنَا بِقِيتْ فَاهِمْ.
أَنَا غَيَّرْت حُدُودْ الشُّعُوبْ
وَ نَهَبْت مَالْهُمْ
وَ بِفَرَاسِيَّةْ نَزَّلْت
مُلُوكْ مِنْ كَرَاسِيهُمْ.
١٤ وَ مِثِلْ يِشِيلُوا بَيْض مِنْ الْعُشّ،
أَنَا خَطَفْت غُنَى الشُّعُوبْ.
وَ مِثِلْ يُخُمُّوا الْبَيْض الْخَلَّوْه،
أَنَا خَمَّيْت كُلَّ بُلْدَانْ الْأَرْض.
وَ مَا فِي وَاحِدْ حَرَّكْ جِنْحَهْ
وَ لَا فَكَّ خَشْمَهْ
وَ لَا صَرَخْ ضِدِّي.›»
١٥ وَ اللّٰهْ قَالْ:
«هَلْ الْفَاسْ تِفْشُرْ
فِي سِيدْهَا الْيَقْطَعْ بَيْهَا وَلَّا؟
هَلْ الْمُنْشَارْ يِلْعَلَّى
فِي الْيِسْتَعْمَلَهْ وَلَّا؟
وَ دَا مِثِلْ الْعَصَاةْ تِحَرِّكْ الْإِيدْ التَّرْفَعْهَا
وَلَّا مِثِلْ الدُّقُلْ يِقِلّ الْإِنْسَانْ!
١٦ وَ بِسَبَبْ دَا،
أَنَا اللّٰهْ الرَّبّ الْقَادِرْ نِنَزِّلْ
الْبَطُولْ فِي الْعَسْكَرْ السُّمَانْ هَنَا الْمَلِكْ.
وَ بِعَظَمَتْهُمْ دِي كُلَ،
النَّارْ تَاكُلْهُمْ وَ تَحْرِقْهُمْ.»
١٧ وَ الرَّبّ،
نُورْ إِسْرَائِيلْ،
يَبْقَى مِثِلْ نَارْ
أَيْوَى،
قُدُّوسْ إِسْرَائِيلْ
يَبْقَى مِثِلْ أَمْ بَلْبَالَةْ
الْفِي يَوْم وَاحِدْ بَسْ،
تَاكُلْ وَ تَحْرِقْ
الشَّوْك وَ الْحَسْكَنِيتْ.
١٨ بِالْكَامِلْ،
الرَّبّ يِدَمِّرْ الْغَابَاتْ
وَ الْجِنَيْنَاتْ الْكُبَارْ هَنَا مَلِكْ أَشُورْ.
وَ هُمَّنْ يَبْقَوْا
مِثِلْ مَرْضَانْ الْوَدَّرْ قُدُرْتَهْ.
١٩ وَ يِفَضِّلْ شِيَّةْ بَسْ مِنْ شَدَرْ غَابَاتَهْ
لَحَدِّي صَغِيرْ صَغَيَّرْ كُلَ يَقْدَرْ يَحْسِبْهُمْ.
اليفضُّلوا من بني إسرائيل
٢٠ وَ فِي الْيَوْم دَا،
الْيِفَضُّلُوا مِنْ بَنِي إِسْرَائِيلْ وَ الْمُعَرِّدِينْ وَ النِّجَوْا مِنْ ذُرِّيَّةْ يَعْقُوبْ مَا يِنْتَكْلُوا عَلَيْ مَلِكْ أَشُورْ الضَّرَبَاهُمْ.
وَ لَاكِنْ يِنْتَكْلُوا بِأَمَانْ عَلَيْ اللّٰهْ قُدُّوسْ إِسْرَائِيلْ.
٢١ وَ الْيِفَضُّلُوا يِقَبُّلُوا.
أَيْوَى،
الْيِفَضُّلُوا مِنْ ذُرِّيَّةْ يَعْقُوبْ يِقَبُّلُوا لِلّٰهْ الْقَادِرْ.
٢٢ يَا بَنِي إِسْرَائِيلْ،
كَنْ شَعَبْكُو بِقَوْا كَتِيرِينْ مِثِلْ رَمْلَةْ هَنَا خَشُمْ الْبَحَرْ كُلَ،
الْيِقَبُّلُوا مِنْكُو شِيَّةْ بَسْ.
قَرَارْ الدَّمَارْ مَرَقْ وَ هُو قَرَارْ مَلَانْ بِالْعَدَالَةْ.
٢٣ وَ خَلَاصْ،
قَرَارْ الدَّمَارْ دَا مَرَقْ وَ أَكِيدْ اللّٰهْ الرَّبّ الْقَادِرْ يِطَبِّقَهْ فِي كُلَّ الْبَلَدْ.
اللّه يقُمّ ضِدّ بلد أَشُور
٢٤ وَ فِي شَانْ دَا،
دَاهُو اللّٰهْ الرَّبّ الْقَادِرْ قَالْ:
«يَا شَعَبِي السَّاكْنِينْ فِي مَدِينَةْ صَهْيُون،
مَا تَخَافَوْا مِنْ مَلِكْ بَلَدْ أَشُورْ.
هُو قَاعِدْ يَضْرُبْكُو بِعَصَاتَهْ وَ يَرْفَعْ عَصَاتَهْ ضِدُّكُو مِثِلْ سَوَّوْه الْمَصْرِيِّينْ زَمَانْ.
٢٥ هَسَّعْ فَضَّلْ وَكِتْ شِيَّةْ بَسْ،
غَضَبِي ضِدُّكُو يَقِيفْ وَ لَاكِنْ زَعَلِي يِدَمِّرْ عَسْكَرْ بَلَدْ أَشُورْ.»
٢٦ «وَ أَنَا اللّٰهْ الْقَادِرْ نَرْفَعْ
لَيَّهْ السَّوْط وَ نَضُرْبَهْ
مِثِلْ ضَرَبْت نَاسْ مِدْيَانْ فِي حَجَرْ عُرِيبْ.*
وَ نَرْفَعْ عَصَاتِي ضِدّ الْبَحَرْ
مِثِلْ رَفَعْتَهَا ضِدّ الْمَصْرِيِّينْ زَمَانْ.
٢٧ وَ فِي الْيَوْم دَا،
نَرْفَعْ
تَقَلَتَهْ مِنْ كَتَافَيْكُو
وَ نِشِيلْ الدَّامِي مِنْ رِقَابْكُو
وَ الدَّامِي يِلْكَسَّرْ
أَشَانْ تَشْبَعَوْا وَ تَبْقَوْا سُمَانْ.»
عسْكر أَشُور قرّبوا للمدينة
٢٨ وَ عَسْكَرْ أَشُورْ يَجُوا فِي حِلَّةْ عَيَّتْ
وَ يُشُقُّوا حِلَّةْ مِقْرُونْ
وَ فِي حِلَّةْ مِكْمَاشْ،
يِخَلُّوا مُعِدَّاتْهُمْ.
٢٩ وَ يَقْطَعَوْا الْمَعَدّ وَ يُقُولُوا:
«فِي اللَّيْلَةْ دِي،
نَنْزُلُوا فِي حِلَّةْ قَبَعْ.»
وَ بَيْدَا،
حِلَّةْ الرَّامَةْ تَرْجِفْ
وَ قِبَيْعَةْ حِلَّةْ شَاوُولْ
سُكَّانْهَا يِعَرُّدُوا.
٣٠ أَصْرَخَوْا،
يَا نَاسْ حِلَّةْ بِنْت قَلِّيمْ!
وَ خُطِّي بَالْكِ،
يَا حِلَّةْ لَيْشَةْ!
وَ حِلَّةْ عَنَتُوتْ الْمِسْكِينَةْ!
٣١ وَ حِلَّةْ مَدْمِينَةْ تِعَرِّدْ
وَ سُكَّانْ حِلَّةْ قَبِيمْ
يِفَتُّشُوا مَلْجَأْ.
٣٢ وَ فِي نَفْس الْيَوْم،
عَسْكَرْ أَشُورْ
يَقِيفُوا فِي حِلَّةْ نُوبْ
وَ يَرْفَعَوْا إِيدَيْهُمْ
ضِدّ جَبَلْ صَهْيُون الْمِثِلْ بِنَيَّةْ
وَ دَا حَجَرْ الْفَوْقَهْ مَدِينَةْ الْقُدُسْ.
اللّه يدمِّر الغابة
٣٣ وَ شِيفُوا!
دَاهُو اللّٰهْ الرَّبّ الْقَادِرْ
يِدَمِّرْ عَسْكَرْ أَشُورْ
مِثِلْ نَادُمْ
يِكَسِّرْ الْفُرُوعْ بِشِدَّةْ.
وَ مِثِلْ يَقْطَعْ الْفُرُوعْ الْمَرْفُوعِينْ فَوْق،
اللّٰهْ يِكَمِّلْ كُبَارَاتْهُمْ
وَ الْعَالِيِينْ كُلَ،
يَرْمِيهُمْ تِحِتْ.
٣٤ وَ دَا مِثِلْ هُو يَقْطَعْ شَدَرْ الْغَابَةْ بِفَاسْ
وَ خَلَاصْ،
لُبْنَانْ تَقَعْ قِدَّامْ الْعَظِيمْ.