أُسُم وِلَيْد إشَعْيا
٨
١ وَ اللّٰهْ قَالْ لَيِّ:
«شِيلْ لَوْح كَبِيرْ وَ أَكْتِبْ فَوْقَهْ بِحُرُوفْ وَاضْحَةْ الْأُسُمْ مَهِيرْ شَلَالْ حَاشْ بَزْ.»
٢ وَ أَنَا وَصَّفْت اللَّوْح دَا لِشُهُودْ أَمِينِينْ وَ هُمَّنْ أُرِيَّا رَاجِلْ الدِّينْ وَ زَكَرِيَّا وِلَيْد يَبَرْكِيَا.
٣ وَ أَنَا قَرَّبْت لِمَرْتِي النَّبِيَّةْ وَ هِي بِقَتْ غَلْبَانَةْ وَ وِلْدَتْ وِلَيْد.
وَ اللّٰهْ قَالْ لَيِّ:
«سَمِّي وِلَيْدَكْ مَهِيرْ شَلَالْ حَاشْ بَزْ (مَعَنَاتَهْ أَجْرِي لِلْغَنِيمَةْ وَ أَمْشِي عَجَلَةْ لِلنَّهِبْ).
٤ أَشَانْ قُبَّالْ الْوِلَيْد مَا يَعَرِفْ يُقُولْ:
‹أَمِّي وَ أَبُويِ›،
يِجِيبُوا قِدَّامْ مَلِكْ بَلَدْ أَشُورْ غُنَى دِمَشْق وَ غَنِيمَةْ السَّامِرَةْ.»
ملك أَشُور يفور مِثِل البحر
٥ وَ اللّٰهْ حَجَّى لَيِّ بَتَّانْ وَ قَالْ:
٦ «الشَّعَبْ دَا أَبَى
أَلْمِي حِلَّةْ شِيلَوْه
الْيَجْرِي بِبِشَيْش
وَ فِرْحَوْا بِالْمَلِكْ رَصِينْ
وَ بِوِلَيْد رَمَلْيَا.
٧ وَ فِي شَانْ دَا،
الرَّبّ يِقَوِّمْ ضِدُّهُمْ
أَلْمِي بَحَرْ الْفُرَاتْ الشَّدِيدْ وَ كَتِيرْ.
وَ دَا،
مَلِكْ بَلَدْ أَشُورْ
وَ كُلَّ عَظَمَتَهْ.
هُو يَطْلَعْ فَوْق مِنْ بَكَانْ مَرْقَدَهْ
وَ يُفُوتْ حُدُودَهْ الْأَوَّلْ.
٨ وَ يَاكُلْ بَلَدْ يَهُوذَا
وَ يِسِيلْ وَ يِنَيِّلْ
وَ يَلْحَقْ لَحَدِّي الرَّقَبَةْ.
وَ رُجُولَهْ يَمْلَوْا عُرْض بَلَدَكْ،
يَا عِمَّانُوِيل.»
الربّ مع الشعب
٩ يَا شَعَبْ أَشُورْ،
أَرْجُفُوا وَ أَخَافَوْا!
يَا كُلَّ النَّاسْ الْبَعِيدِينْ فِي الْأَرْض،
أَسْمَعَوْا!
جَهُّزُوا لِلْحَرِبْ وَ أَخَافَوْا.
أَيْوَى،
جَهُّزُوا لِلْحَرِبْ وَ أَخَافَوْا.
١٠ سَوُّوا شَوْرِتْكُو
وَ لَاكِنْ شَوْرِتْكُو دِي تَفْشُلْ.
قُولُوا كَلَامْكُو مِثِلْ تِدَوْرُوهْ
وَ لَاكِنْ كَلَامْكُو دَا مَا يِلْحَقَّقْ
أَشَانْ عِمَّانُوِيل،
اللّٰهْ مَعَانَا.
واجِب تخافوا من اللّه
١١ وَ دَاهُو كَلَامْ اللّٰهْ لَيِّ وَكِتْ إِيدَهْ كَرَبَتْنِي وَ حَذَّرْنِي مَا نِشِيلْ دَرِبْ الشَّعَبْ دَا.
هُو قَالْ:
١٢ «مَا تُقُولُوا مُؤآمَرَةْ لِأَيِّ شَيّءْ
الْيِنَادِي الشَّعَبْ دَا مُؤآمَرَةْ.
مَا تَخَافَوْا مِنْ أَيِّ شَيّءْ
الْهُمَّنْ يَخَافَوْا مِنَّهْ
وَ مَا تَرْجُفُوا.
١٣ وَ لِلّٰهْ الْقَادِرْ بَسْ،
تِقَدُّسُوهْ
وَ مِنَّهْ هُو بَسْ تَخَافَوْا
وَ مِنَّهْ هُو بَسْ تَرْجُفُوا.
١٤ وَ هُو يَبْقَى بَكَانْ مُقَدَّسْ
لِلْمَمَالِكْ الْإِتْنَيْن هَنَا بَنِي إِسْرَائِيلْ.
يَبْقَى لَيْهُمْ حَجَرْ
الْيِنْطَقَّوْا فَوْقَهْ وَ يِتَّرْتَعَوْا
وَ يَبْقَى شَبَكَةْ وَ شَرَكْ
لِسُكَّانْ مَدِينَةْ الْقُدُسْ.
١٥ وَ كَتِيرِينْ يِتَّرْتَعَوْا فِي الْحَجَرْ
وَ يَقَعَوْا وَ يِلْكَسَّرَوْا
وَ يَقَعَوْا فِي الشَّرَكْ وَ يَكُرْبُوهُمْ.»
السُكوت و العشم
١٦ أَحْفَضْ الشَّهَادَةْ دِي
وَ أَخْتِمْ التَّعْلِيمْ فِي قُلُوبْ تَلَامِيذِي.
١٧ أَنَا نُخُطّ عَشَمِي فِي اللّٰهْ
الْأَبَى مَا يِوَجِّهْ عَلَيْ ذُرِّيَّةْ يَعْقُوبْ
وَ أَنَا نِتْوَكَّلْ عَلَيَّهْ.
١٨ أَنَا وَ الْعِيَالْ الْأَنْطَاهُمْ لَيِّ اللّٰهْ،
أَنِحْنَ مِثِلْ عَلَامَاتْ وَ مَثَلْ
لِبَنِي إِسْرَائِيلْ.
اللّٰهْ الْقَادِرْ بَسْ جَابَاهُمْ،
هُو السَّاكِنْ فِي جَبَلْ صَهْيُون.
١٩ أَكُونْ يُقُولُوا لَيْكُو:
«أَمْشُوا لِلنَّاسْ الْيِكَلُّمُوا
مَعَ الْمَيْتِينْ
وَ لِلْجَنَّانِيِّينْ
الْهُمَّنْ يِلْخَالَوْا
وَ يِحَجُّوا تِحِتْ تِحِتْ.
الشَّعَبْ مَا يَسْأَلَوْا إِلٰـهَاتْهُمْ وَلَّا؟
وَ النَّاسْ مَا يِكَلُّمُوا مَعَ الْمَيْتِينْ
فِي شَانْ الْحَيِّينْ وَلَّا؟»
٢٠ خَلَاصْ،
رُدُّوا لَيْهُمْ وَ قُولُوا:
«النَّاسْ الْمَا يِتَابُعُوا
التَّعْلِيمْ وَ الشَّهَادَةْ
مَا يِشِيفُوا نُورْ الصَّبَاحْ.»
المشي في الضلام
٢١ النَّاسْ يُشُقُّوا الْبَلَدْ
تَعْبَانِينْ وَ جِيعَانِينْ.
وَكِتْ يُجُوعُوا،
يَغْضَبَوْا
وَ يَلْعَنَوْا مَلِكْهُمْ وَ إِلٰـهُّمْ
وَ يِصَنْقُعُوا عَلَيْ السَّمَاءْ.
٢٢ وَ بَعَدْ دَا،
يِشِيفُوا الْأَرْض
وَ دَاهُو تَعَبْ وَ ضَلَامْ.
وَ ضَلَامْ الضِّيقَةْ يِلِزُّهُمْ
فِي ضَلَامْ أَزْرَقْ كُرُمْ.