١٤٩
١ الْحَمْدُ للّٰهْ!
غَنُّوا لِلّٰهْ غِنَيْ جَدِيدْ
وَ أَشْكُرُوهْ فِي مَجْمُوعَةْ الْمُؤمِنِينْ.
٢ خَلِّي إِسْرَائِيلْ يَفْرَحَوْا بِخَالِقْهُمْ
أَيْوَى،
سُكَّانْ صَهْيُون يِنْبَسْطُوا بِمَلِكْهُمْ.
٣ خَلِّي يَحْمُدُوا وَ يَلْعَبَوْا
وَ يَمْدَحَوْا مَجْدَهْ بِتَنْبَلْ وَ جِقِنْدِيَّةْ.
٤ أَشَانْ اللّٰهْ يَرْضَى بِشَعَبَهْ
وَ يِجَمِّلْ الْمَسَاكِينْ بِالنَّجَاةْ.
٥ خَلِّي الْمُؤمِنِينْ يِنْبَسْطُوا وَ يَفْرَحَوْا
وَ فِي فُرَاشْهُمْ،
يِعِيطُوا مِنْ الْفَرَحْ!
٦ خَلِّي حَمْد الرَّبّ يُكُونْ فِي خُشُومْهُمْ
وَ السَّيْف الطَّرِينْ جَايْ وَ جَايْ فِي إِيدَيْهُمْ.
٧ أَشَانْ يِشِيلُوا التَّارْ فِي الْأُمَمْ
وَ يِعَاقُبُوا الشُّعُوبْ.
٨ يَرْبُطُوا مُلُوكْهُمْ بِجَنَازِيرْ
وَ كُبَارَاتْهُمْ بِقُيُودْ هَنَا حَدِيدْ.
٩ يِطَبُّقُوا فَوْقهُمْ الْحُكُمْ الْمَكْتُوبْ.
وَ دَا شَرَفْ لِكُلَّ الْمُؤمِنِينْ.
الْحَمْدُ للّٰهْ!