مَزْمُورْ لِدَاوُدْ
١٤١
١ يَا اللّٰهْ،
أَنَا نَادَيْتَكْ.
رُدّ لَيِّ بِسُرْعَةْ!
خُطّ أَدَانَكْ لَيِّ وَكِتْ نِنَادِيكْ.
٢ خَلِّي صَلَاتِي تَبْقَى
مِثِلْ بَخُورْ الْيِقَدُّمُوهْ لَيْك
وَ إِيدَيْنِي الْمَرْفُوعِينْ لَيْك يَبْقَوْا
مِثِلْ هَدِيَّةْ الْعَشِيَّةْ.
٣ يَا اللّٰهْ!
خُطّ حَرَسْ لِخَشْمِي
وَ أَحْفَضْ لِسَانِي.
٤ أَحْفَضْ قَلْبِي مَا يَكْرُبْ كَلَامْ فَسِلْ
وَ نِسَوِّي أَعْمَالْ الْفَسَالَةْ مَعَ الظَّالِمِينْ
وَ مَا تِخَلِّينِي نَاكُلْ أَكِلْهُمْ الْحَرَامْ.
٥ خَلِّي الصَّالِحْ يَضْرُبْنِي
وَ يُلُومْنِي!
دَا خَيْر لَيِّ مِثِلْ دِهِنْ مُعَطَّرْ فِي رَاسِي
وَ رَاسِي أَبَداً مَا يَابَاهْ.
وَ دَايْماً نِصَلِّي ضِدّ ظَالِمِينْ.
٦ وَكِتْ يَرْمُوا حُكَّامْهُمْ فِي قَعَرْ الْحَجَرْ،
الظَّالِمِينْ يَسْمَعَوْا كَلَامِي الصَّحِيحْ:
٧ «مِثِلْ مُرْحَاكَةْ مُكَسَّرَةْ فِي التُّرَابْ،
عُضَامْنَا مُشَتَّتِينْ
فِي مَدَخَلْ بَكَانْ الْمَيْتِينْ.»
٨ يَا اللّٰهْ رَبِّي،
عُيُونِي مُوَجِّهِينْ عَلَيْك.
أَنَا لَجَأْت لَيْك،
مَا تِخَلِّينِي نُمُوتْ!
٩ أَحْفَضْنِي مِنْ الشَّرَكْ الْكَجَّوْه لَيِّ
وَ مِنْ أَمْ كَجَّامَةْ الظَّالِمِينْ.
١٠ خَلِّي الْعَاصِيِينْ يَقَعَوْا فِي شَرَكْهُمْ
وَ أَنَا كَمَانْ نَنْجَى.