لِدَاوُدْ
١٣٨
١ يَا اللّٰهْ!
أَنَا نَشْكُرَكْ بِكُلَّ قَلْبِي
وَ نَمْدَحَكْ قِدَّامْ قُوَّاتْ السَّمَاءْ.
٢ نَسْجُدْ عَلَيْ بَيْتَكْ الْمُقَدَّسْ
وَ نِمَجِّدْ أُسْمَكْ
أَشَانْ رَحْمَتَكْ وَ أَمَانَكْ.
أَشَانْ إِنْتَ كَبَّرْت أُسْمَكْ وَ وَعَدَكْ
زِيَادَةْ مِنْ كُلِّ شَيّءْ.
٣ يَوْم أَنَا نَادَيْتَكْ،
إِنْتَ رَدَّيْت لَيِّ
وَ أَنْطَيْتنِي شَجَاعَةْ وَ قُدْرَةْ.
٤ يَا اللّٰهْ،
خَلِّي كُلَّ مُلُوكْ الْأَرْض يَشْكُرُوكْ
أَشَانْ سِمْعَوْا كَلَامْ خَشْمَكْ.
٥ خَلِّي يِغَنُّوا حَسَبْ عَمَلْ اللّٰهْ:
«مَجْد اللّٰهْ كَبِيرْ.
٦ اللّٰهْ قَاعِدْ فِي الْعَالِي وَ يِشِيفْ الْمِسْكِينْ
وَ مِنْ بَعِيدْ،
يَعَرِفْ الْمُسْتَكْبِرْ.»
٧ وَكِتْ أَنَا نَمْشِي فِي أُسْط الضِّيقَةْ،
إِنْتَ تِحَيِّينِي.
تِنَزِّلْ إِيدَكْ فِي عُدْوَانِي
وَ إِيدَكْ الزَّيْنَةْ تِنَجِّينِي.
٨ اللّٰهْ يِتَمِّمْ كُلَّ شَيّءْ الْهُو بَدَا لَيِّ.
يَا اللّٰهْ،
رَحْمَتَكْ دَايْمَةْ إِلَى الْأَبَدْ.
مَا تِخَلِّي أَعْمَالْ إِيدَيْنَكْ!