زَبُور 90

الجُزُء الرابِع هنا الزَبُور

صَلَاةْ مُوسَى عَبْد اللّٰهْ

١ يَا رَبّ، مِنْ ذُرِّيَّةْ لِذُرِّيَّةْ،

إِنْتَ بِقِيتْ مَلْجَئْنَا.

٢ وَ قَبُلْ الْجِبَالْ مَا يُكُونُوا،

إِنْتَ خَلَقْت الْأَرْض وَ الْعَالَمْ.

إِنْتَ بَسْ الرَّبّ

مِنْ الْبِدَايَةْ لِلنِّهَايَةْ.

٣ إِنْتَ تِقَبِّلْ الْإِنْسَانْ فِي الْأَرْض وَ تُقُولْ:

«يَا بَنِي آدَم، قَبُّلُوا وَ كُونُوا تُرَابْ!»

٤ أَشَانْ أَلِفْ سَنَةْ لَيْك إِنْتَ

مِثِلْ يَوْم وَاحِدْ الْفَاتْ.

وَ يَوْم وَاحِدْ لَيْك إِنْتَ

مِثِلْ سَاعَةْ وَاحِدَةْ بِاللَّيْل.

٥ إِنْتَ تُقُشّ حَيَاةْ الْإِنْسَانْ

وَ هِي تَبْقَى مِثِلْ وَكِتْ قِصَيِّرْ هَنَا نَوْم

وَ تَبْقَى مِثِلْ قَشّ الْيَبْذُرْ.

٦ بِفَجُرْ، يَكْبُرْ وَ يِنَوِّرْ

وَ بِعَشِيَّةْ، يَقْطَعَوْه وَ يَيْبَسْ.

٧ أَشَانْ إِنْتَ كَمَّلْتِنَا بِغَضَبَكْ

وَ زَعَلَكْ بَهَتْنَا.

٨ إِنْتَ خَطَّيْت خَطَانَا قِدَّامَكْ.

أَيْوَى، عَشِيرْنَا أَنْكَشَفْ قِدَّامْ نُورْ وِجْهَكْ.

٩ أَشَانْ كُلَّ أَيَّامْنَا

يِنْقَشَّوْا قِدَّامْ غَضَبَكْ.

مِثِلْ نَفَسْ وَاحِدْ بَسْ،

أَنِحْنَ نِكَمُّلُوا سِنِينَّا عَجَلَةْ.

١٠ مُدَّةْ حَيَاتْنَا 70 سَنَةْ

وَ كَنْ عِنْدِنَا قُدْرَةْ، نَمْشُوا لَحَدِّي 80 سَنَةْ.

وَ أَكْتَرْ سِنِينَّا،

نِعِيشُوهُمْ فِي تَعَبْ وَ ظُلُمْ

أَشَانْ حَيَاتْنَا تُفُوتْ عَجَلَةْ

وَ أَنِحْنَ نَبْقَوْا مَا فِينَا.

١١ يَاتُو يَقْدَرْ يَعَرِفْ شِدَّةْ زَعَلَكْ؟

وَ كَنْ نَخَافَوْا مِنَّكْ زِيَادَةْ، وَاجِبْ نَعَرْفُوا غَضَبَكْ.

١٢ خَلَاصْ، عَلِّمْنَا نَحْسُبُوا أَيَّامْنَا

وَ نَلْقَوْا حِكْمَةْ فِي قُلُوبْنَا.

١٣ تَعَالْ، يَا اللّٰهْ! تِأَخِّرْ لِمَتَى؟

حِنّ فَوْقنَا أَنِحْنَ عَبِيدَكْ.

١٤ بِفَجُرْ، أَرْوِينَا بِرَحْمَتَكْ

وَ أَنِحْنَ نِعِيطُوا مِنْ الْفَرْحَةْ

مُدَّةْ كُلَّ أَيَّامْنَا.

١٥ فَرِّحْنَا عَلَيْ قَدُرْ الْأَيَّامْ

الْإِنْتَ ضَايَقْتِنَا فَوْقهُمْ

وَ عَلَيْ عَدَدْ السِّنِينْ الشِّفْنَا فَوْقهُمْ الْفَسَالَةْ.

١٦ خَلِّي عَمَلَكْ يِبِينْ لِعَبِيدَكْ

وَ عَظَمَتَكْ تِبِينْ لِعِيَالْهُمْ.

١٧ خَلِّي رِضَى الرَّبّ إِلٰـهْنَا

يُكُونْ مَعَانَا!

ثَبِّتْ خِدْمَةْ إِيدَيْنَّا!

أَيْوَى، ثَبِّتْ خِدْمَةْ إِيدَيْنَّا.