وَصِيَّةْ لِكَبِيرْ الْغَنَّايِينْ: لِيِغَنُّوهْ بِجِقِنْدِيَّةْ، مَزْمُورْ لِأَوْلَادْ قُورَحْ
٨٤
١ يَا اللّٰهْ الْقَادِرْ،
مَسْكَنَكْ مَحْبُوبْ!
٢ وَ نَفْسِي مُشْتَاقَةْ وَ قَرْمَانَةْ
لِفَضَايَةْ بَيْتَكْ الْمُقَدَّسْ.
وَ قَلْبِي وَ جِسْمِي يَصْرَخَوْا
مِنْ الْفَرَحْ لِلّٰهْ الْحَيّ.
٣ حَتَّى الطَّيْرَايْ الصَّغَيْرَةْ كُلَ تَلْقَى بَيْت
وَ أَمْ جَرَارِي تَلْقَى عُشّ التِّفَقَّعْ فَوْقَهْ عِيَالْهَا
جَنْب مَدَابْحَكْ.
يَا اللّٰهْ الْقَادِرْ!
إِنْتَ مَلِكِي وَ إِلٰـهِي.
٤ مَبْرُوكْ لِسُكَّانْ بَيْتَكْ!
هُمَّنْ يَشْكُرُوكْ دَايْماً.
وَقْفَةْ.
٥ مَبْرُوكْ لِلنَّاسْ الْيَلْقَوْا مِنَّكْ قُدْرَةْ
وَ يِشِيلُوا نِيَّةْ لِيِحِجُّوا لِبَيْتَكْ.
٦ وَكِتْ يُشُقُّوا وَادِي الْبَكِي الْجَافّ،
هُمَّنْ يِسَوُّوهْ عَيْن أَلْمِي
وَ مَطَرْ الرِّشَاشْ يِغَطِّيهْ بِالْبَرَكَةْ.
٧ دَايْماً قُدْرِتْهُمْ قَاعِدَةْ تِزِيدْ
وَ يِقَرُّبُوا لِلرَّبّ فِي صَهْيُون.
٨ يَا اللّٰهْ الْإِلٰـهْ الْقَادِرْ،
أَسْمَعْ صَلَاتِي!
أَسْمَعْنِي،
يَا إِلٰـهْ يَعْقُوبْ!
وَقْفَةْ.
٩ يَا رَبّ!
شِيفْ مَلِكْنَا
الْهُو دَرَقَتْنَا.
أَيْوَى،
شِيفْ وِجِهْ النَّادُمْ
الْإِنْتَ مَسَحْتَهْ وَ دَرَّجْتَهْ.
١٠ أَشَانْ يَوْم وَاحِدْ فِي فَضَايْتَكْ
أَخَيْر مِنْ أَلِفْ يَوْم بَرَّا مِنْهَا.
أَنَا نِرِيدْ نَقْعُدْ فِي مَدَخَلْ بَيْتَكْ،
يَا إِلٰـهِي،
مِنْ نَقْعُدْ فِي فَرِيقْ النَّاسْ الْفَسْلِينْ.
١١ أَيْوَى،
اللّٰهْ الرَّبّ
مِثِلْ حَرَّايْ وَ مِثِلْ دَرَقَةْ،
هُو يَنْطِي الرَّحْمَةْ وَ الشَّرَفْ.
هُو مَا يَمْنَعْ الْخَيْر
لِلْيَمْشُوا فِي الطَّرِيقْ الْعَدِيلْ.
١٢ يَا اللّٰهْ الْقَادِرْ!
مَبْرُوكْ لِلْإِنْسَانْ الْيِتْوَكَّلْ عَلَيْك.