وَصِيَّةْ لِكَبِيرْ الْغَنَّايِينْ: لِيِغَنُّوهْ بِجِقِنْدِيَّةْ، لِأَسَافْ
٨١
١ عِيطُوا مِنْ الْفَرَحْ
لِإِلٰـهْنَا،
الْهُو قُدْرِتْنَا!
أَفْرَحَوْا بِإِلٰـهْ يَعْقُوبْ.
٢ أَرْفَعَوْا حِسّ الْمُسِيقَى
وَ أَضُرْبُوا التَّنْبَلْ
وَ الْجِقِنْدِيَّةْ الْحَلُوَّةْ
وَ أَمْ سِبَيْبَةْ.
٣ أَضُرْبُوا الْبُوقْ
فِي أَوَّلْ يَوْم فِي الشَّهَرْ
وَ فِي أُسْط الشَّهَرْ فِي يَوْم عِيدْنَا.
٤ وَ دَا يُكُونْ شَرْط لِبَنِي إِسْرَائِيلْ
وَ قَانُونْ مِنْ إِلٰـهْ يَعْقُوبْ.
٥ اللّٰهْ شَالْ قَرَارْ فِي ذُرِّيَّةْ يُوسُفْ
وَكِتْ هُو قَمَّ ضِدّ مَصِرْ.
أَنَا سِمِعْت حِسّ الْمَا عِرِفْتَهْ
وَ الْكَلَامْ دَا يُقُولْ:
٦ «أَنَا شِلْت التَّقَلَةْ مِنْ كِتْفَكْ
وَ إِيدَيْنَكْ نَزَّلَوْا الصَّوْصَلْ.
٧ وَكِتْ إِنْتَ قَاعِدْ تَصْرَخْ مِنْ التَّعَبْ،
أَنَا خَلَّصْتَكْ
وَ رَدَّيْت لَيْك بِسِرّ فِي الرَّعَدْ
وَ جَرَّبْتَكْ جَنْب أَلْمِي مَرِيبَةْ.*
وَقْفَةْ.
٨ «يَا شَعَبِي،
أَسْمَعَوْنِي عَدِيلْ!
يَا بَنِي إِسْرَائِيلْ،
نِحَذِّرْكُو كَنْ تَسْمَعَوْنِي.
٩ خَلِّي مَا يِنْلَقِي فِي بَكَانْكُو إِلٰـهْ أَجْنَبِي
وَ مَا تَسْجُدُوا قِدَّامْ إِلٰـهْ آخَرْ.
١٠ أَنَا بَسْ اللّٰهْ إِلٰـهْكُو
الْمَرَقْتُكُو مِنْ بَلَدْ مَصِرْ.
أَفْتَحَوْا خُشُومْكُو كُبَارْ
وَ أَنَا نَمْلَاهُمْ.
١١ «لَاكِنْ شَعَبِي مَا سِمْعَوْا حِسِّي
وَ بَنِي إِسْرَائِيلْ مَا دَوَّرَوْنِي.
١٢ وَ خَلَاصْ،
أَنَا خَلَّيْتهُمْ
بِرُوسَيْهُمْ الْقَوِيِّينْ
وَ مَشَوْا حَسَبْ نِيِّتْهُمْ.
١٣ «أَيْوَى،
كَنْ شَعَبِي سِمْعَوْنِي
وَ بَنِي إِسْرَائِيلْ تَابَعَوْا دَرْبِي،
١٤ أَنَا بِسُرْعَةْ نِعَيِّبْ عُدْوَانْهُمْ
وَ نَرْفَعْ إِيدِي ضِدّ خُصْمَانْهُمْ.
١٥ «الْيَكْرَهَوْا اللّٰهْ يِنْهَانَوْا
وَ عِقَابْهُمْ يُكُونْ دَايْماً وَ إِلَى الْأَبَدْ.
١٦ وَ نِأَكِّلْ بَنِي إِسْرَائِيلْ بِقَمَحْ عَدِيلْ
وَ نَرْوِيهُمْ بِعَسَلْ الْكَدَادَةْ.»