وَصِيَّةْ لِكَبِيرْ الْغَنَّايِينْ: لِيِغَنُّوهْ حَسَبْ الْحِسّ الْبِنَادُوهْ «مَا تِدَمِّرْ»، مَزْمُورْ لِأَسَافْ، غِنَيْ
٧٥
١ أَنِحْنَ نَشْكُرُوكْ،
يَا رَبّ،
وَ نَشْكُرُوا أُسْمَكْ أَشَانْ إِنْتَ قَرِيبْ
وَ نِحَجُّوا بِعَجَايْبَكْ.
٢ وَ الرَّبّ قَالْ:
«فِي الْوَكِتْ النِّحَدِّدَهْ،
أَنَا نِحَاكِمْ بِالْحَقّ.
٣ وَكِتْ الْأَرْض تَرْجِفْ بِكُلَّ سُكَّانْهَا،
مَا أَنَا بَسْ نِثَبِّتْ أَسَاسْهَا وَلَّا؟
وَقْفَةْ.
٤ «أَنَا قُلْت لِلْمُسْتَكْبِرِينْ:
‹مَا تِسْتَكْبَرَوْا!›
وَ قُلْت لِلْعَاصِيِينْ:
‹مَا تَرْفَعَوْا رُوسَيْكُو!
٥ مَا تَرْفَعَوْا رُوسَيْكُو فَوْق زِيَادَةْ
وَ مَا تِحَجُّوا مِثِلْ دَا
وَ لَا تِحَجُّوا بِرَاسْ قَوِي.›»
٦ أَشَانْ الْعَظَمَةْ مَا تَجِي
مِنْ الصَّبَاحْ وَ لَا مِنْ الْغَرِبْ
وَ لَا مِنْ الصَّحَرَاء.
٧ أَشَانْ الرَّبّ هُو بَسْ الْحَاكِمْ.
هُو يِنَزِّلْ الْوَاحِدْ وَ يَرْفَعْ الْآخَرْ.
٨ اللّٰهْ كَارِبْ فِي إِيدَهْ كَاسْ
مَلَانْ بِخَمَرْ الْبِسَكِّرْ
وَ دَا غَضَبَهْ.
وَ يَشَرْبَوْا مِنَّهْ كُلَّ الْعَاصِيِينْ
الْقَاعِدِينْ فِي الْأَرْض.
أَيْوَى،
يَشَرْبَوْه لَحَدِّي آخِرَهْ.
٩ وَ أَنَا كَمَانْ نِخَبِّرْ دَايْماً
وَ نَحْمُدْ إِلٰـهْ يَعْقُوبْ الْقَالْ:
١٠ «نِدَلِّي رُوسَيْ الْعَاصِيِينْ
وَ نَرْفَعْ رُوسَيْ الصَّالِحِينْ.»