مَزْمُورْ لِدَاوُدْ، وَكِتْ هُو قَاعِدْ فِي صَحَرَاء يَهُوذَا*
٦٣
١ يَا رَبّ!
إِنْتَ إِلٰـهِي،
أَنَا نِفَتِّشَكْ.
وَ نَفْسِي عَطْشَانَةْ لَيْك
وَ جِسْمِي مُشْتَاقْ لَيْك
مِثِلْ أَرْض جَفَافْ عَطْشَانَةْ لِلْأَلْمِي.
٢ أَنَا فَتَّشْتَكْ فِي الْبَيْت الْمُقَدَّسْ
لِنِشِيفْ قُدُرْتَكْ وَ مَجْدَكْ.
٣ أَيْوَى،
خَيْرَكْ عَدِيلْ زِيَادَةْ مِنْ الْحَيَاةْ
وَ لِسَانِي يِمَجِّدَكْ!
٤ بَيْدَا،
أَنَا نَشْكُرَكْ طُولْ حَيَاتِي
وَ نَرْفَعْ إِيدَيْنِي وَ نِنَادِي أُسْمَكْ.
٥ نَفْسِي شِبْعَتْ مِثِلْ بِلَحَمْ سَمِينْ وَ مُخّ
وَ لِسَانِي يَفْرَحْ وَ خَشْمِي يَشْكُرَكْ بِغِنَيْ.
٦ كَنْ فِي سَرِيرِي أَنَا نِفَكِّرْ فَوْقَكْ،
نَحْمُدَكْ طُولْ اللَّيْل.
٧ أَشَانْ إِنْتَ بِقِيتْ لَيِّ فَزَعْ
وَ تِحِتْ جَنَاحَيْك،
أَنَا نِرَقْرِقْ مِنْ الْفَرَحْ.
٨ نَفْسِي مُتَمَسِّكَةْ بِمُتَابَعَتَكْ
وَ إِيدَكْ الزَّيْنَةْ كَرَبَتْنِي.
٩ لَاكِنْ الْيِدَوْرُوا مَوْتِي،
خَلِّي يَهْلَكَوْا
وَ يَدْخُلُوا فِي الْقُبُورْ فِي تِحِتْ الْأَرْض!
١٠ خَلِّي يَقْطَعَوْا رُوسَيْهُمْ بِالْسَّيْف
وَ يَبْقَوْا أَكِلْ لِلْبَعَاشِيمْ!
١١ الْمَلِكْ يَفْرَحْ بِالرَّبّ
وَ أَيِّ نَادُمْ الْيَحْلِفْ بِأُسُمْ الرَّبّ،
يَشْكُرُوهْ
أَشَانْ خُشُومْ الْكَدَّابِينْ يِنْسَدَّوْا.