زَبُور 60

وَصِيَّةْ لِكَبِيرْ الْغَنَّايِينْ: لِيِغَنُّوهْ حَسَبْ الْحِسّ الْبِنَادُوهْ «زَهْرَةْ الْمُعَاهَدَةْ»، شِعِرْ لِدَاوُدْ، لِتَعْلِيمْ.

وَ دَا وَكِتْ دَاوُدْ حَارَبْ الْأَرَامِيَّيْن السَّاكْنِينْ فِي أَرَامْ بَيْن الْنَّهْرَيْن وَ فِي حِلَّةْ صُوبَةْ وَ يُوَابْ جَاءْ وَ كَتَلْ 12 000 أَدَوْمِيِّينْ فِي وَادِي الْمِلِحْ

١ يَا رَبّ! إِنْتَ أَبَيْتنَا وَ دَمَّرْتِنَا.

إِنْتَ غِضِبْت لَيْنَا لَاكِنْ قَبِّلْنَا عَلَيْك!

٢ إِنْتَ رَجَّفْت الْأَرْض وَ شَقَّقْتَهَا.

عَالِجْ شُقُوقْهَا أَشَانْ هِي تِدَوْر تِنْهَزَّ!

٣ إِنْتَ شَوَّفْت الْمُرّ لَيْنَا أَنِحْنَ شَعَبَكْ،

أَيْوَى، شَرَّبْتِنَا خَمَرْ الْيِلِفّ الرَّاسْ.

٤ لِلْيَخَافَوْا مِنَّكْ، إِنْتَ وَصَّفْت لَيْهُمْ عَلَامَةْ

لِيِعَرُّدُوا مِنْ سِيَادْ النُّشَّابْ. وَقْفَةْ.

٥ رُدّ لَيْنَا وَ بِإِيدَكْ الزَّيْنَةْ، نَجِّينَا

أَشَانْ مَحْبُوبِينَكْ يَلْقَوْا النَّجَاةْ.

٦ الرَّبّ كَلَّمْ فِي بَكَانَهْ الْمُقَدَّسْ:

«أَنَا نِنْبَسِطْ! وَ نِقَسِّمْ حِلَّةْ شَكِيمْ

وَ نِقَاوِسْ وَادِي سُكُّوتْ.

٧ تُرَابْ قِلْعَادْ لَيِّ

وَ أَرْض مَنَسَّى كُلَ لَيِّ.

وَ أَرْض أَفْرَايِمْ مِثِلْ طَاقِيَّةْ التَّحْمِي رَاسِي

وَ بَلَدْ يَهُوذَا مِثِلْ عَصَاةْ مُلْكِي.

٨ بَلَدْ مُوَابْ مِثِلْ مَاعُونْ بَرُودِي

وَ بَلَدْ أَدَوْم مِثِلْ بَكَانْ النَّزْقُلْ فَوْقَهْ نَعَالِي.

وَ ضِدّ بَلَدْ الْفِلِسْطِيِّينْ،

نِكَوْرِكْ كُرَوْرَاكْ الْحَرِبْ.»

٩ يَاتُو الْيِوَدِّينِي لِلْمَدِينَةْ الْقَوِيَّةْ؟

يَاتُو الْيُقُودْنِي لَحَدِّي بَلَدْ أَدَوْم؟

١٠ مَا إِنْتَ، الْإِلٰـهْ الطَّرَدْتِنَا وَلَّا؟

مَا إِنْتَ، الرَّبّ، الْأَبَى مَا يَمْرُقْ مَعَ عَسْكَرْنَا وَلَّا؟

١١ تَعَالْ! سَاعِدْنَا ضِدّ عَدُونَا

أَشَانْ فَزَعْ الْإِنْسَانْ مَا مَضْمُونْ.

١٢ وَ لَاكِنْ مَعَ الرَّبّ، نَلْقَوْا الْقُدْرَةْ

وَ هُو بَسْ يِفَجِّقْ عُدْوَانَّا!