وَصِيَّةْ لِكَبِيرْ الْغَنَّايِينْ: لِيِغَنُّوهْ حَسَبْ الْحِسّ الْبِنَادُوهْ «مَوْت الْوِلَيْد»، مَزْمُورْ لِدَاوُدْ
٩
١ *يَا اللّٰهْ،
أَنَا نَشْكُرَكْ بِكُلَّ قَلْبِي
وَ نِحَجِّي بِكُلَّ عَجَايْبَكْ.
٢ نَفْرَحْ بَيْك وَ نِنْبَسِطْ
وَ نِغَنِّي بِأُسْمَكْ،
يَا اللّٰهْ الْعَالِي!
٣ وَكِتْ عُدْوَانِي يِعَرُّدُوا،
هُمَّنْ يِتَّرْتَعَوْا
وَ يِدَّمَّرَوْا قِدَّامَكْ.
٤ أَشَانْ إِنْتَ شِلْت ضَلِيمْتِي
وَ دَافَعْت لِحُقُوقِي.
إِنْتَ قَاعِدْ فِي عَرْشَكْ
وَ تَحْكِمْ بِالْعَدِلْ.
٥ إِنْتَ هَدَّدْت الْأُمَمْ
وَ دَمَّرْت الْعَاصِيِينْ.
وَ قَشَّيْت أُسُمْهُمْ
دَايْماً وَ إِلَى الْأَبَدْ.
٦ الْعَدُو بِقِي مَا فِيهْ
وَ خَرَابْهُمْ بِقِي دَايِمْ.
وَ الْمُدُنْ الْإِنْتَ دَمَّرْتُهُمْ،
بَتَّانْ مَا يِذَّكَّرَوْهُمْ.
٧ لَاكِنْ اللّٰهْ قَاعِدْ إِلَى الْأَبَدْ
وَ ثَبَّتْ عَرْشَهْ لِيِشَارِعْ.
٨ هُو يِشَارِعْ الْعَالَمْ بِالْعَدِلْ
وَ يَحْكِمْ الشُّعُوبْ بِالْحَقّ.
٩ خَلِّي اللّٰهْ يُكُونْ مَلْجَأْ لِلْمَظْلُومْ،
أَيْوَى،
يَبْقَى مَلْجَأْ فِي وَكْت الضِّيقَةْ.
١٠ الْيَعَرْفُوا أُسْمَكْ يِتْوَكَّلَوْا عَلَيْك
أَشَانْ إِنْتَ مَا تَابَى الْيِفَتُّشُوكْ،
يَا اللّٰهْ!
١١ غَنُّوا لِلّٰهْ،
هُو الْيَحْكِمْ فِي صَهْيُون
وَ خَبُّرُوا الشُّعُوبْ
بِأَعْمَالَهْ الْكُبَارْ!
١٢ أَشَانْ هُو يِكَفِّي التَّارْ
وَ يِذَّكَّرْ الْمَيِّتْ
وَ مَا يَنْسَى صِرَاخْ الْمَسَاكِينْ.
١٣ يَا اللّٰهْ!
أَرْحَمْنِي وَ شِيفْ تَعَبِي
السَّوَّوْه لَيِّ الْيَكْرَهَوْنِي،
يَا إِنْتَ الْمَرَقْتِنِي مِنْ الْمَوْت.
١٤ أَشَانْ نِحَجِّي بِكُلَّ شُكْرَكْ
فِي بِيبَانْ صَهْيُون الْمِثِلْ بِنَيَّةْ
وَ نَفْرَحْ بِسَبَبْ نَجَاتَكْ.
١٥ الْأُمَمْ وَقَعَوْا
فِي النُّقْرَةْ الْهُمَّنْ حَفَرَوْهَا.
وَ شَرَكْهُمْ الْكَجَّوْه
كَرَبْ رِجْلَيْهُمْ هُمَّنْ بَسْ.
١٦ اللّٰهْ عَرَّفْ نَفْسَهْ
وَ سَوَّى الْعَدَالَةْ.
وَ كَرَبْ الْعَاصِي فِي شَرَكَهْ
الْهُو ذَاتَهْ كَجَّاهْ.
لِيِغَنُّوهْ بِهُدُوءْ.
وَقْفَةْ.
١٧ خَلِّي الْعَاصِيِينْ يِقَبُّلُوا فِي الْهَاوِيَةْ!
أَيْوَى،
كُلَّ الْأُمَمْ النِّسَوْا الرَّبّ.
١٨ لَاكِنْ اللّٰهْ مَا يَنْسَى الضَّعِيفِينْ
وَ الْمِسْكِينْ كُلَ،
عَشَمَهْ مَا يِنْقَطِعْ إِلَى الْأَبَدْ.
١٩ يَا اللّٰهْ،
قُمّ!
مَا تِخَلِّي الْإِنْسَانْ يِنَّصِرْ
وَ خَلِّي الْأُمَمْ يِلْعَاقَبَوْا قِدَّامَكْ!
٢٠ يَا اللّٰهْ،
نَزِّلْ خَوْف شَدِيدْ فَوْقهُمْ!
وَ خَلِّي الْأُمَمْ يَعَرْفُوا
كَدَرْ هُمَّنْ إِنْسَانْ بَسْ.
وَقْفَةْ.