نَحَمْيا 8

قِرايِة عَزْرا من كتاب التَوْراة

١-٢ وَ فِي الْيَوْم الْأَوَّلْ هَنَا الشَّهَرْ السَّابِعْ، كُلَّ بَنِي إِسْرَائِيلْ لَمَّوْا بِقَلِبْ وَاحِدْ فِي النَّقَعَةْ الْقِدَّامْ خَشُمْ الْبَابْ الْبِنَادُوهْ بَابْ الْأَلْمِي. وَ قَالَوْا لِعَزْرَا الْكَاتِبْ: «جِيبْ لَيْنَا كِتَابْ تَوْرَاةْ مُوسَى الْاللّٰهْ نَزَّلَهْ لِبَنِي إِسْرَائِيلْ.» وَ خَلَاصْ، عَزْرَا جَابْ كِتَابْ التَّوْرَاةْ قِدَّامْ الرُّجَالْ وَ الْعَوِينْ وَ الْعِيَالْ الْيَقْدَرَوْا يَفْهَمَوْا. ٣ وَ هُو قَرَى لَيْهُمْ مِنَّهْ فِي النَّقَعَةْ دِي. وَ مِنْ فَجُرْ لَحَدِّي قَايْلَةْ، هُو قَاعِدْ يَقْرِي قِدَّامْ الرُّجَالْ وَ الْعَوِينْ وَ الْعِيَالْ الْيَقْدَرَوْا يَفْهَمَوْا. وَ هُمَّنْ كُلُّهُمْ قَاعِدِينْ يَسْمَعَوْا عَدِيلْ كَلَامْ التَّوْرَاةْ. ٤ وَ عَزْرَا الْكَاتِبْ رَاكِبْ فَوْق فِي بَكَانْ عَالِي الْعَدَّلَوْه بِخَشَبْ لِلْمَلَمَّةْ هَنَا الْيَوْم دَا. وَ جَنْبَهْ بِنُصَّهْ الزَّيْنَايْ قَاعِدِينْ مَتِّتْيَا وَ شَمَعْ وَ عَنَايَا وَ أُرِيَّا وَ حِلْقِيَّا وَ مَعَسِيَّا. وَ بِنُصَّهْ الْإِسْرَايْ كَمَانْ قَاعِدِينْ فَدَايَا وَ مِشَيِيلْ وَ مَلْكِيَّا وَ حَشُمْ وَ حَشْبَدَانَا وَ زَكَرِيَّا وَ مَشُلَّامْ. دَوْل النَّاسْ الْقَاعِدِينْ جَنْب عَزْرَا. ٥ وَ وَكِتْ هُو قَاعِدْ فِي الْبَكَانْ الْعَالِي وَ النَّاسْ شَافَوْه فَتَحْ الْكِتَابْ، كُلُّهُمْ قَمَّوْا فَوْق. ٦ وَ عَزْرَا حَمَدْ اللّٰهْ الرَّبّ الْعَظِيمْ بِحِسّ عَالِي وَ النَّاسْ كُلُّهُمْ رَفَعَوْا إِيدَيْهُمْ وَ قَالَوْا: «آمِينْ، آمِينْ.» وَ بَعَدْ دَا، دَنْقَرَوْا فِي الْأَرْض وَ سَجَدَوْا لِلّٰهْ.

٧-٨ وَ بَتَّانْ قَمَّوْا وَقَفَوْا بِطُولْهُمْ فِي بَكَانَاتْهُمْ. وَ نَاسْ وَاحِدِينْ مِنْ اللَّاوِيِّينْ فَسَّرَوْا مَعَنَى كَلَامْ عَزْرَا وَ هُمَّنْ يَشُوعْ وَ بَانِي وَ شَرَبْيَا وَ يَامِينْ وَ عَقُوبْ وَ شَبْتَايْ وَ هُودِيَّا وَ مَعَسِيَّا وَ قَلِيطَا وَ عَزَرْيَا وَ يُوزَبَادْ وَ حَنَانْ وَ فَلَايَا. وَ مِثِلْ دَا، قَرَوْا كِتَابْ تَوْرَاةْ اللّٰهْ لِلشَّعَبْ وَ تَرْجَمَوْه لَيْهُمْ بِلُغِّتْهُمْ وَ فَسَّرَوْه لَيْهُمْ أَشَانْ يَفْهَمَوْه.

٩ وَ وَكِتْ النَّاسْ سِمْعَوْا كَلَامْ التَّوْرَاةْ، كُلُّهُمْ بَكَوْا. وَ نَحَمْيَا الْوَالِي وَ عَزْرَا الْكَاتِبْ وَ رَاجِلْ الدِّينْ وَ اللَّاوِيِّينْ الْقَاعِدِينْ يِفَسُّرُوا الْكَلَامْ قَالَوْا: «الْيَوْم دَا يَوْم خَاصّ لِلّٰهْ الرَّبّ! مَا تَحْزَنَوْا وَ مَا تَبْكُوا!» ١٠ وَ بَتَّانْ قَالَوْا لَيْهُمْ: «أَمْشُوا وَ جَهُّزُوا أَكِلْ حَلُو وَ آكُلُوهْ وَ أَشَرْبَوْا شَرَابْ حَلُو وَ قَسُّمُوا مِنَّهْ لِلنَّاسْ الْمَا قِدْرَوْا جَهَّزَوْا شَيّءْ. أَشَانْ الْيَوْم دَا يَوْم خَاصّ لِرَبِّنَا. مَا تَحْزَنَوْا، أَشَّاجَعَوْا أَمْبَيْنَاتْكُو أَشَانْ الْفَرَحْ الْيَجِي مِنْ اللّٰهْ، هُو قُدْرِتْكُو!» ١١ وَ اللَّاوِيِّينْ كُلَ قَاعِدِينْ يِصَبُّرُوا كُلَّ النَّاسْ وَ بُقُولُوا: «أَسْكُتُوا، الْيَوْم دَا يَوْم خَاصّ. مَا تَحْزَنَوْا!»

١٢ وَ خَلَاصْ، كُلَّ النَّاسْ مَشَوْا أَشَانْ يَاكُلُوا وَ يَشَرْبَوْا وَ يِقَسُّمُوا الْأَكِلْ وَ يَفْرَحَوْا فَرْحَةْ كَبِيرَةْ أَشَانْ فِهْمَوْا الْكَلَامْ الْأَوْرَوْهُمْ.

عيد اللقاديب

١٣ وَ فِي الْيَوْم التَّانِي، كُبَارَاتْ هَنَا خُشُومْ الْبُيُوتْ وَ رُجَالْ الدِّينْ وَ اللَّاوِيِّينْ جَوْا لِعَزْرَا الْكَاتِبْ أَشَانْ يَفْهَمَوْا بِزِيَادَةْ مَعَنَى كَلَامْ التَّوْرَاةْ. ١٤ وَ لِقَوْا مَكْتُوبْ فِي كِتَابْ التَّوْرَاةْ الْاللّٰهْ نَزَّلَهْ لَيْهُمْ بِوَاسِطَةْ مُوسَى كَدَرْ بَنِي إِسْرَائِيلْ يَقْعُدُوا فِي لَقَادِيبْ فِي وَكْت الْعِيدْ الْبِعَيُّدُوهْ فِي الشَّهَرْ السَّابِعْ. ١٥ وَ الْعِيدْ دَا وَاجِبْ يِبَلُّغُوهْ لِبَنِي إِسْرَائِيلْ فِي كُلَّ مُدُنْهُمْ الْقَاعِدِينْ فَوْقهُمْ وَ فِي مَدِينَةْ الْقُدُسْ وَ يُقُولُوا لَيْهُمْ: «أَمُرْقُوا فِي الْجِبَالْ وَ جِيبُوا فُرُوعْ بِوَرْشَالْهُمْ مِنْ شَدَرْ الزَّيْتُونْ وَ زَيْتُونْ الْكَدَادَةْ وَ شَدَرْ الْوَادِي وَ شَدَرْ التَّمُرْ وَ أَيِّ نَفَرْ هَنَا شَدَرْ الْوَرْشَالَهْ كَتِيرْ. وَ بِالْفُرُوعْ دَوْل، سَوُّوا لَقَادِيبْ مِثِلْ مَكْتُوبْ فِي الْكِتَابْ.»

١٦ وَ خَلَاصْ، النَّاسْ مَرَقَوْا وَ جَابَوْا كُلَّ نَفَرْ هَنَا فُرُوعْ وَ سَوَّوْا لَقَادِيبْ، أَيِّ وَاحِدْ فِي رَاسْ دَنْقَايْتَهْ أَوْ فِي فَضَايْتَهْ. وَ وَاحِدِينْ كَمَانْ سَوَّوْا لَقَادِيبْهُمْ فِي فَضَايَةْ بَيْت اللّٰهْ وَ فِي النَّقَعَةْ الْقِدَّامْ بَابْ الْأَلْمِي وَ فِي النَّقَعَةْ الْقِدَّامْ بَابْ أَفْرَايِمْ.

١٧ وَ بِمِثِلْ دَا، كُلَّ الْجَمَاعَةْ الْقَبَّلَوْا مِنْ الْغُرْبَةْ سَوَّوْا لَقَادِيبْ وَ قَعَدَوْا فَوْقهُمْ. وَ مِنْ وَكِتْ يَشُوعْ وِلَيْد نُونْ لَحَدِّي الْيَوْم دَا، بَنِي إِسْرَائِيلْ مَا عَيَّدَوْا عِيدْ اللَّقَادِيبْ. وَ فِي الْيَوْم دَا، عَيَّدَوْا عِيدْ اللَّقَادِيبْ وَ فِرْحَوْا فَرْحَةْ شَدِيدَةْ. ١٨ وَ مِنْ أَوَّلْ يَوْم هَنَا الْعِيدْ لَحَدِّي كُمَالْتَهْ، قَاعِدِينْ يَقْرُوا مِنْ كِتَابْ تَوْرَاةْ اللّٰهْ كُلَّ يَوْم. وَ الْعِيدْ دَا قَعَدَوْا فَوْقَهْ سَبْعَةْ يَوْم وَ فِي الْيَوْم التَّامِنْ كَمَانْ، كَمَّلَوْا الْعِيدْ بِحَفْلَةْ كَبِيرَةْ حَسَبْ الْقَانُونْ.