أَمَصْيَا بِقي ملك في يَهُوذَا
٢٥
١ وَ أَمَصْيَا عِنْدَهْ 25 سَنَةْ وَكِتْ بِقِي مَلِكْ وَ حَكَمْ 29 سَنَةْ فِي مَدِينَةْ الْقُدُسْ.
وَ أَمَّهْ أُسُمْهَا يُوعَدَّانْ وَ هِي مِنْ مَدِينَةْ الْقُدُسْ.
٢ وَ هُو سَوَّى الْعَدِيلْ قِدَّامْ اللّٰهْ وَ لَاكِنْ مَا بِنِيَّةْ مُخْلِصَةْ.
٣ وَ وَكِتْ أَمَصْيَا ثَبَّتْ مُلْكَهْ،
هُو كَتَلْ كُلَّ مَسَائِيلَهْ الْكَتَلَوْا أَبُوهْ الْمَلِكْ يُوَاشْ.
٤ وَ لَاكِنْ هُو مَا كَتَلْ عِيَالْهُمْ.
وَ دَا حَسَبْ مَكْتُوبْ فِي كِتَابْ تَوْرَاةْ مُوسَى الْفَوْقَهْ اللّٰهْ أَمَرَاهُمْ وَ قَالْ:
«الْأَبَّهَاتْ مَا يَكْتُلُوهُمْ بِسَبَبْ ذَنِبْ الْعِيَالْ وَ الْعِيَالْ مَا يَكْتُلُوهُمْ بِسَبَبْ ذَنِبْ الْأَبَّهَاتْ.
أَيِّ وَاحِدْ يُمُوتْ بِسَبَبْ ذَنْبَهْ بَسْ.»
٥ وَ أَمَصْيَا لَمَّ رُجَالْ مَمْلَكَةْ يَهُوذَا وَ نَظَّمَاهُمْ عَلَيْ حَسَبْ عَايِلَاتْهُمْ.
وَ دَرَّجْ قُيَّادْ الْآلَافْ وَ قُيَّادْ الْمِيَاتْ لِكُلَّ قَبَايِلْ يَهُوذَا وَ بَنْيَامِينْ.
وَ هُو سَجَّلْ كُلَّ الرُّجَالْ الْعُمُرْهُمْ مِنْ 20 سَنَةْ وَ فَوْق وَ لِقِي عَدَدْهُمْ 300 000 رُجَالْ جَاهِزِينْ لِلْحَرِبْ وَ شَايْلِينْ حُرَابْ وَ دَرَقْ.
٦ وَ جَنَّدْ مِنْ مَمْلَكَةْ إِسْرَائِيلْ 100 000 رُجَالْ فُرَّاسْ مُرْتَزَقَةْ بِتَمَنْ هَنَا 3 400 كِيلَوْ هَنَا فُضَّةْ.
٧ وَ لَاكِنْ نَبِي اللّٰهْ جَاءْ لِأَمَصْيَا وَ قَالْ:
«يَا الْمَلِكْ!
خَلِّي عَسْكَرْ مَمْلَكَةْ إِسْرَائِيلْ مَا يَمْشُوا مَعَاكْ فِي الْحَرِبْ أَشَانْ اللّٰهْ مَا يُكُونْ مَعَ بَنِي إِسْرَائِيلْ،
مَعَ كُلَّ نَاسْ قَبِيلَةْ أَفْرَايِمْ دَوْل.
٨ وَ كَنْ هُمَّنْ مَاشِينْ مَعَاكْ،
كَنْ إِنْتَ بِقِيتْ شَدِيدْ فِي الْحَرِبْ كُلَ،
الرَّبّ يَرْمِيكْ قِدَّامْ عُدْوَانَكْ.
أَشَانْ الرَّبّ بَسْ عِنْدَهْ قُدْرَةْ يَفْزَعْ أَوْ يَرْمِي.»
٩ وَ أَمَصْيَا قَالْ لِنَبِي اللّٰهْ:
«نِسَوِّي كِكَّيْف لِلْفُضَّةْ الْوَزِنْهَا 3 400 كِيلَوْ الْأَنْطَيْتهَا لِعَسْكَرْ مَمْلَكَةْ إِسْرَائِيلْ؟»
وَ نَبِي اللّٰهْ قَالْ:
«اللّٰهْ عِنْدَهْ!
يَقْدَرْ يَنْطِيكْ زِيَادَةْ مِنْ دَا.»
١٠ وَ بَيْدَا،
أَمَصْيَا طَرَدْ الْعَسْكَرْ الْجَوْا مِنْ قَبِيلَةْ أَفْرَايِمْ أَشَانْ يِقَبُّلُوا بُيُوتْهُمْ.
وَ لَاكِنْ هُمَّنْ زِعِلَوْا ضِدّ مَمْلَكَةْ يَهُوذَا وَ قَبَّلَوْا بُيُوتْهُمْ بِزَعَلْ شَدِيدْ.
١١ وَ أَمَصْيَا شَدَّ حَيْلَهْ وَ وَدَّى شَعَبَهْ فِي وَادِي الْمِلِحْ وَ كَتَلْ 10 000 عَسْكَرْ أَدَوْمِيِّينْ مِنْ سَعِيرْ.
١٢ وَ شَعَبْ يَهُوذَا كَرَبَوْا 10 000 عَسْكَرْ آخَرِينْ وَ وَدَّوْهُمْ فِي رَاسْ حَجَرْ.
وَ رَمَوْهُمْ مِنْ رَاسْ الْحَجَرْ دَا وَ كُلُّهُمْ أَلْكَسَّرَوْا.
١٣ وَ فِي الْوَكِتْ دَا،
الْعَسْكَرْ الْأَمَصْيَا طَرَدَاهُمْ أَشَانْ مَا يِحَارُبُوا مَعَايَهْ دَا قَمَّوْا هَجَمَوْا حِلَّالْ بَلَدْ يَهُوذَا مِنْ السَّامِرَةْ لَحَدِّي بَيْت حُرُونْ.
وَ كَتَلَوْا 3 000 نَاسْ وَ شَالَوْا غَنِيمَةْ كَتِيرَةْ.
يَهُآش أنّصر في أَمَصْيَا
١٤ وَ وَكِتْ أَمَصْيَا مُقَبِّلْ مِنْ نَصْرَهْ فِي الْأَدَوْمِيِّينْ،
هُو جَابْ مَعَايَهْ إِلٰـهَاتْهُمْ مِنْ سَعِيرْ.
هُو سَوَّاهُمْ إِلٰـهَاتَهْ وَ قَاعِدْ يَعَبُدْهُمْ وَ يِحَرِّقْ لَيْهُمْ الْبَخُورْ.
١٥ وَ خَلَاصْ،
اللّٰهْ غِضِبْ غَضَبْ شَدِيدْ ضِدّ أَمَصْيَا وَ رَسَّلْ لَيَّهْ نَبِي أَشَانْ يِحَجِّي لَيَّهْ.
وَ النَّبِي قَالْ:
«مَالَا إِنْتَ تَابَعْت الْإِلٰـهَاتْ الْمَا قِدْرَوْا نَجَّوْا شَعَبْهُمْ مِنْ إِيدَكْ؟»
١٦ وَ لَاكِنْ وَكِتْ النَّبِي قَاعِدْ يِحَجِّي لَيَّهْ،
أَمَصْيَا قَطَعْ كَلَامَهْ وَ قَالْ:
«يَاتُو خَطَّاكْ مُسْتَشَارْ هَنَايِ أَنَا الْمَلِكْ؟
أَسْكُتْ كَنْ مَا تِدَوْر يُدُقَّكْ!»
وَ النَّبِي قَالْ:
«أَنَا نَعَرِفْ كَدَرْ الرَّبّ قَرَّرْ لِيِدَمِّرَكْ أَشَانْ إِنْتَ سَوَّيْت الشَّيّءْ دَا وَ أَبَيْت مَا تَسْمَعْ وَصِيّتِي.»
وَ بَعَدْ دَا،
سَكَتْ.
١٧ وَ أَمَصْيَا مَلِكْ مَمْلَكَةْ يَهُوذَا لِقِي وَصِيَّةْ مِنْ مُسْتَشَارِينْ آخَرِينْ وَ رَسَّلْ لِيَهُآشْ وِلَيْد يَهُوحَازْ وِلَيْد يَاهُو مَلِكْ مَمْلَكَةْ إِسْرَائِيلْ.
وَ قَالْ لَيَّهْ:
«تَعَالْ نِلْقَابَلَوْا وَ نِلْحَارَبَوْا!»
١٨ وَ يَهُآشْ مَلِكْ مَمْلَكَةْ إِسْرَائِيلْ رَسَّلْ لِأَمَصْيَا مَلِكْ مَمْلَكَةْ يَهُوذَا وَ حَجَّى لَيَّهْ بِالْمَثَلْ دَا:
«يَوْم مِنْ الْأَيَّامْ فِي جِبَالْ لُبْنَانْ،
شَوْكَايْ وَاحِدَةْ رَسَّلَتْ لِشَدَرْ الْأَرْز وَ قَالَتْ لَيَّهْ:
‹أَخِّدْ بِنَيِّتَكْ لِوِلَيْدِي!›
وَ لَاكِنْ تَيْتَلْ وَاحِدْ هَنَا لُبْنَانْ فَجَّقْ الشَّوْكَايْ دِي وَ رِحِكْهَا مَرَّةْ وَاحِدْ.»
١٩ وَ يَهُآشْ قَالْ بَتَّانْ:
«أَكِيدْ إِنْتَ أَنَّصَرْت فِي الْأَدَوْمِيِّينْ وَ فِي شَانْ دَا،
فِرِحْت بِنَصْرَكْ وَ قَاعِدْ تِلْفَشَّرْ.
وَ هَسَّعْ،
نُقُولْ لَيْك أَقْعُدْ سَاكِتْ فِي بَيْتَكْ.
مَالَا تِدَوْر تِقَوِّمْ حَرِبْ شَيْن الْيِدَمِّرَكْ إِنْتَ وَ مَمْلَكَةْ يَهُوذَا كُلَ؟»
٢٠ وَ لَاكِنْ أَمَصْيَا مَا سِمِعْ كَلَامَهْ أَشَانْ اللّٰهْ دَوَّرْ يِسَلِّمَهْ فِي إِيدْ عُدْوَانَهْ وَ دَا فِي شَانْ هُو تَابَعْ إِلٰـهَاتْ الْأَدَوْمِيِّينْ.
٢١ وَ خَلَاصْ،
يَهُآشْ مَلِكْ مَمْلَكَةْ إِسْرَائِيلْ مَرَقْ قَابَلَهْ.
وَ عَسْكَرْ يَهُآشْ وَ عَسْكَرْ أَمَصْيَا مَلِكْ مَمْلَكَةْ يَهُوذَا أَلْحَارَبَوْا فِي حِلَّةْ بَيْت شَمْس فِي بَلَدْ يَهُوذَا.
٢٢ وَ عَسْكَرْ مَمْلَكَةْ يَهُوذَا أَنْهَزَمَوْا قِدَّامْ عَسْكَرْ مَمْلَكَةْ إِسْرَائِيلْ وَ أَيِّ عَسْكَرِي عَرَّدْ قَبَّلْ بَيْتَهْ.
٢٣ وَ فِي حِلَّةْ بَيْت شَمْس،
يَهُآشْ مَلِكْ مَمْلَكَةْ إِسْرَائِيلْ كَرَبَهْ لِأَمَصْيَا وِلَيْد يُوَاشْ وِلَيْد أَخَزْيَا مَلِكْ مَمْلَكَةْ يَهُوذَا.
وَ هُو بِقِي مَسْجُونْ الْحَرِبْ وَ يَهُآشْ وَدَّاهْ مَدِينَةْ الْقُدُسْ.
وَ هِنَاكْ،
هُو كَسَّرْ دُرْدُرْ مَدِينَةْ الْقُدُسْ فِي طُولْ هَنَا 400 دُرَاعْ مِنْ بَابْ أَفْرَايِمْ لَحَدِّي بَابْ الرُّكُنْ.
٢٤ وَ يَهُآشْ شَالْ كُلَّ الدَّهَبْ وَ الْفُضَّةْ وَ الْمُعِدَّاتْ هَنَا بَيْت اللّٰهْ الْحَفَضَاهُمْ عُبَيْد أَدَوْم.
وَ شَالْ الْكَنْز مِنْ قَصِرْ الْمَلِكْ وَ خَطَفْ نَاسْ كُلَ.
وَ بَعَدْ دَا،
قَبَّلْ مَدِينَةْ السَّامِرَةْ.
نِهاية حُكُم أَمَصْيَا
٢٥ وَ أَمَصْيَا وِلَيْد يُوَاشْ مَلِكْ مَمْلَكَةْ يَهُوذَا عَاشْ 15 سَنَةْ بَعَدْ مَوْت يَهُآشْ وِلَيْد يَهُوحَازْ مَلِكْ مَمْلَكَةْ إِسْرَائِيلْ.
٢٦ وَ الْبَاقِي مِنْ عَمَلْ أَمَصْيَا مِنْ الْبِدَايَةْ لِلنِّهَايَةْ مَكْتُوبْ فِي كِتَابْ مُلُوكْ بَنِي يَهُوذَا وَ بَنِي إِسْرَائِيلْ.
٢٧ وَ مِنْ وَكِتْ أَمَصْيَا خَلَّى دَرِبْ اللّٰهْ،
نَاسْ وَاحِدِينْ أَتْمَرَّدَوْا ضِدَّهْ فِي مَدِينَةْ الْقُدُسْ.
وَ هُو عَرَّدْ وَ مَشَى حِلَّةْ لَكِيشْ لَاكِنْ هُمَّنْ رَسَّلَوْا نَاسْ وَرَايَهْ وَ كَتَلَوْه فِي الْحِلَّةْ دِي.
٢٨ وَ هُمَّنْ جَابَوْا جَنَازْتَهْ بِخَيْل وَ دَفَنَوْه فِي قَبُرْ جُدُودَهْ فِي عَاصِمَةْ بَلَدْ يَهُوذَا.