2 أخبار 18

علاقة يَهُوشَفَط مع أَخَاب

١ وَ يَهُوشَفَطْ بِقِي غَنِيْ مَرَّةْ وَاحِدْ وَ عِنْدَهْ شَرَفْ. وَ مَشَى أَنْرَبَطْ بِوَاسِطَةْ الْأَخِيدَةْ مَعَ أَخَابْ مَلِكْ مَمْلَكَةْ إِسْرَائِيلْ. ٢ وَ بَعَدْ سِنِينْ، يَهُوشَفَطْ مَشَى لِأَخَابْ فِي السَّامِرَةْ. وَ أَخَابْ دَبَحْ لَيَّهْ هُو وَ نَاسَهْ الْمَعَايَهْ غَنَمْ وَ بَقَرْ بِكَتَرَةْ. وَ حَرَّشَهْ أَشَانْ يَمْشُوا يَهْجُمُوا حِلَّةْ رَامُوتْ الْفِي قِلْعَادْ. ٣ وَ أَخَابْ مَلِكْ مَمْلَكَةْ إِسْرَائِيلْ قَالْ لِيَهُوشَفَطْ مَلِكْ مَمْلَكَةْ يَهُوذَا: «هَلْ إِنْتَ كُلَ تَمْشِي مَعَايِ لِنَهْجُمُوا حِلَّةْ رَامُوتْ الْفِي قِلْعَادْ وَلَّا؟» وَ يَهُوشَفَطْ رَدَّ لَيَّهْ وَ قَالْ: «أَيْوَى، أَنَا وَ إِنْتَ كُلِّنَا سَوَا وَ شَعَبِي مِثِلْ شَعَبَكْ. كُلِّنَا نَمْشُوا نِدَاوُسُوا سَوَا.»

الأنبياء أتْنبّأوا بالنصُر

٤ وَ لَاكِنْ يَهُوشَفَطْ قَالْ بَتَّانْ لِمَلِكْ مَمْلَكَةْ إِسْرَائِيلْ: «هَسَّعْ دَا، مِنْ فَضْلَكْ أَمْشِي أَسْأَلْ اللّٰهْ قَبُلْ.» ٥ وَ مَلِكْ مَمْلَكَةْ إِسْرَائِيلْ لَمَّ أَنْبِيَاء هِنَيْه وَ عَدَدْهُمْ 400 رَاجِلْ وَ قَالْ لَيْهُمْ: «هَلْ نَمْشُوا نَهْجُمُوا حِلَّةْ رَامُوتْ الْفِي قِلْعَادْ وَلَّا مَا نَمْشُوا؟» وَ هُمَّنْ رَدَّوْا لَيَّهْ وَ قَالَوْا: «أَمْشِي! الرَّبّ يِسَلِّمْهَا لَيْك فِي إِيدَكْ، يَا الْمَلِكْ!»

٦ وَ لَاكِنْ يَهُوشَفَطْ قَالْ: «هَلْ مَا فِي هِنِي نَبِي اللّٰهْ النَّقْدَرَوْا نَسْأَلَوْا بَيَّهْ اللّٰهْ وَلَّا؟» ٧ وَ مَلِكْ مَمْلَكَةْ إِسْرَائِيلْ قَالْ لِيَهُوشَفَطْ: «فِيَّهْ نَادُمْ وَاحِدْ الْيَقْدَرْ يَسْأَلْ لَيْنَا اللّٰهْ. وَ لَاكِنْ أَنَا نَكْرَهَهْ أَشَانْ هُو مَا يِتْنَبَّأْ بَيِّ بِالْخَيْر لَاكِنْ دَايْماً يِتْنَبَّأْ بَيِّ بِالْفَسَالَةْ. وَ النَّادُمْ دَا، هُو مِيكَا وِلَيْد يِمْلَا.» وَ يَهُوشَفَطْ قَالْ: «خَلِّي الْمَلِكْ مَا يِحَجِّي كَلَامْ مِثِلْ دَا!» ٨ وَ خَلَاصْ، الْمَلِكْ نَادَى وَاحِدْ مِنْ خَدَّامِينَهْ وَ قَالْ لَيَّهْ: «أَمْشِي عَجَلَةْ نَادِيهْ لِمِيكَا وِلَيْد يِمْلَا.»

٩ وَ مَلِكْ مَمْلَكَةْ إِسْرَائِيلْ وَ يَهُوشَفَطْ مَلِكْ مَمْلَكَةْ يَهُوذَا أَيِّ وَاحِدْ لَابِسْ خَلَقَهْ هَنَا الْمُلُكْ وَ قَعَدَوْا فِي كَرَاسِيهُمْ فِي الْمَدَقّ جَنْب خَشُمْ بَابْ مَدِينَةْ السَّامِرَةْ. وَ كُلَّ الْأَنْبِيَاء قَاعِدِينْ يِتْنَبَّأَوْا قِدَّامْهُمْ. ١٠ وَ وَاحِدْ مِنْ الْأَنْبِيَاء دَوْل أُسْمَهْ صِدْقِيَّا وِلَيْد كَنْعَانَا. هُو سَوَّى لَيَّهْ قُرُونْ هَنَا حَدِيدْ وَ قَالْ: «دَاهُو اللّٰهْ قَالْ: ‹بِالْقُرُونْ دَوْل تَضْرُبْ الْأَرَامِيَّيْن لَحَدِّي تِدَمِّرْهُمْ.›» ١١ وَ كُلَّ الْأَنْبِيَاء يِتْنَبَّأَوْا بِنَفْس الْكَلَامْ وَ قَالَوْا: «أَمْشِي أَهْجِمْ حِلَّةْ رَامُوتْ الْفِي قِلْعَادْ وَ إِنْتَ تَنْجَحْ وَ اللّٰهْ يِسَلِّمْهَا لَيْك فِي إِيدَكْ، يَا الْمَلِكْ!»

النبي مِيكَا أتْنبّأ بالهزيمة

١٢ وَ الْمُرْسَالْ الْمَشَى يِنَادِيهْ لِمِيكَا قَالْ لَيَّهْ: «دَاهُو كُلَّ الْأَنْبِيَاء كَلَامْهُمْ وَاحِدْ وَ يِحَجُّوا بِالْخَيْر لِلْمَلِكْ. هَسَّعْ دَا، خَلِّي كَلَامَكْ إِنْتَ كُلَ يَبْقَى سَوَا مَعَ كَلَامْهُمْ. إِنْتَ كُلَ حَجِّي بِالْخَيْر.» ١٣ وَ لَاكِنْ مِيكَا قَالْ لَيَّهْ: «نَحْلِفْ بِاللّٰهْ الْحَيّ كَدَرْ إِلَّا الْكَلَامْ الْقَالَهْ لَيِّ إِلٰـهِي، دَا بَسْ نُقُولَهْ.»

١٤ وَ وَكِتْ وَصَّلْ بَكَانْ الْمَلِكْ أَخَابْ، هُو قَالْ لَيَّهْ: «يَا مِيكَا، هَلْ نَمْشُوا نَهْجُمُوا حِلَّةْ رَامُوتْ الْفِي قِلْعَادْ وَلَّا مَا نَمْشُوا؟» وَ مِيكَا رَدَّ لَيَّهْ وَ قَالْ: «أَمْشُوا! إِنْتُو تَنْجَحَوْا وَ اللّٰهْ يِسَلِّمْهُمْ لَيْكُو فِي إِيدَيْكُو!» ١٥ وَ لَاكِنْ الْمَلِكْ قَالْ لَيَّهْ: «نَحَلِّفَكْ كَمْ مَرَّةْ لِتِأَوْرِينِي إِلَّا الْحَقّ بِأُسُمْ اللّٰهْ؟» ١٦ وَ مِيكَا رَدَّ لَيَّهْ وَ قَالْ: «أَنَا شِفْت كُلَّ بَنِي إِسْرَائِيلْ مُشَتَّتِينْ فِي الْجِبَالْ مِثِلْ غَنَمْ بَلَا رَاعِي. وَ اللّٰهْ قَالْ: ‹النَّاسْ دَوْل بَتَّانْ مَا عِنْدُهُمْ سِيدْ. خَلِّي أَيِّ وَاحِدْ يِقَبِّلْ بَيْتَهْ بِالسَّلَامَةْ.›»

١٧ وَ مَلِكْ مَمْلَكَةْ إِسْرَائِيلْ قَالْ لِيَهُوشَفَطْ: «أَنَا مَا قُلْت لَيْك كَدَرْ النَّادُمْ دَا مَا يِتْنَبَّأْ لَيِّ بِالْخَيْر لَاكِنْ يِتْنَبَّأْ لَيِّ بِالشَّرّ بَسْ!» ١٨ وَ خَلَاصْ، مِيكَا قَالْ لَيَّهْ: «هَسَّعْ دَا، أَسْمَعَوْا كَلَامْ اللّٰهْ! أَنَا شِفْت اللّٰهْ قَاعِدْ فِي عَرْشَهْ وَ كُلَّ قُوَّاتْ السَّمَاءْ وَاقْفِينْ جَنْبَهْ بِنُصَّهْ الزَّيْنَايْ وَ الْإِسْرَايْ. ١٩ وَ اللّٰهْ سَأَلَاهُمْ وَ قَالْ: ‹يَاتُو يَقْدَرْ يُغُشّ أَخَابْ مَلِكْ مَمْلَكَةْ إِسْرَائِيلْ لِيَمْشِي يَهْجِمْ حِلَّةْ رَامُوتْ الْفِي قِلْعَادْ وَ يُمُوتْ هِنَاكْ؟› وَ أَيِّ وَاحِدْ يِحَجِّي كَلَامْ شِقْ. ٢٠ وَ خَلَاصْ فِي الْبَكَانْ دَا، رُوحْ وَاحِدْ جَاءْ قِدَّامْ اللّٰهْ وَ قَالْ: ‹أَنَا بَسْ نُغُشَّهْ.› وَ اللّٰهْ قَالْ لَيَّهْ: ‹بِطَرِيقَةْ الْوَيْنِي؟› ٢١ وَ الرُّوحْ قَالْ: ‹أَنَا نَمْشِي وَ نَبْقَى رُوحْ الْكَدَّابْ فِي خُشُومْ كُلَّ أَنْبِيَاء الْمَلِكْ.› وَ اللّٰهْ قَالْ لَيَّهْ: ‹أَكِيدْ، مِثِلْ كَيْ تَقْدَرْ تُغُشَّهْ وَ تَنْجَحْ. أَمْشِي وَ سَوِّي مِثِلْ إِنْتَ قُلْتَهْ.›» ٢٢ وَ مِيكَا قَالْ: «دَاهُو اللّٰهْ بَسْ رَسَّلْ رُوحْ الْكَدَّابْ فِي خُشُومْ أَنْبِيَائَكْ وَ هُو بَسْ قَرَّرْ يِرَسِّلْ لَيْك الشَّرّ دَا.»

٢٣ وَ طَوَّالِي فِي الْبَكَانْ دَا، صِدْقِيَّا وِلَيْد كَنْعَانَا قَرَّبْ لِمِيكَا وَ شَدَّقَهْ وَ قَالْ لَيَّهْ: «كِكَّيْف رُوحْ اللّٰهْ مَرَقْ مِنِّي وَ حَجَّى لَيْك؟» ٢٤ وَ مِيكَا قَالْ لَيَّهْ: «تِشِيفَهْ يَوْم تَمْشِي تِلَّبَّدْ مِنْ غُرْفَةْ لِغُرْفَةْ فِي بَيْتَكْ.»

٢٥ وَ مَلِكْ مَمْلَكَةْ إِسْرَائِيلْ قَالْ: «أَكُرْبُوهْ لِمِيكَا وَ قَبُّلُوهْ بَكَانْ آمُونْ حَاكِمْ الْمَدِينَةْ وَ يُوَاشْ وِلَيْد الْمَلِكْ. ٢٦ وَ قُولُوا لَيْهُمْ: ‹دَاهُو كَلَامْ الْمَلِكْ هُو قَالْ: ”دِسُّوا النَّادُمْ دَا فِي السِّجِنْ وَ أَنْطُوهْ خُبْزَةْ وَ أَلْمِي شِيَّةْ شِيَّةْ بَسْ لَحَدِّي أَنَا نِقَبِّلْ بِالصِّحَّةْ وَ السَّلَامَةْ.“›» ٢٧ وَ مِيكَا قَالْ لِلْمَلِكْ: «كَنْ صَحِيحْ كَيْ إِنْتَ بَسْ قَبَّلْت بِصِحَّةْ وَ سَلَامَةْ دَا، اللّٰهْ مَا حَجَّى كَلَامَهْ لَيِّ أَنَا.» وَ قَالْ بَتَّانْ: «أَسْمَعَوْا، يَا كُلَّ الشَّعَبْ.»

الملك أَخَاب كتلوه في الدواس

٢٨ وَ مَلِكْ مَمْلَكَةْ إِسْرَائِيلْ وَ يَهُوشَفَطْ مَلِكْ مَمْلَكَةْ يَهُوذَا مَشَوْا لِيَهْجُمُوا حِلَّةْ رَامُوتْ الْفِي قِلْعَادْ. ٢٩ وَ مَلِكْ مَمْلَكَةْ إِسْرَائِيلْ قَالْ لِيَهُوشَفَطْ: «أَنَا نِغَيِّرْ خُلْقَانِي هَنَا الْمُلُكْ أَشَانْ مَا يَعَرْفُونِي وَ نَمْشِي الْحَرِبْ. وَ إِنْتَ كَمَانْ، أَقْعُدْ بِخُلْقَانَكْ هَنَا الْمُلُكْ.» وَ خَلَاصْ، مَلِكْ مَمْلَكَةْ إِسْرَائِيلْ غَيَّرْ خُلْقَانَهْ وَ مَشَى الدُّوَاسْ.

٣٠ وَ مَلِكْ بَلَدْ أَرَامْ أَنْطَى أَمُرْ لِكُبَارَاتْ عَرَبَاتَهْ هَنَا الْحَرِبْ وَ قَالْ لَيْهُمْ: «مَا تَهْجُمُوا الْعَسْكَرْ وَ لَا كُبَارَاتْهُمْ لَاكِنْ أَهْجُمُوا مَلِكْ مَمْلَكَةْ إِسْرَائِيلْ.» ٣١ وَ وَكِتْ كُبَارَاتْ عَرَبَاتَهْ شَافَوْه لِيَهُوشَفَطْ، قَالَوْا: «أَكِيدْ هُو دَا بَسْ مَلِكْ مَمْلَكَةْ إِسْرَائِيلْ!» وَ هُمَّنْ حَوَّقَوْه لِيِحَارُبُوهْ وَ لَاكِنْ يَهُوشَفَطْ كَوْرَكْ لِلْفَزَعْ وَ اللّٰهْ سَاعَدَهْ وَ بَعَّدَاهُمْ مِنَّهْ. ٣٢ وَ وَكِتْ كُبَارَاتْ الْعَرَبَاتْ عِرْفَوْا كَدَرْ دَا مَا مَلِكْ مَمْلَكَةْ إِسْرَائِيلْ، هُمَّنْ قَبَّلَوْا مِنْ وَرَايَهْ.

٣٣ وَ لَاكِنْ نَادُمْ وَاحِدْ زَرَقْ نُشَّابَهْ بَلَا هَدَفْ وَ النُّشَّابْ دَا لِحِقْ مَلِكْ مَمْلَكَةْ إِسْرَائِيلْ وَ ضَرَبَهْ أَمْبَيْن فَرَقَاتْ الدِّرِعْ. وَ طَوَّالِي، مَلِكْ مَمْلَكَةْ إِسْرَائِيلْ صَرَخْ لِسَوَّاقْ عَرَبَتَهْ وَ قَالْ: «قَبِّلْ! أَمْرُقْنِي مِنْ بَكَانْ الْحَرِبْ أَشَانْ أَنَا أَنْجَرَحْت.» ٣٤ وَ فِي الْيَوْم دَا، الْحَرِبْ بِقِي شَدِيدْ مَرَّةْ وَاحِدْ وَ الْمَلِكْ قَعَدْ فِي لُبّ عَرَبَتَهْ قِدَّامْ الْأَرَامِيَّيْن لَحَدِّي الْعَشِيَّةْ. وَ مَعَ وَقُوعْ الْحَرَّايْ دَا، هُو مَاتْ.