ملك بلد أَرَام ساعد آسَا
١٦
١ وَ فِي سَنِةْ 36 هَنَا حُكُمْ آسَا مَلِكْ مَمْلَكَةْ يَهُوذَا،
بَعَاشَى مَلِكْ مَمْلَكَةْ إِسْرَائِيلْ قَمَّ يِحَارِبْ مَمْلَكَةْ يَهُوذَا.
وَ قَوَّى حِلَّةْ الرَّامَةْ لِيَدْحَرْ الدَّرِبْ لِآسَا وَ نَاسَهْ مَا يَمُرْقُوا وَ لَا يَدْخُلُوا بِالدَّرِبْ دَا.
٢ وَ خَلَاصْ آسَا شَالْ مِنْ الْفُضَّةْ وَ الدَّهَبْ الْقَاعِدِينْ فِي مَخَازِنْ هَنَا بَيْت اللّٰهْ وَ قَصِرْ الْمَلِكْ وَ رَسَّلَاهُمْ لِبَنْهَدَادْ مَلِكْ بَلَدْ أَرَامْ الْقَاعِدْ فِي مَدِينَةْ دِمَشْق.
وَ رَسَّلْ لَيَّهْ وَ قَالْ:
٣ «خَلِّي نِسَوُّوا عَلَاقَةْ بَيْنِي وَ بَيْنَكْ مِثِلْ الْعَلَاقَةْ الْبِقَتْ أَمْبَيْن أَبُويِ وَ أَبُوكْ.
دَاهُو نِرَسِّلْ لَيْك فُضَّةْ وَ دَهَبْ وَ نَطْلُبْ مِنَّكْ تَقْطَعْ عَلَاقْتَكْ مَعَ بَعَاشَى مَلِكْ مَمْلَكَةْ إِسْرَائِيلْ.
وَ بَيْدَا،
يِوَقِّفْ الْحَرْبَةْ الْقَمَّ بَيْهَا ضِدِّي.»
٤ وَ بَنْهَدَادْ قَصَّدْ بِكَلَامْ الْمَلِكْ آسَا.
وَ خَلَاصْ،
هُو رَسَّلْ قُيَّادْ عَسْكَرَهْ وَ هَجَمَوْا حِلَّالْ مَمْلَكَةْ إِسْرَائِيلْ وَ شَالَوْا عِيُونْ وَ دَانْ وَ آبِلْ مَايِمْ وَ كُلَّ الْمَخَازِنْ هَنَا حِلَّالْ قَبِيلَةْ نَفْتَالِي.
٥ وَ مِنْ بَعَاشَى سِمِعْ بِالْخَبَرْ دَا،
خَلَّى مِنَّهْ قَوِيِّينْ حِلَّةْ الرَّامَةْ.
٦ وَ خَلَاصْ فِي الْبَكَانْ دَا،
الْمَلِكْ آسَا لَمَّ كُلَّ نَاسْ مَمْلَكَةْ يَهُوذَا لِيَنْقُلُوا الْحَجَرْ وَ الْحَطَبْ الْبَعَاشَى لَمَّاهُمْ لِيِقَوِّي بَيْهُمْ حِلَّةْ الرَّامَةْ.
وَ هُو أَسْتَعْمَلْ الْحَجَرْ وَ الْحَطَبْ دَوْل لِيِقَوِّي بَيْهُمْ حِلَّةْ قَبَعْ وَ حِلَّةْ مِصْفَةْ.
آسَا يسْجِن النبي حَنَانِي
٧ وَ فِي الْوَكِتْ دَا،
النَّبِي حَنَانِي جَاءْ لِآسَا مَلِكْ مَمْلَكَةْ يَهُوذَا وَ قَالْ لَيَّهْ:
«إِنْتَ أَتْوَكَّلْ عَلَيْ مَلِكْ أَرَامْ وَ مَا أَتْوَكَّلْ عَلَيْ اللّٰهْ إِلٰـهَكْ وَ بِالسَّبَبْ دَا،
عَسْكَرْ بَلَدْ أَرَامْ مَرَقَوْا مِنْ إِيدَكْ.
٨ اللِّيبِيِّينْ وَ الْحَبَشِيِّينْ هُمَّنْ عَسْكَرْ شُدَادْ وَ جَوْا بِعَرَبَاتْ الْحَرِبْ وَ سِيَادْ خَيْل كَتِيرِينْ مَرَّةْ وَاحِدْ.
وَ بَيْدَا كُلَ،
اللّٰهْ سَلَّمَاهُمْ لَيْك فِي إِيدَكْ وَكِتْ إِنْتَ أَتْوَكَّلْت عَلَيَّهْ.
٩ أَشَانْ اللّٰهْ قَاعِدْ يِرَاقِبْ فِي الْأَرْض لِيِسَاعِدْ النَّاسْ الْيِتَابُعُوهْ بِقَلِبْ مُخْلِصْ.
وَ إِنْتَ سَوَّيْت عَمَلْ مَا يَنْفَعْ وَ بِسَبَبْ دَا،
مِنْ الْيَوْم إِنْتَ تَوَاجِهْ الْحَرِبْ.»
١٠ وَ آسَا زِعِلْ فِي النَّبِي وَ قَيَّدَهْ فِي السِّجِنْ وَ هُو غِضِبْ زِيَادَةْ بِسَبَبْ الْكَلَامْ دَا.
وَ فِي الْوَكِتْ دَا،
هُو قَمَّ يِتَعِّبْ وَاحِدِينْ مِنْ الشَّعَبْ كُلَ.
نِهاية حُكُم آسَا
١١ وَ دَاهُو كُلَّ عَمَلْ آسَا مِنْ الْبِدَايَةْ لِلنِّهَايَةْ مَكْتُوبْ فِي كِتَابْ مُلُوكْ بَنِي يَهُوذَا وَ بَنِي إِسْرَائِيلْ.
١٢ وَ فِي سَنِةْ 39 هَنَا حُكْمَهْ،
آسَا مِرِضْ وَ كَرَبَهْ مَرَضْ شَدِيدْ فِي رِجِلَيْنَهْ.
وَ وَكِتْ هُو مَرْضَانْ،
مَا فَتَّشْ الشِّفَاءْ مِنْ اللّٰهْ لَاكِنْ هُو فَتَّشْ الدَّكَاتِيرْ لِيِعَالُجُوهْ.
١٣ وَ آسَا مَاتْ وَ لِحِقْ أَبَّهَاتَهْ فِي سَنِةْ 41 هَنَا حُكْمَهْ.
١٤ وَ دَفَنَوْه فِي الْقَبُرْ النَّكَتَهْ لِنَفْسَهْ فِي مَدِينَةْ دَاوُدْ.
وَ خَطَّوْا جَنَازْتَهْ فِي سَرِيرْ الصَّبَّوْا فَوْقَهْ رِيحَةْ وَ عِطِرْ الْخَلْبَطَوْه نَاسْ الْمُتَخَصِّصِينْ.
وَ هُمَّنْ حَرَّقَوْا لَيَّهْ رِيحَةْ كَتِيرَةْ لِيِشَرُّفُوهْ.