2 أخبار 10

ملمّة شَكِيم

١ وَ رَحَبْعَامْ قَمَّ مَشَى حِلَّةْ شَكِيمْ أَشَانْ كُلَّ بَنِي إِسْرَائِيلْ قَاعِدِينْ يَرْجَوْه هِنَاكْ لِيِدَرُّجُوهْ مَلِكْ. ٢ وَ وَكِتْ يَرُبَعَامْ وِلَيْد نَبَاتْ سِمِعْ الْخَبَرْ دَا، هُو لِسَّاعْ قَاعِدْ فِي مَصِرْ الْبَكَانْ الْأَوَّلْ هُو عَرَّدْ مِنْ الْمَلِكْ سُلَيْمَانْ. وَ قَبَّلْ مِنْ مَصِرْ. ٣ وَ رَسَّلَوْا نَادَوْه لِيَرُبَعَامْ وَ هُو جَاءْ. وَ هُو مَعَ كُلَّ بَنِي إِسْرَائِيلْ قَمَّوْا حَجَّوْا لِرَحَبْعَامْ وَ قَالَوْا لَيَّهْ: ٤ «أَبُوكْ سَوَّانَا مِثِلْ عَبِيدْ وَ خَطَّ فَوْقنَا خِدْمَةْ قَاسِيَةْ مِثِلْ دَامِي تَقِيلْ فِي رَقَبَتْنَا. وَ هَسَّعْ، نِدَوْرُوا مِنَّكْ إِنْتَ تِخَفِّفْ لَيْنَا تَقَلَةْ الدَّامِي الْأَبُوكْ خَطَّاهْ فَوْقنَا وَ أَنِحْنَ نَخْدُمُوا تِحْتَكْ.» ٥ وَ رَحَبْعَامْ قَالْ لَيْهُمْ: «قَبُّلُوا وَ بَعَدْ تَلَاتَةْ يَوْم تَعَالُوا لَيِّ.» وَ خَلَاصْ، الشَّعَبْ قَبَّلَوْا بُيُوتْهُمْ.

٦ وَ الْمَلِكْ رَحَبْعَامْ شَاوَرْ الشُّيُوخْ الْأَوَّلْ قَاعِدِينْ مَعَ أَبُوهْ سُلَيْمَانْ وَكِتْ هُو حَيّ. وَ قَالْ لَيْهُمْ: «شُنُو وَصِيِّتْكُو لَيِّ فِي كَلَامْ الشَّعَبْ دَا؟» ٧ وَ الشُّيُوخْ رَدَّوْا لَيَّهْ وَ قَالَوْا: «كَنْ إِنْتَ تَبْقَى زَيْن مَعَ الشَّعَبْ وَ تَرْضَى بِكَلَامْهُمْ وَ تُرُدّ لَيْهُمْ بِكَلَامْ حَلُو، خَلَاصْ هُمَّنْ يَخْدُمُوا دَايْماً تِحْتَكْ.»

٨ وَ لَاكِنْ رَحَبْعَامْ أَبَى وَصِيَّةْ الشُّيُوخْ الْأَنْطَوْهَا لَيَّهْ. وَ هُو شَاوَرْ الصُّبْيَانْ الْكِبْرَوْا مَعَايَهْ سَوَا وَ قَاعِدِينْ يَخْدُمُوا لَيَّهْ. ٩ وَ هُو سَأَلَاهُمْ لِلصُّبْيَانْ دَوْل وَ قَالْ: «شُنُو وَصِيِّتْكُو فِي الشَّعَبْ الْبِدَوْرُوا نِخَفِّفْ لَيْهُمْ تَقَلَةْ الدَّامِي الْأَبُويِ خَطَّاهْ فَوْقهُمْ؟» ١٠ وَ الصُّبْيَانْ الْكِبْرَوْا مَعَايَهْ قَالَوْا: «الشَّعَبْ يَشْكُوا كَدَرْ أَبُوكْ خَطَّ فَوْقهُمْ دَامِي تَقِيلْ وَ يِدَوْرُوا إِنْتَ تِخَفِّفَهْ لَيْهُمْ. وَ دَاهُو الْكَلَامْ التُّقُولَهْ لَيْهُمْ: ‹أُصْبَعِي الصَّغَيَّرْ دَا كَبِيرْ مِنْ صُلُبْ أَبُويِ. ١١ صَحِيحْ أَبُويِ خَطَّ فَوْقكُو دَامِي تَقِيلْ وَ لَاكِنْ هَسَّعْ دَا، أَنَا نِزِيدْ فَوْقكُو تَقَلَةْ آخَرَةْ! أَبُويِ جَلَدَاكُو بِسَوْط هَنَا فَرْوَةْ وَ لَاكِنْ أَنَا نَجْلِدْكُو بِسَوْط الْعِنْدَهْ حَدِيدْ مِثِلْ دَنَبْ الْعَقْرَبْ.›»

١٢ وَ بَعَدْ تَلَاتَةْ يَوْم، يَرُبَعَامْ وَ كُلَّ الشَّعَبْ قَبَّلَوْا جَوْا لِرَحَبْعَامْ مِثِلْ هُو قَالَهْ لَيْهُمْ: «قَبُّلُوا وَ بَعَدْ تَلَاتَةْ يَوْم، تَعَالُوا لَيِّ.» ١٣ وَ الْمَلِكْ رَحَبْعَامْ أَبَى وَصِيَّةْ الشُّيُوخْ وَ حَجَّى لِلشَّعَبْ بِكَلَامْ قَوِي. ١٤ وَ رَدَّ لَيْهُمْ حَسَبْ وَصِيَّةْ الصُّبْيَانْ وَ قَالْ لَيْهُمْ: «أَبُويِ خَطَّ فَوْقكُو دَامِي تَقِيلْ وَ هَسَّعْ أَنَا نِزِيدْ فَوْقكُو تَقَلَةْ آخَرَةْ. أَبُويِ جَلَدَاكُو بِسَوْط هَنَا فَرْوَةْ لَاكِنْ أَنَا نَجْلِدْكُو بِسَوْط الْعِنْدَهْ حَدِيدْ مِثِلْ دَنَبْ الْعَقْرَبْ.»

١٥ وَ الْمَلِكْ مَا سِمِعْ كَلَامْ الشَّعَبْ. وَ دَا جَايِ مِنْ الرَّبّ أَشَانْ اللّٰهْ دَوَّرْ يِحَقِّقْ كَلَامَهْ الْقَالَهْ لِيَرُبَعَامْ وِلَيْد نَبَاتْ بِوَاسِطَةْ النَّبِي أَخِيَّا الْمِنْ حِلَّةْ شِيلَوْه.

بني إسرائيل بِقوا ممْلكتَيْن

١٦ وَ وَكِتْ كُلَّ قَبَايِلْ بَنِي إِسْرَائِيلْ شَافَوْا كَدَرْ الْمَلِكْ مَا سِمِعْ كَلَامْهُمْ دَا، قَالَوْا لَيَّهْ: «شُنُو الْيِلِمِّنَا مَعَ ذُرِّيَّةْ دَاوُدْ؟ أَنِحْنَ مَا عِنْدِنَا وَرَثَةْ مَعَ عِيَالْ يَسَّى! يَلَّا، يَا قَبَايِلْ إِسْرَائِيلْ، خَلِّي أَيِّ وَاحِدْ يِقَبِّلْ بَيْتَهْ! وَ هَسَّعْ دَا، يَا ذُرِّيَّةْ دَاوُدْ، هِمُّوا بِنُفُوسْكُو.» وَ خَلَاصْ، كُلَّ بَنِي إِسْرَائِيلْ شَتَّوْا وَ قَبَّلَوْا بُيُوتْهُمْ.

١٧ وَ بَيْدَا، رَحَبْعَامْ قَاعِدْ يَحْكِمْ فِي قَبَايِلْ إِسْرَائِيلْ السَّاكْنِينْ فِي حِلَّالْ بَلَدْ يَهُوذَا بَسْ. ١٨ وَ الْمَلِكْ رَحَبْعَامْ رَسَّلْ أَدُرَامْ مُرَاقِبْ هَنَا الْخِدْمَةْ الْإِجْبَارِيَّةْ لِقَبَايِلْ بَنِي إِسْرَائِيلْ السَّاكْنِينْ فِي مُنْشَاقْ الْبَلَدْ. لَاكِنْ هُمَّنْ دَوْل لَمَّوْا فَوْقَهْ وَ رَجَمَوْه وَ مَاتْ. وَ الْمَلِكْ رَحَبْعَامْ ذَاتَهْ يَلَّا يَلَّا رِكِبْ فِي عَرَبَتَهْ وَ عَرَّدْ مَشَى مَدِينَةْ الْقُدُسْ. ١٩ وَ بِمِثِلْ دَا، قَبَايِلْ إِسْرَائِيلْ السَّاكْنِينْ فِي الْمُنْشَاقْ أَتْمَرَّدَوْا ضِدّ ذُرِّيَّةْ دَاوُدْ لَحَدِّي الْيَوْم.