1 صَمُوِيل 28

١ وَ فِي الْوَكِتْ دَا، الْفِلِسْطِيِّينْ لَمَّوْا عَسْكَرْهُمْ لِيِحَارُبُوا بَنِي إِسْرَائِيلْ. وَ أَكِيشْ قَالْ لِدَاوُدْ: «وَاجِبْ تَعَرِفْ كَدَرْ إِنْتَ وَ نَاسَكْ تَمْشُوا مَعَايِ لِلْحَرِبْ.» ٢ وَ دَاوُدْ قَالْ لِأَكِيشْ: «سَمَحْ. إِنْتَ ذَاتَكْ تِشِيفْ الشَّيّءْ الْعَبْدَكْ يِسَوِّيهْ!» وَ الْمَلِكْ قَالْ لِدَاوُدْ: «تَمَامْ. مِنْ هِنِي لِقِدَّامْ، إِنْتَ تَبْقَى مَسْؤُولْ حَرَسِي.»

شَاوُول مشى ليِشوُّفوا ليه

٣ وَ صَمُوِيلْ مَاتْ وَ دَفَنَوْه فِي حِلِّتَهْ الرَّامَةْ وَ كُلَّ بَنِي إِسْرَائِيلْ حِزْنَوْا لَيَّهْ. وَ بَعَدْ دَا، شَاوُولْ قَمَّ طَرَدْ كُلَّ النَّاسْ الْيِكَلُّمُوا مَعَ الْمَيْتِينْ وَ النَّاسْ الْيِحَجُّوا مَعَ الْجُنُونْ مِنْ بَلَدْ إِسْرَائِيلْ.

٤ وَ الْفِلِسْطِيِّينْ لَمَّوْا نَاسْهُمْ وَ جَوْا خَطَّوْا مُعَسْكَرْهُمْ فِي حِلَّةْ شُونَمْ. وَ شَاوُولْ كُلَ لَمَّ كُلَّ بَنِي إِسْرَائِيلْ وَ خَطَّوْا مُعَسْكَرْهُمْ فِي جَبَلْ قِلْبُوعَةْ. ٥ وَ لَاكِنْ وَكِتْ شَاوُولْ شَافْ مُعَسْكَرْ الْفِلِسْطِيِّينْ، خَافْ خَوْف شَدِيدْ وَ بَدَا يَرْجِفْ. ٦ وَ شَاوُولْ سَأَلْ اللّٰهْ لَاكِنْ اللّٰهْ مَا رَدَّ لَيَّهْ وَ لَا بِرُؤْيَةْ وَ لَا بِأُرِيمْ وَ لَا بِالْأَنْبِيَاء. ٧ وَ شَاوُولْ قَالْ لِخَدَّامِينَهْ: «فَتُّشُوا لَيِّ مَرَةْ التَّقْدَرْ تِكَلِّمْ مَعَ الْمَيْتِينْ وَ أَنَا نَمْشِي لِتِشِيفْ لَيِّ.» وَ خَدَّامِينَهْ قَالَوْا لَيَّهْ: «دَاهُو مَرَةْ وَاحِدَةْ الْقَاعِدَةْ فِي حِلَّةْ عَيْن دُورْ تِكَلِّمْ مَعَ الْمَيْتِينْ.»

٨ وَ شَاوُولْ بَدَّلْ خُلْقَانَهْ هَنَا الْمُلُكْ وَ لِبِسْ خُلْقَانْ آخَرِينْ وَ مَشَى بَكَانْ الْمَرَةْ مَعَ إِتْنَيْن مِنْ خَدَّامِينَهْ. وَ هُمَّنْ وَصَّلَوْا بِاللَّيْل وَ شَاوُولْ قَالْ لَيْهَا: «شِيفِي لَيِّ وَ نَادِي الْمَيِّتْ النِّأَوْرِيكِ بَيَّهْ.» ٩ وَ الْمَرَةْ قَالَتْ لَيَّهْ: «إِنْتَ تَعَرِفْ عَدِيلْ كَدَرْ شَاوُولْ طَرَدْ مِنْ الْبَلَدْ كُلَّ النَّاسْ الْبِكَلُّمُوا مَعَ الْمَيْتِينْ وَ الْجُنُونْ. وَ مَالَا إِنْتَ تُكُجّ لَيِّ شَرَكْ وَ تِدَوْر تَكْتُلْنِي؟» ١٠ وَ شَاوُولْ حَلَفْ لَيْهَا بِاللّٰهْ وَ قَالْ: «نَحْلِفْ بِاللّٰهْ الْحَيّ، أَكِيدْ الْعِقَابْ مَا يَجِي لَيْكِ بِالسَّبَبْ دَا!» ١١ وَ الْمَرَةْ قَالَتْ: «تِدَوْر نِنَادِي لَيْك يَاتُو؟» وَ هُو قَالْ: «نَادِي لَيِّ صَمُوِيلْ.»

١٢ وَ وَكِتْ الْمَرَةْ شَافَتْ صَمُوِيلْ، صَرَخَتْ وَ قَالَتْ لِشَاوُولْ: «مَالَا غَشَّيْتنِي؟ إِنْتَ شَاوُولْ!» ١٣ وَ الْمَلِكْ شَاوُولْ قَالْ لَيْهَا: «مَا تَخَافَيْ! لَاكِنْ شِفْتِ شُنُو؟» وَ الْمَرَةْ قَالَتْ لَيَّهْ: «أَنَا شِفْت نَادُمْ بِخَوِّفْ طَالِعْ مِنْ تِحِتْ الْأَرْض.» ١٤ وَ شَاوُولْ قَالْ: «شَبَهَهْ كِكَّيْف؟» وَ هِي قَالَتْ: «رَاجِلْ شَايِبْ طَالِعْ مِنْ تِحِتْ الْأَرْض وَ مُغَطَّي بِخَلَقْ الْأَنْبِيَاء.» وَ شَاوُولْ عِرِفْ كَدَرْ دَا صَمُوِيلْ. وَ خَلَاصْ، شَاوُولْ دَنْقَرْ فِي الْأَرْض وَ سَجَدْ.

صَمُوِيل حجّى لشَاوُول

١٥ وَ صَمُوِيلْ قَالْ لِشَاوُولْ: «مَالَا تِبَرْجِلْ مَرْقَدِي وَ تِقَوِّمْنِي؟» وَ شَاوُولْ قَالْ: «أَنَا أَضَّايَقْت مَرَّةْ وَاحِدْ. الْفِلِسْطِيِّينْ جَوْا لِيِحَارُبُونِي وَ الرَّبّ أَبَانِي وَ مَا رَدَّ لَيِّ وَ لَا بِالْأَنْبِيَاء وَ لَا بِرُؤْيَةْ. أَشَانْ دَا بَسْ، أَنَا نَادَيْتَكْ لِتِعَرِّفْنِي الشَّيّءْ الْوَاجِبْ نِسَوِّيهْ.»

١٦ وَ صَمُوِيلْ قَالْ لَيَّهْ: «كَنْ اللّٰهْ أَبَاكْ وَ بِقِي لَيْك مِثِلْ عَدُو، مَالَا تِنَادِينِي؟ ١٧ أَشَانْ اللّٰهْ تَمَّ الْكَلَامْ الْقَالَهْ لَيْك بِوَاسِطَتِي أَنَا. شَالْ مِنَّكْ الْمُلُكْ وَ أَنْطَاهْ لِنَادُمْ آخَرْ قَرِيبَكْ وَ هُو دَاوُدْ. ١٨ وَ دَا أَشَانْ إِنْتَ مَا سِمِعْت كَلَامْ اللّٰهْ وَ مَا عَاقَبْت الْعَمَالِقْ حَسَبْ غَضَبْ اللّٰهْ. وَ بَيْدَا، الْيَوْم اللّٰهْ قَبَّلْ لَيْك الشَّيّءْ دَا فِي رَاسَكْ. ١٩ وَ يِسَلِّمَكْ إِنْتَ وَ بَنِي إِسْرَائِيلْ فِي إِيدْ الْفِلِسْطِيِّينْ. وَ أَمْبَاكِرْ، إِنْتَ وَ عِيَالَكْ كُلُّكُو تُمُوتُوا وَ تُكُونُوا مَعَايِ هِنِي. وَ اللّٰهْ يِسَلِّمْ مُعَسْكَرْ بَنِي إِسْرَائِيلْ كُلَ فِي إِيدْ الْفِلِسْطِيِّينْ.»

٢٠ وَ وَكِتْ شَاوُولْ سِمِعْ كَلَامْ صَمُوِيلْ، طَوَّالِي أَنْبَهَتْ وَ وَقَعْ تِحِتْ وَ أَلْمَطَّطْ. وَ هُو مَا عِنْدَهْ قُدْرَةْ أَشَانْ مَا أَكَلْ شَيّءْ طُولْ اللَّيْل وَ النَّهَارْ. ٢١ وَ الْمَرَةْ قَرَّبَتْ لِشَاوُولْ وَ شَافَتْ هُو أَنْبَهَتْ بِزِيَادَةْ وَ قَالَتْ لَيَّهْ: «شِيفْ، أَنَا خَادْمَكْ سِمِعْت كَلَامَكْ وَ دَسَّيْت نَفْسِي فِي الْخُطُورَةْ وَ سَوَّيْت كُلَّ شَيّءْ الْإِنْتَ طَلَبْتَهْ مِنِّي. ٢٢ هَسَّعْ دَا، مِنْ فَضْلَكْ أَسْمَعْ كَلَامْ خَادْمَكْ. خَلِّينِي نِجِيبْ لَيْك خُبْزَةْ شِيَّةْ. آكُلْ أَشَانْ تَلْقَى قُدْرَةْ وَ تَمْشِي.» ٢٣ وَ شَاوُولْ أَبَى وَ قَالْ: «أَنَا مَا نَاكُلْ.»

وَ لَاكِنْ خَدَّامِينَهْ وَ الْمَرَةْ عَصَّرَوْه وَ هُو سِمِعْ كَلَامْهُمْ. وَ قَمَّ مِنْ التُّرَابْ وَ قَعَدْ فِي السَّرِيرْ. ٢٤ وَ طَوَّالِي، الْمَرَةْ مَشَتْ شَالَتْ عِجِلْهَا السَّمِينْ وَ دَبَحَتَهْ وَ شَالَتْ دَقِيقْ عَجَّنَتَهْ وَ سَوَّتَهْ خُبْزَةْ بَلَا تَوَّارَةْ. ٢٥ وَ هِي قَدَّمَتَهْ لِشَاوُولْ وَ خَدَّامِينَهْ وَ هُمَّنْ أَكَلَوْا. وَ بَعَدْ دَا، قَمَّوْا فَاتَوْا فِي نَفْس اللَّيْلَةْ دِي.