1 صَمُوِيل 19

شَاوُول حاول يكْتُل دَاوُد

١ وَ شَاوُولْ كَلَّمْ لِوِلَيْدَهْ يُونَتَانْ وَ كُلَّ خَدَّامِينَهْ كَدَرْ هُو يِدَوْر يَكْتُلْ دَاوُدْ. وَ لَاكِنْ يُونَتَانْ وِلَيْد شَاوُولْ عِنْدَهْ مَحَبَّةْ شَدِيدَةْ لِدَاوُدْ. ٢ وَ يُونَتَانْ جَاءْ خَبَّرَهْ لِدَاوُدْ وَ قَالْ لَيَّهْ: «أَبُويِ شَاوُولْ يِدَوْر يَكْتُلَكْ! أَبْقَى حَضِيرْ أَمْبَاكِرْ فَجُرْ. فَتِّشْ لَيْك بَكَانْ وَ أَلَّبَّدْت فَوْقَهْ. ٣ وَ أَنَا نَمْرُقْ وَ نَمْشِي مَعَ أَبُويِ فِي الزَّرَعْ الْإِنْتَ مُلَّبِّدْ فَوْقَهْ. وَ أَنَا نِحَجِّي لَيَّهْ بَيْك وَ نَسْمَعْ هُو يُقُولْ شُنُو. وَ بَعَدَيْن نِخَبِّرَكْ.»

٤ وَ يُونَتَانْ حَجَّى لِشَاوُولْ أَبُوهْ بِكُلَّ الْخَيْر الدَّاوُدْ سَوَّاهْ وَ قَالْ: «يَا الْمَلِكْ! مَا تَخْطَا فِي خَدَّامَكْ دَاوُدْ أَشَانْ هُو مَا خِطِي فَوْقَكْ. وَ هُو سَوَّى لَيْك دَايْماً الْخَيْر. ٥ وَ دَسَّ نَفْسَهْ فِي الْخُطُورَةْ وَكِتْ هُو كَتَلْ الْفِلِسْطِي. وَ بَيْدَا، اللّٰهْ نَصَرْ كُلَّ بَنِي إِسْرَائِيلْ نَصُرْ كَبِيرْ. وَ إِنْتَ ذَاتَكْ شِفْتَهْ وَ فِرِحْت بَيَّهْ. وَ مَالَا تَخْطَا وَ تِدَفِّقْ دَمّ هَنَا إِنْسَانْ بَرِي مِثِلْ دَاوُدْ وَ تَكْتُلَهْ بَلَا جَنِيَّةْ؟» ٦ وَ شَاوُولْ سِمِعْ كَلَامْ يُونَتَانْ وِلَيْدَهْ وَ حَلَفْ وَ قَالْ: «نَحْلِفْ بِاللّٰهْ الْحَيّ، بَتَّانْ لِدَاوُدْ مَا نَكْتُلَهْ!»

٧ وَ خَلَاصْ، يُونَتَانْ نَادَاهْ لِدَاوُدْ وَ خَبَّرَهْ بِكُلَّ الْكَلَامْ دَا. وَ بَتَّانْ جَابْ دَاوُدْ لِأَبُوهْ شَاوُولْ. وَ دَاوُدْ قَاعِدْ يَخْدِمْ لَيَّهْ مِثِلْ أَوَّلْ.

مِكَال نجّت دَاوُد من المَوْت

٨ وَ الْحَرِبْ مَعَ الْفِلِسْطِيِّينْ بَدَا بَتَّانْ وَ دَاوُدْ مَشَى هَجَمَاهُمْ وَ خَسَّرَاهُمْ خَسَارَةْ كَبِيرَةْ. وَ هُمَّنْ عَرَّدَوْا مِنَّهْ. ٩ وَ رُوحْ فَسْلَةْ مِنْ اللّٰهْ نَزَلَتْ فِي شَاوُولْ. وَ هُو قَاعِدْ فِي بَيْتَهْ وَ حَرِبْتَهْ فِي إِيدَهْ. وَ دَاوُدْ كَمَانْ قَاعِدْ يُدُقّ فِي جِقِنْدِيّتَهْ. ١٠ وَ شَاوُولْ دَوَّرْ يِلَصِّقَهْ لِدَاوُدْ فِي الدُّرْدُرْ بِحَرِبْتَهْ. وَ لَاكِنْ دَاوُدْ خَنَسْ وَ الْحَرْبَةْ لِصْقَتْ فِي الدُّرْدُرْ. وَ بَيْدَا، دَاوُدْ جَرَى فَاتْ فِي اللَّيْلَةْ دِي. ١١ وَ شَاوُولْ رَسَّلْ نَاسْ فِي بَيْت دَاوُدْ لِيِرَاقُبُوهْ وَ أَمْبَاكِرْ فَجُرْ كَمَانْ، يَكْتُلُوهْ. لَاكِنْ مِكَالْ مَرِةْ دَاوُدْ خَبَّرَتْ رَاجِلْهَا وَ قَالَتْ: «كَنْ مَا عَرَّدْت فِي اللَّيْلَةْ دِي، أَمْبَاكِرْ فَجُرْ يَكْتُلُوكْ!»

١٢ وَ خَلَاصْ، مِكَالْ سَاعَدَتْ رَاجِلْهَا دَاوُدْ وَ مَرَقَتَهْ مِنْ الشُّبَّاكْ. وَ بِمِثِلْ دَا، دَاوُدْ عَرَّدْ وَ نِجِي. ١٣ وَ بَعَدْ دَا، مِكَالْ شَالَتْ صَنَمْ وَ رَقَّدَتَهْ فِي السَّرِيرْ وَ خَطَّتْ فَرْوَةْ هَنَا غَنَمْ فِي رَاسَهْ وَ غَطَّتَهْ بِخَلَقْ. ١٤ وَ وَكِتْ شَاوُولْ رَسَّلْ نَاسْ لِيَكُرْبُوا دَاوُدْ، مِكَالْ قَالَتْ لَيْهُمْ: «هُو مَرْضَانْ.» ١٥ وَ شَاوُولْ قَبَّلَاهُمْ لِلنَّاسْ دَوْل وَ قَالْ: «جِيبُوهْ لَيِّ فِي لُبّ سَرِيرَهْ لِنِتَمِّمَهْ مَرَّةْ وَاحِدْ!»

١٦ وَ وَكِتْ الرُّجَالْ دَخَلَوْا فِي بَيْت دَاوُدْ، مَا لِقَوْه. لَاكِنْ لِقَوْا الصَّنَمْ فِي السَّرِيرْ وَ فَرْوَةْ الْغَنَمْ فِي رَاسَهْ. ١٧ وَ شَاوُولْ نَادَاهَا لِمِكَالْ وَ قَالْ لَيْهَا: «مَالَا غَشَّيْتِينِي وَ خَلَّيْتِ عَدُويِ جَرَى وَ نِجِي؟» وَ مِكَالْ رَدَّتْ لِشَاوُولْ وَ قَالَتْ: «هُو قَالْ لَيِّ: ‹خَلِّينِي نَمْشِي! وَلَّا تِدَوْرِي نَكْتُلْكِ؟›»

دَاوُد عرّد و شَاوُول تابعه

١٨ وَ بِمِثِلْ دَا، دَاوُدْ عَرَّدْ وَ نِجِي. وَ مَشَى لِصَمُوِيلْ فِي حِلَّةْ الرَّامَةْ وَ حَجَّى لَيَّهْ بِكُلَّ شَيّءْ الشَّاوُولْ سَوَّاهْ لَيَّهْ. وَ هُمَّنْ قَمَّوْا مَشَوْا سَكَنَوْا فِي حِلَّةْ نَيُوتْ. ١٩ وَ نَاسْ جَوْا خَبَّرَوْا شَاوُولْ وَ قَالَوْا لَيَّهْ: «دَاهُو دَاوُدْ مَشَى نَيُوتْ، قَرِيبْ لِحِلَّةْ الرَّامَةْ.»

٢٠ وَ خَلَاصْ، شَاوُولْ رَسَّلْ نَاسْ لِيَكُرْبُوا دَاوُدْ. وَ لَاكِنْ وَكِتْ وَصَّلَوْا، شَافَوْا مَجْمُوعَةْ مِنْ الْأَنْبِيَاء قَاعِدِينْ يِتْنَبَّأَوْا وَ فِي رَاسْهُمْ صَمُوِيلْ وَاقِفْ بِطُولَهْ. وَ رُوحْ اللّٰهْ نَزَلْ فِي النَّاسْ الرَّسَّلَوْهُمْ وَ هُمَّنْ كُلَ بَدَوْا يِتْنَبَّأَوْا.

٢١ وَ جَوْا خَبَّرَوْا شَاوُولْ بِالشَّيّءْ دَا وَ هُو قَمَّ رَسَّلْ نَاسْ آخَرِينْ. لَاكِنْ هُمَّنْ كُلَ بَدَوْا يِتْنَبَّأَوْا. وَ رَسَّلْ نَاسْ آخَرِينْ لِتَالِتْ مَرَّةْ وَ هُمَّنْ دَوْل كُلَ بَدَوْا يِتْنَبَّأَوْا.

٢٢ وَ فِي الأَخِيرْ، شَاوُولْ ذَاتَهْ قَمَّ مَشَى لِحِلَّةْ الرَّامَةْ. وَ وَكِتْ وِصِلْ فِي الْبِيرْ الْكَبِيرَةْ الْقَاعِدَةْ فِي حِلَّةْ سِيكُو، هُو سَأَلْ وَ قَالْ: «وَيْن صَمُوِيلْ وَ دَاوُدْ؟» وَ رَدَّوْا لَيَّهْ وَ قَالَوْا: «هُمَّنْ قَاعِدِينْ فِي نَيُوتْ قَرِيبْ لِحِلَّةْ الرَّامَةْ.» ٢٣ وَ وَكِتْ هُو مَاشِي لِنَيُوتْ قَرِيبْ لِحِلَّةْ الرَّامَةْ، رُوحْ اللّٰهْ نَزَلْ فَوْقَهْ هُو كُلَ وَ مَاشِي وَ قَاعِدْ يِتْنَبَّأْ لَحَدِّي وِصِلْ فِي نَيُوتْ. ٢٤ وَ خَلَاصْ، شَاوُولْ سَلَّ خَلَقَهْ وَ هُو كُلَ قَاعِدْ يِتْنَبَّأْ قِدَّامْ صَمُوِيلْ. وَ وَقَعْ عَرْيَانْ وَ قَاعِدْ وَاقْعِ طُولْ الْيَوْم دَا وَ طُولْ اللَّيْلَةْ دِي. وَ بِسَبَبْ دَا بَسْ، النَّاسْ يُقُولُوا: «شَاوُولْ كُلَ بِقِي نَبِي مَعَاهُمْ وَلَّا؟»