1 صَمُوِيل 9

شَاوُول مشى يفتِّش حمير

١ وَ فِيَّهْ نَادُمْ وَاحِدْ مِنْ بَلَدْ بَنْيَامِينْ أُسْمَهْ قِيشْ. وَ عَايِشْ فِي الْبَلَدْ دِي وَ هُو سِيدْ الْمَالْ. وَ هُو وِلَيْد أَبِيِيلْ وِلَيْد صَرُورْ وِلَيْد بَكُورَتْ وِلَيْد أَفِيَحْ. ٢ وَ قِيشْ عِنْدَهْ وِلَيْد أُسْمَهْ شَاوُولْ. هُو صَبِي جَمِيلْ وَ نَادُمْ مِنْ بَنِي إِسْرَائِيلْ الْيُفُوتَهْ دَا، مَا فِيهْ. هُو فَاتَاهُمْ كُلُّهُمْ بِطُولْ، رَاسَهْ وَ كَتَافَيْه مَارْقِينْ فَوْق مِنْهُمْ.

٣ وَ يَوْم وَاحِدْ، حَمِيرْ هَنَا قِيشْ أَبُوهْ شَاوُولْ وَدَّرَوْا. وَ قِيشْ قَالْ لِوِلَيْدَهْ شَاوُولْ: «شِيلْ وَاحِدْ مِنْ الْخَدَّامِينْ وَ أَمْشِي فَتِّشْ الْحَمِيرْ.» ٤ وَ خَلَاصْ، شَاوُولْ وَ الْخَدَّامْ مَشَوْا يِفَتُّشُوا الْحَمِيرْ فِي كُلَّ جِبَالْ أَفْرَايِمْ وَ فِي كُلَّ بَلَدْ شَلِيشَةْ وَ مَا لِقَوْهُمْ. وَ فَتَّشَوْهُمْ بَتَّانْ فِي كُلَّ بَلَدْ شَعَلِيمْ وَ بَلَدْ بَنْيَامِينْ وَ لَاكِنْ مَا لِقَوْهُمْ.

شَاوُول يفتِّش شوّافي

٥ وَ وَكِتْ وَصَّلَوْا فِي بَلَدْ صُوفْ، شَاوُولْ قَالْ لِخَدَّامَهْ الْمَعَايَهْ: «خَلِّي نِقَبُّلُوا! أَنَا نَخَافْ أَبُويِ هَسَّعْ مَا يِهِمّ لِلْحَمِيرْ لَاكِنْ يِهِمّ لَيْنَا أَنِحْنَ.» ٦ وَ الْخَدَّامْ قَالْ لَيَّهْ: «فِي الْحِلَّةْ دِي، فِيَّهْ نَبِي اللّٰهْ. وَ النَّادُمْ دَا هُو مَعْرُوفْ وَ كُلَّ شَيّءْ الْبُقُولَهْ يَجِي فِي بَكَانَهْ. خَلِّي نَمْشُوا لَيَّهْ. أَكُونْ يِوَصِّفْ لَيْنَا الدَّرِبْ الْوَاجِبْ نِشِيلُوهْ.»

٧ وَ خَلَاصْ، شَاوُولْ قَالْ لِخَدَّامَهْ: «يَلَّا نَمْشُوا! وَ لَاكِنْ نِوَدُّوا شُنُو لِلنَّبِي دَا؟ مَا عِنْدِنَا خُبْزَةْ فِي مُخْلَاتْنَا وَ مَا عِنْدِنَا هَدِيَّةْ النِّقَدُّمُوهَا لَيَّهْ. مَا عِنْدِنَا شَيّءْ!» ٨ وَ الْخَدَّامْ رَدَّ لِشَاوُولْ وَ قَالْ: «عِنْدِي فِي جَيْبِي رُبُعْ هَنَا حَجَرْ فُضَّةْ نَنْطِيهْ لِنَبِي اللّٰهْ. وَ هُو يِوَصِّفْ لَيْنَا الدَّرِبْ.»

٩ وَ فِي عَادَةْ بَنِي إِسْرَائِيلْ زَمَانْ، كَنْ يِدَوْرُوا يَمْشُوا يَسْأَلَوْا الرَّبّ، هُمَّنْ يُقُولُوا: «نَمْشُوا لِلشَّوَّافِي.» أَشَانْ فِي وَكِتْهُمْ دَاكْ، هُمَّنْ لِلنَّبِي يِنَادُوهْ شَوَّافِي.

١٠ وَ شَاوُولْ قَالْ لِخَدَّامَهْ: «كَلَامَكْ عَدِيلْ! تَعَالْ نَمْشُوا!» وَ خَلَاصْ، هُمَّنْ مَشَوْا فِي الْحِلَّةْ الْقَاعِدْ فَوْقهَا نَبِي اللّٰهْ. ١١ وَ وَكِتْ قَاعِدِينْ يَطْلَعَوْا لِيَدْخُلُوا فِي الْحِلَّةْ، لَاقَوْا بَنَاتْ مَارْقَاتْ مَاشَاتْ يِشِيلَنْ أَلْمِي. وَ هُمَّنْ سَأَلَوْهِنْ وَ قَالَوْا: «الشَّوَّافِي دَا هِنِي وَلَّا؟» ١٢ وَ الْبَنَاتْ رَدَّنْ لَيْهُمْ وَ قَالَنْ: «أَيْوَى! هُو قِدَّامْكُو! أَمْشُوا عَجَلَةْ تَلْقَوْه. هُو جَاءْ فِي الْحِلَّةْ الْيَوْم أَشَانْ الْيَوْم فِيَّهْ ضَحِيَّةْ لِلشَّعَبْ فِي الْبَكَانْ الْعَالِي هَنَا الْعِبَادَةْ. ١٣ أَمْشُوا عَجَلَةْ تَلْقَوْه قُبَّالْ مَا يَطْلَعْ فِي بَكَانْ الْعِبَادَةْ. أَشَانْ الشَّعَبْ مَا يَاكُلُوا قُبَّالْ هُو مَا يَوْصَلْ وَ يِبَارِكْ الضَّحِيَّةْ دِي. وَ بَعَدْ دَا، الْمَعْزُومِينْ يَاكُلُوهَا. هَسَّعْ دَا، أَمْشُوا تَلْقَوْه.»

اللّه رسّل شَاوُول لصَمُوِيل

١٤ هُمَّنْ طَلَعَوْا عَلَيْ الْحِلَّةْ. وَ وَكِتْ دَاخْلِينْ فِي لُبّ الْحِلَّةْ، شَافَوْا دَاهُو صَمُوِيلْ كُلَّ جَايِ مُلَاقِيهُمْ طَالِعْ عَلَيْ بَكَانْ الْعِبَادَةْ. ١٥ لَاكِنْ قُبَّالْ اللُّمَّةْ مَعَ شَاوُولْ بِيَوْم، اللّٰهْ خَبَّرَهْ لِصَمُوِيلْ وَ قَالْ لَيَّهْ: ١٦ «أَمْبَاكِرْ فِي نَفْس الْوَكِتْ، نِرَسِّلْ لَيْك نَادُمْ وَاحِدْ مِنْ بَلَدْ بَنْيَامِينْ. أَمْسَحَهْ وَ دَرِّجَهْ لِيَبْقَى كَبِيرْ لِشَعَبِي بَنِي إِسْرَائِيلْ وَ يِنَجِّيهُمْ مِنْ الْفِلِسْطِيِّينْ. أَشَانْ أَنَا شِفْت تَعَبْ شَعَبِي وَ صِرَاخْهُمْ وَصَّلَانِي.»

١٧ وَ وَكِتْ صَمُوِيلْ شَافْ شَاوُولْ، طَوَّالِي اللّٰهْ حَجَّى لَيَّهْ وَ قَالْ: «دَا الرَّاجِلْ الْكَلَّمْتَكْ بَيَّهْ وَ هُو بَسْ الْيَكْرُبْ شَعَبِي!» ١٨ وَ شَاوُولْ لَمَّ مَعَ صَمُوِيلْ فِي خَشُمْ بَابْ الْحِلَّةْ وَ سَأَلَهْ وَ قَالْ لَيَّهْ: «السَّلَامْ عَلَيْك! مِنْ فَضْلَكْ، وَصِّفْنِي بَيْت الشَّوَّافِي.» ١٩ وَ صَمُوِيلْ رَدَّ لَيَّهْ وَ قَالْ: «أَنَا بَسْ الشَّوَّافِي. أَطْلَعْ قِدَّامِي فِي بَكَانْ الْعِبَادَةْ. الْيَوْم، إِنْتُو تَاكُلُوا مَعَايِ. وَ أَمْبَاكِرْ فَجُرْ كَمَانْ، نِحَجِّيكْ بِكُلَّ شَيّءْ الْيِهِمَّكْ وَ نِعَدِّيكْ تَمْشِي. ٢٠ وَ كَنْ لِلْحَمِيرْ الْوَدَّرَوْا عِنْدُهُمْ تَلَاتَةْ يَوْم، مَا تِهِمّ لَيْهُمْ. هُمَّنْ أَنْلَقَوْا. وَ الْمُنَى هَنَا شَعَبْ بَنِي إِسْرَائِيلْ دَا، فِي يَاتُو؟ مَا فِيكْ إِنْتَ وَ عَايِلَةْ أَبُوكْ وَلَّا؟»

٢١ وَ شَاوُولْ رَدَّ وَ قَالْ: «أَنَا مَا مِنْ قَبِيلَةْ بَنْيَامِينْ وَلَّا؟ وَ أَنِحْنَ مِنْ الْقَبَايِلْ الدُّقَاقْ هَنَا بَنِي إِسْرَائِيلْ! وَ خَشُمْ بَيْتِي كُلَّ الصَّغَيَّرْ فِي خُشُومْ بُيُوتْ بَنْيَامِينْ. وَ مَالَا تِحَجِّي لَيِّ مِثِلْ دَا؟»

٢٢ وَ صَمُوِيلْ مَشَى مَعَ شَاوُولْ وَ خَدَّامَهْ وَ وَدَّاهُمْ فِي الْبَيْت الْبَاكُلُوا فَوْقَهْ. وَ خَطَّاهُمْ فِي الْبَكَانْ الْعِنْدَهْ شَرَفْ فِي أُسُطْ 30 مَعْزُومِينْ آخَرِينْ. ٢٣ وَ صَمُوِيلْ قَالْ لِلْخَدَّامْ الْقَاعِدْ يِسَوِّي الْأَكِلْ: «جِيبْ اللَّحَمْ الْأَنْطَيْتَكْ وَ قُلْت لَيْك أَحْفَضَهْ.»

٢٤ وَ الْخَدَّامْ جَابْ الْقَايْمَةْ وَ كُلَّ اللَّحَمْ الْفَوْقهَا وَ خَطَّاهَا قِدَّامْ شَاوُولْ. وَ صَمُوِيلْ قَالْ: «أَلْفَضَّلْ. دَاهُو الشَّيّءْ الضَّمَّيْنَا لَيْك فِي الْمُنَاسَبَةْ دِي وَكِتْ أَنَا عَزَمْت النَّاسْ. خُطَّهْ قِدَّامَكْ وَ آكُلْ.» وَ فِي الْيَوْم دَا، شَاوُولْ أَكَلْ مَعَ صَمُوِيلْ. ٢٥ وَ بَعَدْ دَا، نَزَلَوْا مِنْ بَكَانْ الْعِبَادَةْ وَ مَشَوْا الْحِلَّةْ. وَ صَمُوِيلْ حَجَّى مَعَ شَاوُولْ فِي رَاسْ بَيْتَهْ.

صَمُوِيل عدّاه لشَاوُول

٢٦ وَ هُمَّنْ بَكَّرَوْا. وَ وَكِتْ الشَّقَاقْ شَقَّ، صَمُوِيلْ نَادَاهْ لِشَاوُولْ الْقَاعِدْ فِي رَاسْ الْبَيْت وَ قَالْ لَيَّهْ: «نِعَدِّيكْ.» وَ خَلَاصْ، شَاوُولْ قَمَّ وَ صَمُوِيلْ مَشَى مَعَايَهْ لِيِعَدِّيهْ. ٢٧ وَ وَكِتْ قَرَّبَوْا يَمُرْقُوا مِنْ الْحِلَّةْ، صَمُوِيلْ قَالْ لِشَاوُولْ: «قُولْ لِخَدَّامَكْ خَلِّي يِقَدِّمْ.» وَ هُو قَدَّمْ. وَ صَمُوِيلْ قَالْ لِشَاوُولْ: «هَسَّعْ دَا، إِنْتَ أَقِيفْ! نِأَوْرِيكْ كَلَامْ الرَّبّ.»