قبيلة بَنْيَامِين يلْقوا عوين
٢١
١ وَكِتْ بَنِي إِسْرَائِيلْ لَمَّوْا فِي مِصْفَةْ،
هُمَّنْ حَلَفَوْا وَ قَالَوْا:
«خَلِّي أَيِّ نَادُمْ مِنِّنَا مَا يِجَوِّزْ بِنْتَهْ لِرَاجِلْ مِنْ قَبِيلَةْ بَنْيَامِينْ.»
٢ وَ بَعَدْ الْحَرِبْ دَا،
الشَّعَبْ جَوْا فِي بَيْت إِيلْ وَ قَعَدَوْا قِدَّامْ الرَّبّ لَحَدِّي الْعَشِيَّةْ.
وَ هُمَّنْ بَكَوْا زِيَادَةْ وَ دُمُوعْهُمْ كُلَ دَفَّقَوْا كَتِيرْ.
٣ وَ قَالَوْا:
«يَا اللّٰهْ إِلٰـهْ بَنِي إِسْرَائِيلْ،
مَالَا الْيَوْم وَاحِدَةْ مِنْ قَبَايِلْ بَنِي إِسْرَائِيلْ بِقَتْ مَا فِيهَا؟»
٤ وَ أَمْبَاكِرْ،
الشَّعَبْ بَكَّرَوْا وَ بَنَوْا مَدْبَحْ فِي الْبَكَانْ دَا وَ قَدَّمَوْا فَوْقَهْ ضَحَايَا مُحَرَّقِينْ وَ ضَحَايَا سَلَامَةْ.
٥ وَ بَنِي إِسْرَائِيلْ قَالَوْا:
«يَاتُو مِنْ كُلَّ قَبَايِلْ بَنِي إِسْرَائِيلْ مَا حِضِرْ فِي الْمَلَمَّةْ فِي مِصْفَةْ قِدَّامْ اللّٰهْ؟»
أَشَانْ فِي الْيَوْم دَا فِي مِصْفَةْ،
هُمَّنْ حَلَفَوْا لِيَكْتُلُوا أَيِّ نَادُمْ الْمَا حِضِرْ فِي الْمَلَمَّةْ قِدَّامْ اللّٰهْ.
٦ وَ هَسَّعْ بَنِي إِسْرَائِيلْ نِدْمَوْا فِي شَانْ أَخْوَانْهُمْ نَاسْ قَبِيلَةْ بَنْيَامِينْ.
وَ قَالَوْا:
«الْيَوْم قَبِيلَةْ وَاحِدَةْ أَنْفَصَلَتْ مِنْ إِسْرَائِيلْ.
٧ وَ كِكَّيْف نِسَوُّوا لِنِجَوُّزُوا عَوِينْ لِلْفَضَّلَوْا مِنْهُمْ أَشَانْ أَوَّلْ أَنِحْنَ حَلَفْنَا بِاللّٰهْ وَ قُلْنَا مَا نِجَوُّزُوهُمْ بَنَاتْنَا؟»
٨ وَ بَتَّانْ قَالَوْا:
«هَلْ فِيَّهْ نَاسْ مِنْ قَبَايِلْ إِسْرَائِيلْ الْمَا حِضْرَوْا قِدَّامْ اللّٰهْ فِي مِصْفَةْ وَلَّا؟»
وَ خَلَاصْ،
هُمَّنْ أَذَّكَّرَوْا كَدَرْ نَاسْ يَابِيشْ فِي تُرَابْ قِلْعَادْ مَا جَوْا فِي الْمُعَسْكَرْ لِلْمَلَمَّةْ الْيَوْم دَاكْ.
٩ أَشَانْ وَكِتْ الشَّعَبْ لَمَّوْا لِلْحَسَابَةْ،
نَادُمْ وَاحِدْ كُلَ مِنْ سُكَّانْ يَابِيشْ قِلْعَادْ مَا حِضِرْ.
١٠ وَ خَلَاصْ،
هُمَّنْ رَسَّلَوْا 12 000 رَاجِلْ مِنْ الْمُحَارِبِينْ وَ قَالَوْا لَيْهُمْ:
«أَمْشُوا وَ أَكْتُلُوا كُلَّ سُكَّانْ يَابِيشْ قِلْعَادْ بِالْسَّيْف حَتَّى عَوِينْهُمْ وَ عِيَالْهُمْ كُلَ أَكْتُلُوهُمْ.
١١ وَ دَاهُو الشَّيّءْ التِّسَوُّوهْ.
دَمُّرُوا كُلَّ الدَّكَرْ وَ أَيِّ مَرَةْ الدَّاخْلَةْ بَيْت.»
١٢ وَ مِنْ سُكَّانْ يَابِيشْ قِلْعَادْ،
لِقَوْا 400 بَنَاتْ عُدْرِيَّاتْ الْمَا دَخَلَنْ بَيْت وَ هُمَّنْ شَالَوْهِنْ وَ جَابَوْهِنْ فِي الْمُعَسْكَرْ فِي شِيلَوْه فِي تُرَابْ كَنْعَانْ.
١٣ وَ كُلَّ الْمُجْتَمَعْ رَسَّلَوْا نَاسْ لِقَبِيلَةْ بَنْيَامِينْ فِي حَجَرْ رِمُّونْ أَشَانْ يِسَوُّوا سَلَامْ.
١٤ وَ فِي الْوَكِتْ دَا،
الرُّجَالْ الْفَضَّلَوْا مِنْ قَبِيلَةْ بَنْيَامِينْ قَبَّلَوْا فِي بَكَانَاتْهُمْ.
وَ بَنِي إِسْرَائِيلْ أَنْطَوْهُمْ الْبَنَاتْ الْجَابَوْهِنْ حَيَّاتْ مِنْ يَابِيشْ قِلْعَادْ.
وَ لَاكِنْ عَدَدْ الْبَنَاتْ مَا تَمَّ وَ رُجَالْ وَاحِدِينْ مَا لِقَوْا عَوِينْ.
١٥ وَ الشَّعَبْ نِدْمَوْا فِي شَانْ نَاسْ قَبِيلَةْ بَنْيَامِينْ أَشَانْ اللّٰهْ خَلَّى فَرَقَةْ هَنَا قَبِيلَةْ وَاحِدَةْ مِنْ قَبَايِلْ إِسْرَائِيلْ.
١٦ وَ كُبَارَاتْ الْمُجْتَمَعْ قَالَوْا:
«عَوِينْ بَنْيَامِينْ كَمَّلَوْا.
نِسَوُّوا شُنُو أَشَانْ الرُّجَالْ الْفَضَّلَوْا كُلَ يَلْقَوْا عَوِينْ؟»
١٧ وَ قَالَوْا بَتَّانْ:
«خَلِّي قَبِيلَةْ بَنْيَامِينْ كُلَ تَلْقَى ذُرِّيَّةْ أَشَانْ قَبِيلَةْ وَاحِدَةْ مَا تِوَدِّرْ مِنْ بَنِي إِسْرَائِيلْ.
١٨ وَ أَنِحْنَ ذَاتْنَا مَا نَقْدَرَوْا نَنْطُوهُمْ بَنَاتْنَا لِيَاخُدُوهِنْ أَشَانْ أَنِحْنَ حَلَفْنَا وَ قُلْنَا:
‹مَلْعُونْ الْيَنْطِي مَرَةْ لِعِيَالْ بَنْيَامِينْ.›»
١٩ وَ بَعَدْ دَا،
قَالَوْا:
«كُلِّ سَنَةْ فِيَّهْ عِيدْ لِلّٰهْ فِي شِيلَوْه الْقَاعِدَةْ مُنْشَاقْ لِبَيْت إِيلْ وَ وَطِي لِلَبُونَةْ وَ صَبَاحْ لِلدَّرِبْ الْيَمْشِي مِنْ بَيْت إِيلْ لِشَكِيمْ.»
٢٠ وَ أَمَرَوْا عِيَالْ بَنْيَامِينْ وَ قَالَوْا لَيْهُمْ:
«أَمْشُوا أَلَّبَّدَوْا فِي جِنَيْنَاتْ الْعِنَبْ.
٢١ وَ كَنْ شِفْتُوا بَنَاتْ مِنْ شِيلَوْه مَرَقَنْ يَلْعَبَنْ سَوَا،
خَلَاصْ إِنْتُو أَمُرْقُوا فَوْقهِنْ مِنْ جِنَيْنَاتْ الْعِنَبْ.
وَ خَلِّي أَيِّ وَاحِدْ مِنْكُو يَكْرُبْ لَيَّهْ مَرَةْ مِنْ بَنَاتْ شِيلَوْه.
شِيلُوهِنْ وَ أَمْشُوا بَيْهِنْ فِي تُرَابْ بَنْيَامِينْ.
٢٢ وَ كَنْ أَبَّهَاتْهِنْ أَوْ أَخْوَانْهِنْ يَجُوا يَشْكُوا لَيْنَا،
نُقُولُوا لَيْهُمْ:
‹حِنُّوا فَوْقَهْ أَخْوَانَّا مِنْ بَنْيَامِينْ أَشَانْ أَنِحْنَ مَا لِقِينَا لَيْهُمْ كُلُّهُمْ عَوِينْ وَكِتْ حَارَبْنَا يَابِيشْ قِلْعَادْ.
وَ إِنْتُو كُلَ مَا أَنْطَيْتُوا لَيْهُمْ بَنَاتْكُو بِرَايْكُو وَ بَيْدَا،
حَلِيفِتْكُو مَا تَلْحَقْكُو.›»
٢٣ وَ دَا بَسْ الشَّيّءْ الْعِيَالْ بَنْيَامِينْ سَوَّوْه.
هُمَّنْ شَالَوْا مِنْ الْبَنَاتْ اللَّعَّابَاتْ حَسَبْ عَدَدْهُمْ.
وَ مَشَوْا بَيْهِنْ فِي أَرْض وَرَثَتْهُمْ وَ بَنَوْا حِلَّالْهُمْ بَتَّانْ وَ سَكَنَوْا فَوْقهُمْ.