قُضياء 18

قبيلة دَان هجمت لَيِش

١ وَ فِي الْوَكِتْ دَا، مَا فِي مَلِكْ فِي إِسْرَائِيلْ. وَ قَبِيلَةْ دَانْ قَاعِدَةْ تِفَتِّشْ تُرَابْ التَّسْكُنْ فَوْقَهْ أَشَانْ هِي لِسَّاعْ مَا لِقَتْ أَرْض وَرَثَةْ أَمْبَيْن قَبَايِلْ بَنِي إِسْرَائِيلْ. ٢ وَ مِنْ حِلَّالْهُمْ صَرْعَةْ وَ أَشْتَوُولْ، نَاسْ قَبِيلَةْ دَانْ رَسَّلَوْا رُجَالْ خَمْسَةْ فَحَلِينْ مِنْ قَبِيلِتْهُمْ أَشَانْ يَمْشُوا يُرُوغُوا وَ يِشِيفُوا الْبَلَدْ. وَ قَالَوْا لَيْهُمْ: «أَمْشُوا شِيفُوا الْبَلَدْ.» وَ الرُّجَالْ الْخَمْسَةْ وَصَّلَوْا فِي جِبَالْ أَفْرَايِمْ وَ لِقَوْا بَيْت مِيكَا وَ نَامَوْا فَوْقَهْ. ٣ وَ وَكِتْ قَاعِدِينْ جَنْب بَيْت مِيكَا، هُمَّنْ عِرْفَوْا اللَّهْجَةْ الْحَجَّى بَيْهَا الصَّبِي اللَّاوِي. وَ قَرَّبَوْا لَيَّهْ وَ سَأَلَوْه وَ قَالَوْا: «يَاتُو الْجَابَكْ هِنِي؟ قَاعِدْ تِسَوِّي شُنُو فِي الْبَكَانْ دَا؟ وَ شُنُو الْقَعَّدَاكْ هِنِي؟» ٤ وَ هُو رَدَّ لَيْهُمْ وَ قَالْ: «مِيكَا سَوَّى لَيِّ مِثِلْ دَا وَ هُو أَجَّرَانِي وَ أَنَا بِقِيتْ لَيَّهْ رَاجِلْ دِينْ.» ٥ وَ هُمَّنْ قَالَوْا لَيَّهْ: «أَسْأَلْ لَيْنَا الرَّبّ أَشَانْ نَعَرْفُوا كَنْ مَخَطَرْنَا دَا يَنْجَحْ وَلَّا لَا.» ٦ وَ رَاجِلْ الدِّينْ قَالْ لَيْهُمْ: «أَمْشُوا بِالسَّلَامْ فِي مَخَطَرْكُو. اللّٰهْ مَعَاكُو.»

٧ وَ الرُّجَالْ الْخَمْسَةْ مَشَوْا قِدَّامْ وَ وَصَّلَوْا حِلَّةْ لَيِشْ. وَ شَافَوْا كَدَرْ سُكَّانْهَا هَادِيِينْ وَ عَايْشِينْ فِي رَاحَةْ وَ أَمَانْ حَسَبْ عَادَةْ الصَّيْدُونِيِّينْ. وَ فِي الْبَلَدْ دِي، مَا فِي نَادُمْ يِبَرْجِلْهُمْ وَلَّا يَظْلُمْهُمْ. وَ سُكَّانْ لَيِشْ بَعِيدِينْ مِنْ الصَّيْدُونِيِّينْ وَ مَا عِنْدُهُمْ نَاسْ الْيَحْفَضَوْهُمْ.

٨ وَكِتْ الرُّجَالْ الْخَمْسَةْ قَبَّلَوْا لِأَخْوَانْهُمْ فِي صَرْعَةْ وَ أَشْتَوُولْ، أَخْوَانْهُمْ قَالَوْا لَيْهُمْ: «شُنُو الْخَبَرْ؟» ٩ وَ هُمَّنْ رَدَّوْا لَيْهُمْ وَ قَالَوْا: «يَلَّا! نُقُمُّوا ضِدُّهُمْ أَشَانْ أَنِحْنَ شِفْنَا الْبَلَدْ وَ هِي سَمْحَةْ مَرَّةْ وَاحِدْ. مَا تَقْعُدُوا سَاكِتْ! يَلَّا! قُمُّوا أَمْشُوا لِلْبَلَدْ دِي لِتِشِيلُوهَا. ١٠ وَ وَكِتْ تِوَصُّلُوا فِي الْبَلَدْ دِي، تَلْقَوْا شَعَبْ قَاعِدِينْ بِأَمَانْ وَ كُلَّ الْبَلَدْ وَسِيعَةْ قِدَّامْكُو أَشَانْ الرَّبّ سَلَّمَاهَا لَيْكُو فِي إِيدَيْكُو. وَ شَيّءْ مُقَصِّرْ فِي الْبَلَدْ دِي كَيْ مَا فِيهْ.»

١١ وَ خَلَاصْ مِنْ قَبِيلَةْ دَانْ، 600 رُجَالْ مُسَلَّحِينْ قَمَّوْا مِنْ صَرْعَةْ وَ أَشْتَوُولْ وَ مَشَوْا. ١٢ وَ هُمَّنْ مَشَوْا نَزَلَوْا فِي قَرْيَةْ يَعَرِيمْ فِي تُرَابْ يَهُوذَا. أَشَانْ دَا، لَحَدِّي الْيَوْم يِنَادُوا الْبَكَانْ دَا مَحَنَةْ دَانْ (مَعَنَاتَهْ فَرِيقْ دَانْ). وَ الْبَكَانْ دَا قَاعِدْ غَرِبْ لِقَرْيَةْ يَعَرِيمْ. ١٣ وَ مِنْ الْبَكَانْ دَا، مَشَوْا لِجِبَالْ أَفْرَايِمْ وَ لِقَوْا بَيْت مِيكَا.

١٤ وَ الرُّجَالْ الْخَمْسَةْ الْمَشَوْا رَاغَوْا حِلَّةْ لَيِشْ قَالَوْا لِأَخْوَانْهُمْ: «هَلْ تَعَرْفُوا كَدَرْ فِي الْبُيُوتْ دَوْل فِي فَرْمَلَةْ هَنَا رَاجِلْ الدِّينْ وَ تَمَاثِيلْ وَ صَنَمْ وَ تِمْثَالْ هَنَا حَدِيدْ وَلَّا؟ وَ هَسَّعْ دَا، فَكُّرُوا فِي الشَّيّءْ الْوَاجِبْ تِسَوُّوهْ.» ١٥ وَ جَوْا دَخَلَوْا فِي بَيْت الصَّبِي اللَّاوِي الْقَاعِدْ مَعَ مِيكَا وَ سَلَّمَوْه. ١٦ وَ فِي الْوَكِتْ دَا، السُّتُّمِيَةْ رُجَالْ مُسَلَّحِينْ الْمِنْ نَاسْ قَبِيلَةْ دَانْ وَاقْفِينْ فِي خَشُمْ الْبَابْ. ١٧ وَ الرُّجَالْ الْخَمْسَةْ الْمَشَوْا رَاغَوْا الْبَلَدْ دَخَلَوْا وَ شَالَوْا الصَّنَمْ وَ الْفَرْمَلَةْ وَ التَّمَاثِيلْ وَ تِمْثَالْ هَنَا الْحَدِيدْ. وَ فِي الْوَكِتْ دَا، رَاجِلْ الدِّينْ وَ السُّتُّمِيَةْ رُجَالْ مُسَلَّحِينْ وَاقْفِينْ فِي خَشُمْ الْبَابْ. ١٨ وَ وَكِتْ الرُّجَالْ دَوْل دَخَلَوْا فِي بَيْت مِيكَا وَ شَالَوْا الصَّنَمْ وَ الْفَرْمَلَةْ وَ التَّمَاثِيلْ وَ التِّمْثَالْ هَنَا الْحَدِيدْ، رَاجِلْ الدِّينْ قَالْ لَيْهُمْ: «تِسَوُّوهْ شُنُو؟» ١٩ وَ هُمَّنْ قَالَوْا لَيَّهْ: «أَسْكُتْ وَ خُطّ إِيدَكْ فِي خَشْمَكْ! تَعَالْ مَعَانَا وَ أَبْقَى لَيْنَا أَبُو وَ رَاجِلْ دِينْ. دَا أَخَيْر لَيْك تَبْقَى رَاجِلْ دِينْ لِعَايِلَةْ هَنَا رَاجِلْ وَاحِدْ بَسْ أَوْ لِقَبِيلَةْ تَمَامَةْ فِي إِسْرَائِيلْ؟» ٢٠ وَ خَلَاصْ، رَاجِلْ الدِّينْ قَلْبَهْ فِرِحْ وَ شَالْ الْفَرْمَلَةْ وَ التَّمَاثِيلْ وَ الصَّنَمْ وَ مَشَى مَعَ الرُّجَالْ الْمُسَلَّحِينْ.

٢١ وَ خَلَاصْ، قَمَّوْا مَاشِينْ وَ خَطَّوْا قِدَّامْهُمْ الْعِيَالْ وَ الْبَهَايِمْ وَ الْخُمَامْ. ٢٢ وَ وَكِتْ بَعَّدَوْا مِنْ بَيْت مِيكَا، الرُّجَالْ السَّاكْنِينْ جَنْب بَيْت مِيكَا لَمَّوْا وَ قَمَّوْا ضِدّ نَاسْ قَبِيلَةْ دَانْ وَ مَشَوْا وَرَاهُمْ. ٢٣ وَ الرُّجَالْ دَوْل قَاعِدِينْ يِعِيطُوا فَوْق نَاسْ قَبِيلَةْ دَانْ. وَ نَاسْ قَبِيلَةْ دَانْ قَبَّلَوْا لِمِيكَا وَ قَالَوْا لَيَّهْ: «مَالَا قَوَّمْت الرُّجَالْ دَوْل ضِدِّنَا؟» ٢٤ وَ مِيكَا قَالْ: «الْإِلٰـهَاتْ الْأَنَا سَوَّيْتهُمْ، إِنْتُو شِلْتُوهُمْ! وَ رَاجِلْ الدِّينْ كُلَ شِلْتُوهْ وَ مَشَيْتُوا بَيَّهْ. بَتَّانْ فَضَّلْ لَيِّ شُنُو؟ وَ كِكَّيْف تُقُولُوا لَيِّ: ‹إِنْتَ مَالَكْ؟›» ٢٥ وَ نَاسْ قَبِيلَةْ دَانْ رَدَّوْا لَيَّهْ وَ قَالَوْا: «مَا تِعَيِّينَا بِكَلَامَكْ. وَ كَنْ أَبَيْت كَمَانْ، رُجَالْ قَلِبْهُمْ مُرّ يَهْجُمُوكْ وَ إِنْتَ تِجِيبْ الْمَوْت فِي نَفْسَكْ وَ فِي عَايِلْتَكْ!» ٢٦ وَ خَلَاصْ، نَاسْ قَبِيلَةْ دَانْ شَالَوْا دَرِبْهُمْ وَ مَشَوْا. وَ وَكِتْ مِيكَا شَافْ هُمَّنْ عِنْدُهُمْ قُدْرَةْ زِيَادَةْ مِنَّهْ، هُو قَبَّلْ بَيْتَهْ.

قبيلة دَان سكنوا في لَيِش

٢٧ وَ نَاسْ قَبِيلَةْ دَانْ شَالَوْا الْخُمَامْ الْمِيكَا صَنَعَاهُمْ وَ رَاجِلْ الدِّينْ الْخَدَمْ لَيَّهْ وَ مَشَوْا فِي لَيِشْ. وَ سُكَّانْهَا الْقَاعِدِينْ فِي رَاحَةْ وَ أَمَانْ، كَتَلَوْهُمْ بِالْسَّيْف وَ حَرَّقَوْا الْمَدِينَةْ. ٢٨ وَ مَا فِي نَادُمْ الْيِنَجِّيهُمْ أَشَانْ الْحِلَّةْ بَعِيدَةْ مِنْ صَيْدَا وَ مَا عِنْدُهُمْ عَلَاقَةْ مَعَ نَاسْ آخَرِينْ كُلَ. هِي قَاعِدَةْ فِي الْوَادِي هَنَا بَيْت رَحُوبْ. وَ نَاسْ قَبِيلَةْ دَانْ بَنَوْا الْحِلَّةْ دِي بَتَّانْ وَ قَعَدَوْا فَوْقهَا. ٢٩ وَ سَمَّوْا الْحِلَّةْ بِأُسُمْ جِدُّهُمْ دَانْ وِلَيْد يَعْقُوبْ وَ لَاكِنْ الْحِلَّةْ دِي زَمَانْ بِنَادُوهَا لَيِشْ. ٣٠ وَ نَاسْ قَبِيلَةْ دَانْ خَطَّوْا لَيْهُمْ صَنَمْ مِيكَا. وَ يُونَتَانْ وِلَيْد قِرْشُومْ وِلَيْد مُوسَى وَ عِيَالَهْ بِقَوْا رُجَالْ دِينْ لِنَاسْ قَبِيلَةْ دَانْ لَحَدِّي شَالَوْهُمْ وَ وَدَّوْهُمْ فِي الْغُرْبَةْ. ٣١ وَ الصَّنَمْ الصَّنَعَهْ مِيكَا قَاعِدْ فِي بَكَانَهْ فِي كُلَّ الْمُدَّةْ الْقَاعِدْ فَوْقهَا بَيْت اللّٰهْ فِي شِيلَوْه.