الكتاب المُقدّس
مقدمة
بأُسُم اللّه الرحْمـٰن الرحيم (خُروج فصُل 34 آية 6).
لا إلٰـه إلّا اللّه (2 صَمُوِيل فصُل 22 آية 32) و ليه هو الحمْد و الشُكُر و مِنّه هو نلْقوا النِعْمة و الرحْمة.
الكتاب الفي إيدَيْنك دا،
هو الكتاب المُقدّس و دا كلام اللّه.
و الكلام دا،
و لا غيّروه و لا بدّلوه و لا نقصوه و لا زادوه.
هو نفْس الكلام المكتوب في الكتاب الاللّه نزّله لينا.
و دا بواسِطة الروح القُدّوس النزّله في الأنبياء و الرُسُل أشان يكْتُبوا كلامه بإذْنه و بقُدُرْته.
و الكتاب الفي إيدَيْنك دا مُترْجم بكلام عرب دارِجي هنا تشاد أشان الناس يقْروه و يفْهموه.
و الكتاب دا ترْجموه من اللُغّات الأصْليّين بفِكِر عديل و بنِظام أشان الكلام الفي لُبّه يبْقى أمين و صادِق و موافِق للأصْلي.
و الكتاب المُقدّس دا مُكوّن من كُتُب إتْنَيْن كبار.
و الكتاب الأوّل،
هو الْعهد الْقديم و مُكوّن من تَوْراة مُوسَى و زَبُور دَاوُد و كُتُب الأنبياء و بالجُمْلة،
عِنْده 39 كتاب.
و الْعهد الْقديم دا يحجّي بتاريخ بني إسرائيل و المُعاهدة الاللّه سوّاها معاهم.
و الكتاب التاني،
هو الْعهد الْجديد و هو إنجيل المسيح.
و بالجُمْلة،
الْعهد الْجديد عِنْده 27 كتاب و يحجّي بعِيسَى المسيح (سلامه علينا) و تلاميذه و رُسُله.
أيِّ كتاب من كُتُب الكتاب المُقدّس عِنْده مقدمة في بِدايْته و دا يعلِّمك كل شيّء الفي الكتاب دا.
و في آخِر الكتاب المُقدّس،
تلْقى المُتمِّم العِنْده جدْول تاريخ بني إسرائيل و تفْسير الكلِمات القاسيين و الخرايِط.
و فهرس كل الكُتُب هنا الكتاب المُقدّس،
تلْقاه في آخِر الكتاب.
و إنْت التقْري الكتاب دا،
خلّي اللّه ينْطيك مِنّه فايْدة التنْفعك في إيمانك و حياتك.
و الكتاب دا،
أقْريه بنيّة واحِدة و بيه،
اللّه يقودك في طريق النجاح و النجاة و السلام.
آمين.