एहूना कर लिखल दूसरा चिठी
खास चेला एहूना कर लिखल दूसरा चिठी
जोहार
1
1 मंए एहुना कलीसीया कर अगुवा लागों, मंए ए चिटठी ला परमेसवर कर चूनल सवांगीन अऊ ओकर लईका मन बर लिखत हवों। ओमन ला मंए सचा मया करथों, सिरिप मंहीच नहीं, बलकी ओ सबेच झन मया करथें, जेमन सत ला जानथें। 2 हमरे तुमन ला मया करथी, काबरकि सत हर हमर में रहथे, अऊ हमर संगे जुग-जुग ले बनल रही।3 दाऊ परमेसवर, कती ले अनुगरह, दया अऊ सांती हमर संगे बनल रही, अऊ ओकर बेटा ईसूयो मसीह कती ले सत अऊ मया हमर संगे बने रही।
सत अऊ मया में चलिहा
4 मंए ए जाएन के ढेरेच आनंद मनावत हों, कि जेकस दाऊ परमेसवर हर हमके अगियां देहिस हवे, ओकर अनुसार तोर तनिक लईका मन सत कर अनुसार चलत हवें। 5 ए मयारू सवांगीन, मंए तोके कोनो नांवा अगियां नई लिखत हों, बकिन ओहीच अगियां ला लिखत हों, जेहर हमके सुरु में मिले रहीस। मंए तोर जग बिनती करत हों, कि हमरे एक दूसर ले मया करी। 6 मया कर मतलब ए हवे कि, हमरे परमेसवर कर अगियां कर अनुसार चली। एही अगियां ला तंए सुरु में सुने रहे। एकरे अनुसार तुमन के मया कर संगे जिनगी जीए बर चाही। 7 काबरकि ढेरे झन धोखा देवईया मन ए संसार में आईन हवें। ओमन एला नई मानें कि ईसू मसीह मईनसे कर देंह धएर के आईस। अईसना मईनसे मन दुसर झेमन ला धोखा देथें, अऊ मसीह कर बिरोध करथें। 8 अपन बारे में सवाचेती रहा, हमरे जेकर बरिक मेहनत करे हन, ओला तूमन झईन गंवईहा, बलकी तूमन के ओकर पूरा फल मिले। 9 जे कोनो हर मसीह कर उपदेस ले भटेक जाथे, अऊ ओ में बने नई रहे, त ओकर जग परमेसवर नईए। अऊ जे कोनो हर ओकर उपदेस में बने रहथे, ओकर जग दाऊ परमेसवर अऊ ओकर बेटा दुनो हवे। 10 कहों कोनो हर तुमन जग आथे अऊ ए सिकछा नई दे, त ओके अपन घरे आए झईन देईहा, अऊ ओकर सुवागत झईन करीहा। 11 काबरकि जे कोनो हर अईसना मईनसे कर सुवागत करथे, ओहर ओकर बुरा काम मन में सझीयारा होथे।
आखरी जोहार