बिहाओ भोज कर अहना
22
1 ईसू हर फेर अहना में कहे लागीस। 2 सरग कर राएज हर एगोट राजा कस हवे, जेहर अपन बेटा कर बिहाव में नेवता करीस। 3 ओहर अपन हरवाह मन ला भेजीस, कि ओमन नेवताहारी मन ला बिहाव भोज बर बलाए के लाने, बकिन नेवताहारी मन आए बर नई चाहींन।4 तब ओहर तनीक अऊ हरवाह मन ला ए कहि के भेजीस, ‘नेवताहारी मन ला कहा कि भोज तियार होए गईसे, मोर बईला अऊ मोट-मोट पसू मन ला पूजे हवन अऊ सबेच चीज हर तियार होए गईसे, बिहाव कर भोज में आवा।’
5 बकिन नेवताहारी मन ओकर नेवता में धियान नई देहीन, अऊ ईते-ऊते चएल देहीन, कोनो हर अपन खेत में अऊ कोनो हर अपन काम बूता में। 6 बकिन बांचल नेवताहारी मन राजा कर हरवाह मन ला धरीन अऊ ओमन कर संगे मार-पीट करीन अऊ ओमन के मरुवाए दारीन। 7 तब राजा हर ढेरेच गुसाए गईस, अऊ ओहर अपन सेना ला भेजीस अऊ ओ जनमरवा मन ला नास कएर देहीस, अऊ ओमन कर सहर ला लेस देहीस।
8 तब राजा हर अपन हरवाह मन ला कहीस, “बिहाव कर भोज तो तियार हवे, बकिन नेवताहारी मन एकर लाईक नईएं। 9 एकर ले डगर कर चऊंक में जा अऊ तुमन ला जे मईनसे मन मिलहीं, ओ सबेच झे ला भोज कर नेवता देआ’ 10 त ओ हरवाह मन डगर में गईन अऊ ओमन ला बढ़ियां चाहे खराब जेमन मिलीन, ओ सबेच झन ला बलाए के ले लानीन, अऊ बिहाव कर मड़वा हर पहुना मन कर मारे भएर गईस।
11 बकिन जब राजा हर पहुना मन ला देखे बर भीतरी आईस, त ओहर उहां एक झन मईनसे ला देखीस जेहर देहल बिहाव कर ओढ़ना ला नई पहिरे रहीस। 12 त राजा हर ओके ला पूछीस, ‘ए संगी, बिहाओ कर ओढ़ना पहिरे बिगर तंए इहां कईसे आए गए।’ ओ मईनसे हर काहीं कहे बर नई सकीस। 13 तब राजा हर हरवाह मन ला कहीस, “एकर गोड़ हांथ ला बाएंध के एला बाहरी अंधार में फेंक देआ, जिहां मईनसे मन रोंथे अऊ अपन दांत चाबथें। 14 एकरबर बलाल मन तो ढेरेच हवें, बकिन चुनल मन ढेरेच थोरहें हवें।
लगान देवई कर बारे सवाल
15 तब फरीसी मन जाए के बिचार करीन कि ओमन कईसे ईसू के ओकरेच गोएठ में फंसाई। 16 ओमन अपन चेला मन ला हेरोदी मन कर संगे ईसू जग ए पूछे बर भेजीन, “ए गुरु, हमरे जानथी कि तंए सचा हवस अऊ तंए सचाई कर संगे परमेसवर कर डगर कर बारे में सिखाथस। तंए ककरो परवाह नई करस, काबरकि तंए ककरोच मूंह देखी नई करस। 17 त हमके ला बता कि, तोर का बिचार हवे? “रोमी महराजा केसर ला लगान देथी, ओहर ठीक हवे कि नही?” 18 बकिन ओमन कर घिनक सोंच ला जाएन के ईसू हर कहीस, “ए ढोंगी मईनसे मन! तुमन काबर मोके ला फंसाए बर करत हवा? 19 मोके ओ सीका ला देखावा, जेला तुमन लगान पटाए बर करत हा। ओमन ओकर जग एक ठे सीका ला लानीन। 20 तेकर ईसू हर ओमन ला पूछीस, “एमें काकर फोटो अऊ नांव हवे? 21 ओमन कहीन “रोमी राजा कर।” तब ईसू हर ओमन ला कहीस, “जेहर रोमी राजा कर हवे ओला राजा ला देआ, अऊ जेहर परमेसवर कर हवे ओला परमेसवर के देआ।” 22 एला सुईन के ओमन अचमहों में पईर गईन, अऊ ईसू ला छोंएड़ के चएल देहीन।
जी ऊठे कर बारे में सवाल
23 ओहीच दिन तनीक सदूकी मन ईसू जग आईन, जेमन ए कथें कि मरे कर पाछू मईनसे मन फेर जी के नई उठें। ओमन ईसू जग एगोट सवाल पूछीन, 24 “ए गुरू, मूसा हर कहीसे, कि अगर कोनो मईनसे हर बिगर लईका कर मएर जाथे, त ओकर भाई हर ओ अंदावेन ठे बिहाओ कएर ले, अऊ अपन मरल भाई बरीक लईका जनमाए। 25 मान लेआ कि सात ठे भाई रहीन, पहिलो हर बिहाओ करीस, बकिन ओहर बिगर लईका करे मएर गईस, अऊ अपन परानी ला अपन भाई बर छोंएड़ देहीस। 26 दूसर अऊ तीसर भाई ला लेके सबेच भाई कर संगे अईसनेच होईस, अऊ सातो कर सातो भाई मन मएर गईन। 27 आखरी में ओ सवांगिनोच हर मएर गईस। 28 एकर ले मरल में ले जी उठे कर पाछू, ओहर सातो भाई में ले काकर परानी होही? काबरकि ओ सातो झेमन ओकर ठे बिहाओ करे रहीन। 29 त ईसू हर ओमन ला जबाब देहीस, “तुमन भुलाए गये हवा, काबरकि परमेसवर कर किताब, अऊ परमेसवर कर सकती ला नई जाना? 30 काबरकि जेमन मरल में ले जी उठहीं, ओमन कर सादी बिहाव नई होही, बकिन ओमन सरग में सरग दूत मन कस होहीं। 31 मरल में ले जी उठे कर बारे में परमेसवर हर तुमन ला का कहीस हवे, “का तुमन एला नई पढ़े हवा? 32 कि मंए अबराहम कर परमेसवर, इसहाक कर परमेसवर अऊ याकूब कर परमेसवर लागों। ओहर मरल मन कर नहीं बकिन जीयत मन कर परमेसवर लागे। 33 एला सुईन के भीड़ कर मईनसे मन ईसू कर उपदेस ले ढेरेच अचमहों होईन।
सबले बड़खा अगींया
34 जब फरीसी मन सुनीन कि ईसू हर सदूकी मन ला चुप कराये देहीस हवे, त ओमन एक जघा जूटीन। 35 ओमन में ले एक झन जेहर वकील रहीस, ओहर ईसू ला परखे बर एगोट सवाल पूछीस, 36 “ए गुरू, मुसा कर कानहूंन कर अनुसार सबले बड़खा अगींया कोन हर हवे?” 37 ईसू हर ओके कहीस, “तंए अपन परभू परमेसवर ला अपन सबेच हिरदे, अऊ अपन सबेच परान ले, अऊ अपन पूरा मन ले मया कर। 38 एही हर पहिलो अऊ सबले बड़खा अगींया लागे। 39 अऊ दूसर अगींया एहर लागे कि अपन परोसी ला अपनेच कस मया कर। 40 एही दुई अगींया हर सबेच कानहूंन अऊ अगमजानी मन कर आधार हवे।
मसीह काकर बेटा लागे
41 जब फरीसी मन उहां जूटे रहीन, त ईसू हर ओमन ला पूछीस, 42 “मसीह कर बारे में तुमन का सोंचथा? ओहर काकर बेटा लागे?” त ओमन कहीन, “दाऊद कर बेटा।” 43 ईसू हर ओमन ला कहीस “त फेर दाऊद हर पबितर आतमा में होए के ओके 'परभू' काबर कहथे 44 कि परभू हर मोर परभू जग कहीस, “मोर जवनी हांथ कती बईठ, जब तक कि मंए तोर बईरी मन ला तोर गोड़ कर खालहे नई कएर देवों। 45 जब दाऊद हर ओके परभू कहथे, त फेर ओहर दाऊद कर बेटा कईसे होए सकथे? 46 कोनो हर ओके काहीं जबाब देहे नई सकीन, अऊ ओ दिन ले कोनो ओकर जग काहीं पूछे कर हिमेत नई करीन।