Kakpiʔiligele 20

Pɔli wi 'kɛ́ Maseduwani tɛ́nimɛ nī

1 Bà kàgbaaligɛ ki kɛ́nì tóri gè, a wi 'tunduro tórigo mɛ́ bèle a pe 'pɛn. A wi pɛ́nì juu nɛ́ pe ní nɛ̀ pe nàzɔnnɔ lìri bèle, á pe 'sàri pìye nɛ̄, a Pɔli wi 'yiri nɛ̀ Maseduwani koligo líɛ. 2 A wi 'tánʔa nɛ̀ tóri ki tɛ́nimɛ tiɛrɛ nī dè, nɛ̀ juu nìʔɛgɛ nɛ̀ tɛ́ngɛfɔlilɔ pe nàzɔnnɔ lìri bèle, nɛ́ kúɔ nɛ́ kɛ́ Girɛki kùlo nī.

3 A wi sɛ́nì yeye taanri kúɔ kire tiʔɛ nī gè. Zuufulo pe cé nyuɔ le wi nɛ̄, bà sí wi yé kɛ́nì je yiri baa Siirii kùlo nī lè, a wi 'ki yɛ̀gɛ bè koli bè tóri Maseduwani tɛ́nimɛ nī. 4 Bìli pe cé pínɛ nɛ́ wi ní bèle: Sopatɛri, Piirusi jaa wè Bere kàʔa wuu wè, nɛ́ Arisitariki nɛ́ Sekundɔsi, Tesaloniki kàʔa wuulo bèle, nɛ́ Gayusi, Dɛribi kàʔa wuu wè, nɛ́ Timote, nɛ̀ fàri Tisiiki nɛ̄, wire nɛ́ Turofiimi, Azii tɛ́nimɛ wuu wè. 5 A peli 'kíni weli yiʔɛ nɛ̄, nɛ̀ sɛ́nì weli sige Turowasi kàʔa mɛ́ gè. 6 Weli bèle, bà cɛnyɛ yi kɛ́nì tóri yè, a weli 'yiri Filipi kàʔa nī gè nɛ̀ jíin káà nī nɛ̀ kɛ́ pe kúrugu. Cɛnyɛ kogunɔ larigɛ nī gè a we sɛ́nì jíin Turowasi kàʔa nī gè, a we 'cégboli kúɔ baa.

Nàgapunwɔ wáà 'kùu a Pɔli wi 'wi nyɛ́

7 Cégboli ni cɛnbelige nɛ̄ gè, bà we 'cé wìye pínɛ bè lìi lè, a wi 'siɛnrɛ cáan dè nɛ́ siɛnnɛ ní bèle. Ki 'nyaa wi yé je yɛ̀ kɛ́ ki kpìɛnduu gè, a wi 'juu nɛ̀ mɔgɔ nɛ̀ pɛ́nì nɔ̀ nyìjaliɛlɛ nɛ̄. 8 Saʔa gíì nī weli 'puu nɛ wìye pínɛ baa naamɛ gè, fètingele 'puu baa nìʔɛgɛlɛ. 9 Nàgapunwɔ wáà 'puu tɛ́niwɛ saataʔaligɛ taanriwuʔu kàlii nɛ̄ wè, pe 'puu nɛ wi ye Etiyusi. A ŋɔ́nimɔ kɛ́nì wi suɔ a wi 'ŋɔ́ni nɛ̀ pe, nɛ̀ Pɔli yaʔa wè wi nyu nɛ tíin. Bɛ̀ sí nàgapunwɔ ŋáà wi cé ŋɔ́ni mmɛ gè, nɛ̀ kɛ́nì láʔa baa saataʔaligɛ naamɛ gè nɛ̀ tuu. Bà pe sɛ́nì wi líɛ wè nɛ̀ wi nyaa kùuwo. 10 A Pɔli wi 'tìgi nɛ̀ gbɔbi nɛ̀ tɔ́n wi nɛ̄, nɛ́ kɛ́nì wi líɛ nɛ̀ cò, nɛ́ siɛnnɛ yɛ bèle: «Ye fǎga yeli funyɔ yaʔa yè yi- curugoʔ, nàgapunwɔ wiī náʔa sìi nɛ̄.»

11 Nɛ́ koli nɛ̀ tánʔa baa saʔa nī gè nɛ̀ sɛ́nì lìi. Kire kàduʔumɛ gè a wi 'koli nɛ̀ juu fúɔ nɛ̀ pɛ́nì kpìɛnmɛ tuu, nɛ́ yiri nɛ̀ kɛ́. 12 A pe 'nàgapunwɔ kɔ́ri wè nɛ̀ kɛ́ wi ní wiiwe wè, a ki tɔ̀ni nɛ̀ funyɔ tɛ́ngɛ yè pe nī kpuʔɔ.

Pɔli wi 'kɛ́ Milɛti kàʔa mɛ́

13 Weli bèle, weli cé kíni wi yiʔɛ nɛ̄ nɛ̀ sɛ́nì jíin kɔ́rikpuʔɔ nī gè, nɛ̀ kɛ́ Asɔsi kàʔa gògogo mɛ́ gè; kire tiʔɛ nī weli yé je sa kɔ́ri wè. Ki 'nyaa Pɔli wi cé ki yɛ̀gɛ bè tánʔa kɛ́ tɔliyɔ nɛ̄. 14 Bà wi sɛ́nì yiri baa weli kúrugu Asɔsi kàʔa mɛ́ gè, a weli 'wi líɛ a we 'kɛ́ Mitilɛni kàʔa mɛ́. 15 Ki kpìɛnduu gè, a weli 'yiri baa kire tiʔɛ nī gè nɛ̀ kɛ́ nɛ̀ sɛ́nì yéri nɛ̀ yiʔɛ wáa Kiyɔsi kàʔa mɛ́ luʔɔ nyuɔ nɛ̄ gè. Ki kpìɛnduu gè, a we 'luʔɔ jeli gè nɛ̀ kɛ́ Samɔsi tiʔɛ mɛ́. Bà we 'yiri kire tiʔɛ nī gè, cɛndaanriwuʔu nɛ̄ gè, a we 'kɛ́ nɛ̀ sɛ́nì nɔ̀ Milɛti kàʔa nɛ̄. 16 Ki 'nyaa Pɔli wi cé ki yɛ̀gɛ bè taʔa tóri Efɛzi kàʔa nɛ̄ gè, wire fǎga yéri bè lɛ̀lɛ tóri lè wìi nɛ̄ baa Azii tɛ́nimɛ nī bèʔ. Ki 'nyaa, wi 'puu nɛ ki cìrá bè sa jíin kàʔa nī gè bè fundaanra cɛngɛ cìra gè taa.

Pɔli wi 'juu nɛ́ Efɛzi tɛ́ngɛfɔlilɔ gboli ni yiɛgininɛ ní bèle

17 A wi 'kò baa Milɛti kàʔa mɛ́ gè nɛ́ tunduro tórigo Efɛzi kàʔa mɛ́ gè, pe sa yeri bèle de báan. 18 Bà pe pɛ́nì yiri bèle, a Pɔli wi 'pe yɛ: «Bà mi 'pɛn náʔa Azii tɛ́nimɛ nī bè, nɛ̀ ki 'líɛ cɛnbelige nɛ̄ gè, yeli nyɛ́nì mi tánʔagɛnmɛ nyaa bè yeli kɔli mɛ́ gè lɛ̀gɛlɛ ke mìɛni nī gèle. 19 Mi 'puu nɛ wi baara kúu dè níɛ nìɛ cɛ́rigi kɛnmɛ pi mìɛni nɛ̄, nɛ́ kɔnwaʔa ní, nɛ́ wuʔɔyɔ ní yè Zuufulo pe kiyɛ nī yè bɛ̀ pe cé nyuɔ le mi nɛ̄ wè.

20 «Yeli tíimɛ 'ki cɛ́n mi sì kaala láà làrigɛ yeli nɛ̄ʔ, nàa ni bé gbɛ̀ yeli woli nyuɔ lèʔ. Mi 'yeli tɛnmɛ gbuʔulo tiɛyɛ nī yè, nɛ̀ ń'nɛ̀ yeli tɛnmɛ yeli kpáaya mɛ́ yè. 21 Mi 'puu nɛ ki nyu nɛ yigi Zuufulo mɛ́ bèle nɛ́ Girɛkilɛ ní bèle, nɛ́ pe yɛ pe- pe funyɔ yiʔɛ yè pe taʔa Kulocɛliɛ nɛ̄ wè, pé tɛ́ngɛ Kàfɔli Zezi nɛ̄ wè.

22 «Bɛ̀ ki sí yē ŋɔ̀ wè, Kulocɛliɛ Pìle ni 'mi cɔ̀ri nɛ́ jo mi- kɛ́ kàʔa mɛ́; miì sí ki cɛ́n gàa ki mi siri baa gèʔ. 23 Gìi sí ki 'cɛ́n gè, ni 'ki tìɛ mi nɛ̄ nɛ̀ láʔa dí kàʔa ó kàʔa nī, kasuu nɛ̀gɛjɔliyɔ nɛ́ wuʔɔgɔ ki nyɛ́ni mi siri baa. 24 Kire nɛ́ ki mìɛni ní gè, mi wè nɛ mi sìi wire tɔ́ri yakaaʔ. Gìi mi nɛ cìrá gè, kire yē mi gbɛ̀ de mi kàsɛnigɛ fé gè, béri mi baara kúu dè dàa mi 'taa Kàfɔli Zezi mɛ́ wè, béri Kulocɛliɛ ti wori nyu dè.

25 «Bɛ̀ sí ki yē ŋɔ̀ wè, mi 'ki cɛ́n yeli sǐ ń'nɛ̀ je ga mi nyaa cíginiʔ, yeli ye mìɛni bèle, yeli bálì mɛ́ mi 'Kulocɛliɛ Kùlofɔligɔ wori juu dè nɛ̀ tóri bèle. 26 Kire nɛ̄, gìi ki 'yeli kɛnmɛ kúɔ bè, a wàa sìi cɛ́nì cúʔɔ wè, m'bé gbɛ̀ ki juu pàngɛ gè bé jo dìgire wè mi nɛ̄ʔ tiɛlɛ láà fáala nī yeli ye mìɛni kɔli mɛ́ gèʔ. 27 Nɛ̀ taʔa gíi nɛ̄, gìi Kulocɛliɛ wi caa ki de kpínʔini gè, mi sì kɛ́nì ki kaala láà làrigɛ yeli nɛ̄ʔ, mi 'ti mìɛni juu nɛ̀ tìɛ yeli nɛ̄.

28 «Ye- yìye cò cɛ̀ngɛ yeli tíimɛ bèle, yé míɛni ye- sí de Kulocɛliɛ tɛ́ngɛfɔlilɔ gboli sɔ́migi lè yeri wéli, nàa nī Kulocɛliɛ sìnbatogo gè. ni 'yeli tɛ́ngɛ ti nɛ̄ ye- puu ti nàʔavɔlilɔ yeri ti nári. Kire sìnbatogo kire Kulocɛliɛ wi 'tɛ́ngɛ wìi mɛ́ nɛ́ wi tíimɛ sìsiɛn ní gè. 29 Mi tíimɛ 'ki cɛ́n dí a mi kɛ́nì kɛ́ wè, kàdafiire sìpiiboyo yáà bága pa jíin yeli nī; yiì je sìnbatogo yaʔa gè wī díɛʔ ! 30 Yeli tíimɛ sunʔɔmɔ nī bè, nàguɔlɔ pálì bága yɛ̀ de káfinɛrɛ siɛnrɛ táà caa de nyu, bè tɛ́ngɛfɔlilɔ pálì fáanni bè taʔa pìye kúrugu. 31 Kire nɛ̄, yeri yìye ciʔige cɛ̀ngɛ, ye ki sɔ̀ngi ye taa, nɛ̀ ki líɛ yiʔɛlɛ taanri, mi 'puu yéturo nɛ̄ dè pìlige nɛ́ cɛnvugo nɛ nyu nɛ tìí yeli nɛ̄ nigbe nigbe; miì kɛ́nì láʔa kire siɛnrɛ ti juʔu nɛ̄ gèʔ.

32 «Bɛ̀ sí ki yē píra ŋáà nī wè, mi 'yeli le Kulocɛliɛ kiyɛ nī nɛ́ wi siɛnrɛ ní dè dàa dī nɛ́ kpuʔɔrɔ ní dè; ti bé gbɛ̀ yeli kɛn yeli ŋɔri taa, bé sí kɔrigɔ kɛn bìli mɛ́ piyē wàlidɛngɛlɛ Kulocɛliɛ mɛ́ wè, pe mìɛni bèle.

33 «Mi sì kɛ́nì nyabiɛnnɛ kpíʔile wàa wali nɛ̄ʔ, wàa tiɛ nɛ̄ʔ, bé nɛ́ ga jo wàa bururo nɛ̄ʔ. 34 Mi nɛ́ mi kiyɛ nyáà ní yè, mi 'baara nɛ̀ mi kakuʔɔlɔ nyuɔ gèle nɛ́ mi kòrinyɛninɛ ní bèle, yeli nyɛ́nì tire cɛ́n. 35 Mi 'ki kpíʔile nɛ̀ tìɛ yeli nɛ̄ kɛnmɛ pi mìɛni nɛ̄, mɛni yeli 'yɛli bèri baara gbɛ̀ngɛ wè, bé sí gbɛ̀ jáa bè fuunmɔfɔlilɔ sáʔa bèle. Ye- sɔ̀ngi ye taa nɛ́ Kàfɔli Zezi wire tíimɛ nyasiɛnrɛ ní dè, wi 'jo: ‹Bè wàa kɛn wè, kire fundaanra ti 'tóri wàa muɔ kɛn nɛ̄ wè.› »

36 Bà Pɔli wi kɛ́nì tire juu nɛ̀ kúɔ dè, a wi 'tìgi nɛ̀ káguro wáa nɛ́ pe mìɛni ní bèle, nɛ́ Kulocɛliɛ náari wè. 37 A pe mìɛni 'tuu kɔngɔ nɛ̄ nɛ nyɛni; a pe fàa wè nɛ̀ mígi yétiige nī gè nɛ wi suɔn suɔn. 38 Pe laamɛ pi cé tɔ̀ni nɛ̀ piɛn pe nī bà Pɔli wi cé ki juu nɛ́ jo dí piyě ní ga wire nyaa wèʔ, a pe 'kɛ́ nɛ̀ sɛ́nì wi tórigo kɔ́rikpuʔɔ mɛ́ gè.